O le ā Lau Masani?
1 O sauniga Kerisiano o se vaega matuā manaomia o la tatou tapuaiga ia Ieova. Ua talafeagai ona uunaia i tatou e le aposetolo o Paulo ia aua lē lafoaiina le faapotopotoina o i tatou, e “pei o le masani o isi.”—Epe. 10:25.
2 Pe ia te oe lea lava lagona e faatatau i le auaufaatasi ma ou uso i sauniga Kerisiano? O le ā ua faaalia e lau masani e uiga i lenei? Faamata o ē auai e le aunoa i sauniga uma, e aofia ai ma le Suesuega Tau Tusi a le Faapotopotoga? Pe ua e iloa faapea ua fai ma au masani le misia o sauniga? O le ā le tulaga o i ai sauniga i lou olaga? O ē faalaeiauina isi ia auai e le aunoa i sauniga? Pe ua e faalaeiauina ē na auai i le Faamanatuga ia faifai pea ona latou faatasi i sauniga?
3 Tainane a tatou faasologa i aso faisoo, e lē mafai ona faaletaualoa ai le timaiga a Paulo. E ui ina lē o toe po se lilo faapea atonu e misia e se Kerisiano se sauniga mai lea taimi i lea taimi ona ua faaletonu le soifua maloloina po o nisi aiaiga e i tala atu o lona pulea, e mautinoa e lē tatau ona avea ma ana masani. (Roma 2:21) Faatasi ma le tele o matafaioi e tausia, lea atonu e aofia ai le anoanoai o gaoioiga faatiokarate, e manaomia e se Kerisiano ona faamautinoa mea e sili atu ona tāua. (Fili. 1:10) E aofia i mea e sili atu ona tāua mo se Kerisiano o sauniga ma e matuā manaomia mo lo tatou lelei faaleagaga.
FEFAALAEIAUAI MA LE TASI
4 Ina ua tusi Paulo i tagata Roma, na ia taʻua faapea ua loa ona ia fia vaai ia te i latou. Aiseā? Ina ia mafai ona avatu o ni meaalofa i la le agaga e faapea ona “faatumauina” ai i latou. (Roma 1:11) Sa lē faamalieina o ia i le tau ina lafo atu ia i latou o se tusi, o faamatalaga tusitusia latou te faitau ai, peitai na ia lagona faapea e tāua le auaufaatasi, ioe, e manaomia, auā na ia faaauau, faapea: “Ina ia mafai ai ona felafolafoai o faalaeiauga.” Pe e pei ona faamauina i faasinoga i lalo o le Reference Bible: “Ina ia faalaeiauina faatasi.” (Roma 1:12, NW) E oo ia Paulo, o se aposetolo, sa silafia lona manaomia mo faalaeiauga e ala i aufaatasiga Kerisiano.
5 I se uiga tali tutusa, e ao ona tatou faaosofia le tasi ma le isi i le alofa ma galuega lelei i a tatou sauniga. O se laufofoga fiafia faaleuo ma se faafeiloaiga mafana e mafai ona maua ai e isi āuga maumauai. O tali e atiina aʻe ai, saunia lelei o vaega o le polokalama, maimoaina o le auiluma faaleagaga o isi, ma tau lava o le iai i le lotolotoi o uso i ina i sauniga e mafai ona matuā faalaeiauina. Tusa foi pe tatou te vaivai i le faaiʻuga o le aso, e masani ā ona tatou iloa ua sili atu ona lelei o tatou lagona pe a maeʻa ona auai i le sauniga. O le faauooga Kerisiano ma le alofa ua faaleoina e o tatou uso mo i tatou o le a faalaeiauina ai i tatou e “taufetuli ma le onosai i le ala tanu o i o tatou luma.” (Epe. 12:1) I le faalogologo ma le lē gasē i le Afioga a le Atua, e mafai ona sauniunia ai i tatou e taofimau i le folafolaina i lumamea o lo tatou faamoemoe ma le lē fefoifoiai. E moni, e anoanoai faamanuiaga e sau mai le auai i sauniga.
6 I le taimi nei e leʻi faapea muamua, e tatau ona tatou taofimau lo tatou faatuatua ma faaosofia isi i le alofa ma galuega lelei. E ao ona tatou tinoū ia tatou taumafaiga e auai i sauniga uma a le faapotopotoga. Tatou te lē mananao paʻū atu i le masani po o le uiga o le lafoaiina o le faapotopotoina faatasi o i tatou. E tatau ona tatou faia se taumafaiga faamaoni e faalaeiauina ma fesoasoani i isi, e aofia ai ē na auai i le Faamanatuga, ia auai i sauniga e lē aunoa. I lenei auala, tatou te faaalia ai lo tatou alofa mo isi ma lo tatou talisapaia mo sauniga Kerisiano.