Taulimaina o le Tala Lelei—E Auala i Talosaga
1 Sa tusi faalaeiau atu le aposetolo o Paulo i tagata Filipi, “Ou te mafaia mea uma lava i le faamalosi mai o Keriso ia te au.” (Fili. 4:13) E manaomia foi ona tatou faalagolago atoatoa ia Ieova mo le malosi e taulimaina ai le tala lelei ma le faamalosi. E mafai faapefea ona tatou faia lenei mea?
2 Sa faamamafa e Iesu le manaoga mo i tatou “ia tatalo soo . . . a e aua le faavaivai.” (Luka 18:1) Na apoapoai mai Paulo, “Ia tatalo e le aunoa.” (1 Tesa. 5:17) Ioe, e maua le malosi mai le tatalo. E manaomia ona tatou taulimaina le tala lelei e auala i talosaga. E mafai ona tatou tatalo mo ni avanoa e molimau ai i isi, mo le atamai ma le faautauta i le galuega mai lea fale ma lea fale, ma mo le taulau i le pāʻia o loto o a tatou tagata aʻoga o le Tusi Paia. Talu ai o loo iai se manaoga faanatinati ia talaʻia le tala lelei o le Malo a o leʻi oo mai le gataaga, e manaomia ai foi ona tatou tatalo mo le auiluma o faanaunauga o le Malo i le lalolagi aoao. (Mata. 24:14) E tatau ona tatou ‘mataala pea’ e tatalo ina ia alofia ai le tulemoe faaleagaga ma faateleina ai lo tatou talisapaia mo le faaeaga o le tautala atu i isi e uiga i fuafuaga a Ieova.—Kolo. 4:2; w-E62 itu. 497.
I SUESUEGA FAALE-TUSI PAIA
3 Aiseā e tāua tele ai le tatalo pe a faafoeina se suesuega faale-Tusi Paia? O le amataina o se suesuega i le tatalo e faasagatonu ai o tatou mafaufau, ma e fesoasoani ai i le tagata aʻoga ia malamalama i le tāua o mea ua tautalagia. E aʻoaʻoina ai o ia e vaavaai atu ia Ieova mo se taʻitaʻiga. O le a aʻoaʻo foi e le tagata aʻoga pe faapefea ona tatalo mai la tatou faaaʻoaʻoga.—Luka 11:1.
4 O ā nisi mea e talafeagai ona aofia ai i tatalo i suesuega faale-Tusi Paia i aiga? O le tatalo faaaʻoaʻo a Iesu ma le tatalo a Paulo mo tagata Filipi o ni faaaʻoaʻoga e sili ona lelei. (Mata. 6:9-13; Fili. 1:9-11) E lē manaomia ona uumi a tatou tatalo, ae ao ona ia feagai ma mea patino. E tāua ona tatou faaaofia ai faalagina talafeagai o le viiga ia Ieova mo ana galuega e sili ona lelei e lē mafaitaulia. E mafai ona tatou faaleoina atu le aloaia o lona silisiliese, malualii, ma ona uiga lelei atoatoa. (Sala. 145:3-5) O le a aogā foi ona taʻua ai le igoa o le tagata aʻoga o le Tusi Paia, pe atonu e faailoa atu ona aʻiaʻiga, ma tatalo ia faapea ona ia faia se agaʻigaʻi i luma. A o ia agaʻi i luma, e mafai ona tatou talosaga mo faamanuiaga a Ieova i ana taumafaiga e auai i sauniga ma ia fetufaaʻi ma isi le upu moni ua ia aʻoaʻoina. Faaaofia ai foi olega mo le faamanuiaga a Ieova i le galuega talaʻi i le lalolagi aoao.
MO O TATOU USO MA TUAFAFINE
5 O tagata uma lava o Ieova o a tatou aumea faigaluega. (1 Kori. 3:9) O le mea lea, pe a taumafai taʻitaʻi o loo iai e aiā fua i le talaʻiga o le tala lelei, ua uunaia i tatou e tatalo “mo tupu ma i latou uma ua i ai le pule.” Mo le ā le fuafuaga? “Ina ia tatou nonofo ma le le atuatuvale ma le filemu, i le amio Atua uma lava ma le amio matagofie.” (1 Timo. 2:1, 2) E talileleia moni lava e o tatou uso i le lalolagi atoa na tatalo. Tatou te tatalo e talosia ia ano lelei ane taʻitaʻi o malo i la tatou galuega.
6 E ala i le tatalo, e mafai ai ona tatou talosagaina le malosi mo o tatou uso o ē o loo talaʻi i lalo o tulaga faigata ma mo i latou o ē atonu o loo mamaʻi faaleagaga, ina ia mafai ona faia so latou sao atoatoa i le faiva. (2 Tesa. 3:1, 2) E lelei foi ona tatalo mo toeaina i le faapotopotoga, ovasia femalagaai, ma le Vaega Pule—i latou uma “e o galulue ia te outou.”—1 Tesa. 5:12.
7 I nisi taimi e manaomia ai ona lafo atu o tatou popolega ia Ieova. (Sala. 55:22; 1 Pete. 5:7) Ua faamautinoa mai ia i tatou faapea po o le ā lava le mea tatou te ole atu ai e ōgatasi ma lona finagalo, o le a ia faafofogaina i tatou. (1 Ioane 5:14) O mea lea, afai tatou te tatalo mo le fesoasoani a Ieova ia faataunuuina atoatoa la tatou faiva, e ao ona tatou mautinoa e faafofoaga mai o ia ma faataulauina o tatou ala.—2 Timo. 4:5.