Fuaina mai Pea Fua Ma le Onosai
1 Ina ua tusi atu i le faapotopotoga i Kolose, e itiiti ifo i le 30 tausaga talu ona mavae le maliu ma le toetu mai o Iesu Keriso, na mafai e le aposetolo o Paulo ona taʻua faapea sa fuaina mai fua e le upu moni o le tala lelei ma ua faateleina i le lalolagi uma. (Kolo. 1:5, 6) I sona faatatauga e sili ona maoae i aso nei, ua ausia moni ai e Molimau a Ieova “tuluʻiga o le lalolagi” ma le tala lelei o le Malo. (Galu. 1:8; Ioane 14:12) I le tausaga faaleauaunaga 1989, sa i ai se faatelega e 5.6-pasene le numera faatatau o tagata talaʻi o le Malo i le lalolagi aoao, ma na tatou ausia ai se tumutumuga fou e 3,787,188 tagata talaʻi i atunuu e 212!
2 I atunuu ua taofia ai le talaʻiga tau le Malo o le Atua ma e leʻi atoa mai lipoti, o se faatelega sili atili e 7.6 pasene na lipotia mai ai! E ui i le tele o faafitauli o loo iai i na laufanua, ua faaauau pea e le autalaʻi ona “fua mai ai . . . ma le onosai.” (Luka 8:15) Ua tau fai ifo omiga i nisi o nofoaga, peitai ua faaauau pea ona le suia tulaga faigata i isi atunuu.
3 I atunuu o loo i ai se saolotoga tele e tauave ai pea gaoioiga talaʻi o le Malo, e ese foi faafitauli tatou te fesagai. Ae maise lava nofoaga e tamaoaiga faaletino, ua taatele ai le faataliga tutuli ma le faaleogolua. E ao i auauna a Ieova ona puipui ia aua neʻi faaofi maia na uiga. Tatou te lē mananao i tuinanauga faaletino, fiafiaga, evaevaga, ma isi faatosinaga e fāoa la tatou gaoioiga faatiokarate. I se isi itu e ono oo ina tatou faalotolotolua ai ma lē taulau ona talisapia le manaoga ia fuaina mai pea fua ma le onosai.—Luka 21:34-36.
MANAOMIA LE ONOSAI MA TAUMAFAIGA
4 O le onosai o se mea manaomia pe tatou te fesagai ma teteega i le tala lelei po o le maua o sina saolotoga e tauave ai a tatou avega tauave faa-Kerisiano. I nisi o laufanua, sa galulue ai o tatou uso i lalo o tulaga ogoogo mo le faitau sefulu o tausaga. O lo latou onosai i lalo o na faigata ua iʻu ai i se tulaga faamaonia, ma ua latou seleseleina nei faamanuiaga faaʻoaina. (Roma 5:3-5; Kala. 6:9) Po o a lava faafitauli tatou te ono fesagai, tatou te mananao e tumau pea. E ao ona avatu le molimau o le Malo, ma o i tatou uma lava e ao ona faaauau le faaalia o lo tatou faamaoni. I le onosai i la tatou vaega, o le a tatou faasaoina ai o tatou o solu, po o le ola.—Mare. 13:10; Luka 21:19.
5 E mafai ona tatou faaalia faapea tatou te lē o tafili saunoa i mea faaleagaga i le pulunaunauina o i tatou lava ma le faamalosi i le auaunaga a Ieova, ma ia lē faavaivai i le galuega talaʻi. I nisi o laufanua e matuā faigata ai auala, mativa i mea manaomia faaletino, ma o loo i ai faafitauli tau tamaoaiga, e aunoa ma se faavaivai ai i le talaʻiga o le tala lelei. I nisi o na atunuu, o se tuu faatatau e lē aunoa o itula a tagata talaʻi o le faapotopotoga i le auaunaga i le fanua i masina taitasi e 14 i le 17. O loo maumau tutū foi le faateleina o a latou paeonia. E na ona faatali ma manatunatu ai nisi o i tatou o ē tele mea faaletino. E mafai ona tatou faateleina lo tatou sao e le aunoa i le galuega aupito sili ona tāua o le talaʻiga o le Malo ma le faia o soʻo?
E MAFAI ONA TATOU FAIA E SILI ATU?
6 O le faaaluina o se taimi tele i le auaunaga i le fanua atonu e manaomia ai le fetuutuunai teisi o a tatou faasologa. Afai sa tatou faaaluina se itula i le faiva i le fanua i le Aso Sa, e mafai ona faaumiumi atu lena taimi i le faaaluina o se isi itula i le faia o toe asiga po o le aaoina o se suesuega faale-Tusi Paia? A le o lena afai tatou te aaoina se suesuega faale-Tusi Paia, pe mafai ona tatou faaaofia ai se itula pe ā o le auaunaga mai lea fale ma lea fale po o le faia o nai toe asiga a o lumanai le suesuega? I le Aso Toonai a maeʻa le faaaluina o itula e lua i le gaoioiga mekasini, atonu e mafai ona tatou faaoo atu mekasini i se ala mekasini na tatou fafauina pe taumafai e faia nisi toe asiga. O i latou o ē nonofo i le taulaga atonu e iloa le aogā o le faaaluina o sina taimi i le molimau i magaala. I ia auala atoa ma isi, tatou te ono mafai ai ona faateleina lo tatou auai i le auaunaga i le fanua. O taunuuga lelei e tatau ona faasolosolo faateleina ai.
7 O le taimi tele tau auaunaga i le fanua e alu i le faia o toe asiga o le a lē masalomia le iʻu i le tele o suesuega faale-Tusi Paia e aaoina. O lona uiga i se taimi o le a toatele tagata e o mai i totonu o le upu moni ma fesoasoani ia i tatou e faaiʻuina le galuega talaʻi o le Malo.—Mata. 28:19, 20.
MATUĀ MANAOMIA LE TATALO
8 Afai tatou te fuaina mai pea fua ma le onosai, e ao la ona tatou saili le faamanuiaga a Ieova ma gauai atu i le taʻitaʻiga a lona agaga. E tatau ona avea la tatou faiva ma mataupu o tatalo ia Ieova. A ole atu ia Ieova e uiga i la tatou gaoioiga i le fanua, ua faamanatu mai ia i tatou faapea o i tatou o ana aumea faigaluega. (1 Kori. 3:9) Faatasi ma le fesoasoani a Ieova, e mafai ai ona tatou tumau i la tatou faiva tusa lava pe tatou te le vave vaaia ni taunuuga. I nisi nofoaga, na faatoa oo mai faatelega ina ua mavae le tele o tausaga o le onosai ma le faamaoni i le vaega a ē folafola le Malo. A o tatou tagai atu i le lumanai, e manaomia pea le sailia o le faatonutonuga tauatua ma le fesoasoani ina ia lē faavaivai ae ia faaiʻuina atoatoa la tatou faiva. (2 Timo. 4:5) O loo anoanoai pea fua ua saunia i le galuega talaʻi o le Malo ma le faia o soʻo.
9 Sa faamamafa e Iesu le manaoga mo i tatou ia tatalo soo. (Luka 18:1) Na apoapoai mai Paulo: “Ia tatalo e le aunoa.” (1 Tesa. 5:17) Ua iai mafuaaga faanatinati mo i tatou e finafinau ai nei i le tatalo. E anoanoai avega tauave ua aafia i le tausia mo le tuputupu aʻe o le lafu i lea tausaga ma lea tausaga. Tatou te mananao e fesoasoani i isi ia fuaina mai fua ma le onosai. E ao ona uaʻi atu manatu i manaoga eseese o tagata talaʻi taitoatasi ma le faalapotopotoga atoa. I le matauina o le manaoga mo tauofo e lagolago ai le galuega ma ia faaauau ai ona maua lomiga e faavae i le Tusi Paia, e manaomia ona tatou tatalo ia uunaia pea e Ieova tagata o ē matataʻu i le Atua ina ia lima mafola i lenei faatatau.—2 Kori. 9:8-11.
10 A o tatalaina vaega o le fanua i le lalolagi aoao mo taualumaga faatiokarate i se mamao e sili atu e leʻi faapea muamua, ua sili ai foi ona uigā le apoapoaiga faale-Tusi Paia i le Kolose 4:2: “Ia outou finafinau i le tatalo, ia mataala i lea mea ma le faafetai.” E tatau ona faia a tatou tatalo mo o tatou uso i so o se mea ina ia faaauau ai ona fuaina mai fua, ma fesoasoani i isi pei ni mamoe e maua i oganuu sa sili ona faigata ai le molimau i le taimi ua mavae.
FOLASIA LE LOTO FAAFETAI
11 Maeu lo tatou loto faafetai mo le fau ma soloi o sauniuniga faaleagaga ua tatou soona olioli ai! Tatou te fia faamanū atu ia Ieova mo ia mea, ma tatou te tatalo foi mo lana faamanuiaga faafualoa i le galuega a le auauna faamaoni ma lona Vaega Pule. O lo latou loto maulalo, i taumafaiga lē musuā mo i tatou ma mo ē pei ni mamoe i le faataamilo o le lalolagi e matuā sapaitalia nauā.
12 I le luluina o fatu o le Malo, sa taliaina ai se aofaiga maoae o lomiga. (Mata. 13:3-8, 18-23) E ui i lea, o loo faaauau pea ona i ai se faatagi mo Tusi Paia ma lomiga faale-Tusi Paia i le fanua. Ua faaalia i le lipoti o le lalolagi faapea ua maeʻa ona faia se vaega tele o le galueaina ma le faasūsūina i le itu o toe asiga ma suesuega faale-Tusi Paia i aiga. A o tatou faaauau ona faia la tatou vaega i nei vala tāua o la tatou faiva, tatou te faafetaia Ieova mo lana faamanuiaga e le uma ua faaolaolaina ai mea.—1 Kori. 3:6, 7.
ISI MANAOGA
13 Ona o loo i ai i le lalolagi e ui ina e lē o sona vaega, o le a faaauau pea ona fesagai Kerisiano ma tofotofoga ma faaosoosoga, ia o le a faateteleina i aso e gata ai. O loo onosaia nei e nisi sauaga ma isi mea faigata. E ao ona tauaveina e isi la latou gaoioiga faa-Kerisiano i laueleele ua faatamaia i taua. Ua oo i o tatou uso mala e pei o mafuie, asiosio, ma afa. Pe a tutupu nei mea, e tatau ona tatou tatalo mo o tatou uso o i na nofoaga. (Faatusatusa Galuega 12:5; 2 Korinito 1:11.) O nisi taimi e manaomia ai ona faafesootai pe tusi atu i ofisa i tulaga maualuluga e uiga i taofiga i la tatou galuega, i sauaga i o tatou uso, po o isi mataupu e afaina ai faanaunauga tau le Malo. I lalo o na aiaiga, tatou faia le mea e tatou te mafaia totino, ma tatou ofoina atu tatalo e faatatau i na tagata ina ia latou gauai ane ma le agalelei i o tatou uso ā auauna.—1 Timo. 2:1, 2.
14 E anoanoai omiga ua faafaupuʻe i luga o aiga o loo ola i le lalolagi amioleaga a Satani. (2 Kori. 4:4) Atonu sa fetaiai ulugalii faaipoipo ma faafitauli matuiā. E ao ona faamalosiau i ai e tatalo mo le faatonuga tauatua, ma atonu foi tatou te tatalo mo i latou. (1 Kori. 7:5; 1 Pete. 3:7) O ulu o aiga e tatau ona talisapaia faapea e faafofoga mai Ieova ia latou tatalo faatauanau mo taʻiala i le pulea lelei o ō latou auaiga. (Faama. 13:8; Fili. 4:6, 7) O ē laiti atoa ma ē matutua ua faafesagai ma tulaga faigata. Atonu e tutupu nei mea i aʻoga, i le galuega masani, pe a alu malaga, pe i isi aiaiga. Ua fesoasoani le tatalo ia i tatou e teena le agaga o lenei lalolagi amioleaga ma fuaina mai pea fua a o tatou faaauau ona faia mea e mālie i le silafaga a le Atua.—Mata. 6:13; Efe. 6:13-18; 1 Ioane 3:22.
15 O Ieova o le Faafofoga tatalo sili. (Sala. 65:2) I taimi uma lava e manaomia ona tatou lafo atu o tatou popolega ia te ia. (Sala. 55:22) Ua ia i tatou avanoa e folasia ai lo tatou manatu mamafa e ala i le tatalo mo faanaunauga uma o le Malo ma mo le lelei o ō tatou uso i so o se mea. Pe a manatunatu i le galuega a i latou o loo taʻimua i le faapotopotoga ma i latou o loo faatonutonuina le polokalama tau faatelega i le lalolagi aoao, pe a feutagai ma i latou o ē mamaʻi faaleagaga, po o le tausia o isi faafitauli laiti pe tetele, e tatau ia i tatou uma lava ona folasia pea na mataupu i luma o Ieova i le tatalo. (1 Tesa. 5:25; Iako. 5:14-16) Ioe, e ao ona lafo atu o tatou popolega ia Ieova faatasi ma le mautinoa atoatoa faapea tusa lava po o le ā tatou te ole atu ai e tusa ma lona finagalo, o le a ia faafofoga mai ia i tatou. (1 Pete. 5:7; 1 Ioane 5:14) Talosia ia tatou maelega i le auaunaga o le Malo ma faaauau ona tagai atu ia Ieova ia fesoasoani mai ia i tatou e fuaina mai pea fua ma le onosai.