Sauniga e Fesoasoani ia i Tatou e Faia Soʻo

VAIASO E AMATA IA MATI 4

Pese 19 (220)

5 minu: Faasilasilaga masani ma Faasilasilaga e filifilia mai La Tatou Faiva o le Malo. Faaauivi mai faatatauga mo le auaunaga i le fanua mo lenei faaiʻuga o le vaiaso.

25 minu: “La Tatou Faatatauga Faigofie mo le Tufatufaina o Lomiga.” Iloilo e se toeaina agavaa le mataupu ma le aofia. E mafai foi e le toeaina ona tuufaatasia ma manatu mai le tusi a le Sosaiete o Me 15, 1990. Ona faataʻitaʻi lea e se tagata talaʻi agavaa lava saunia, pe mafai faapefea ona faatatauina faamatalaga mai le lauga i le auaunaga i le fanua. I le faaaogāina o se tasi o mekasini fou o le a ofoina i le auaunaga i le fanua i lenei faaiʻuga o le vaiaso, faaaafia e le tagata talaʻi lē ona le fale i le talanoaina o se manatu i se tasi o mataupu. A o taulai atu le tagata talaʻi i se manatu faapitoa i le mekasini, ia faapea ane lē ona le fale: “E foliga mai e manaia lena.” Faapea atu le tagata talaʻi: “Ou te fiafia e tuu le mekasini mo oe ina ia mafai ai ona e olioli i le faitauina o lenei mataupu atoa ma isi uma o loo i le mekasini.” Fesili lē ona le fale: “E fia le tau?” Tali le tagata talaʻi: “Afai e te faitauina, e leai la sona totogi. Tagaʻi foi i le itulau lea a le au faitau, o lenei mekasini o se vaega o le galuega tau aʻoaʻoga faale-Tusi Paia i le lalolagi aoao ma ua lagolagoina e foai tauofo. [Faasino i le faamatalaga i le itulau 4 o le Awake! ma le vaega pito i lalo i le itu taumatau o le itulau 2 o Le Olomatamata.] O aʻu ua na o se tasi o le silia i le fa miliona o Molimau a Ieova o ē ua ofo atu lo latou taimi ma alagātupe e faataunuuina ai lenei galuega matuā tāua i le silia i le lua selau atunuu. Afai e manano isi e faia sina foai laitiiti i le galuega, e talia ma le fiafia i latou e faia faapea.” E ā lē ona le fale e foai mai ae tuu e le tagata talaʻi le tupe i le teutusi o loo ia tauaveina mo lena fuafuaga. Ona ia faaleoina atu lea o le talisapaia mo le foai ua ofo mai ma faapea atu i ai o le a ia foi ane ma isi lomiga e sosoo ai o mekasini. I le faataʻitaʻiga puupuu lona lua, faataʻitaʻi le auala na lē tuua ai e le tagata talaʻi se lomiga, ona e ui ina malie lē ona le fale e talanoa, ae e lē naunau moni i le feau o le Malo. I le faataʻitaʻiga puupuu lona tolu, faailoa mai pe mafai faapefea ona tuua se sāvali i se tasi e faaalia le naunau faamaoni ae o loo fai si pisi i lena taimi ma e foliga mai e lē talafeagai i lea taimi patino ona faamatala i ai le auala o loo lagolagoina ai la tatou galuega i le lalolagi aoao. Folafola i ai e le tagata talaʻi o le a ia toe foi atu i se taimi e sili ona avanoa. A ia toe asiasi atu, o le a ia taumafai e faamautinoa pe naunau moni lē ona le fale i la tatou galuega, ma afai o lea, faamatala loa i ai le natura o la tatou faiva ma le auala o loo lagolagoina ai le galuega.

15 minu: “Taulimaina o le Tala Lelei—Ma le Tusi Revelation Climax.” Talanoaga i fesili ma tali. A maeʻa ona talanoaina le palakalafa 4, fai se faataʻitaʻiga lava saunia e faailoa mai ai pe faapefea ona ofo e se tagata talaʻi se tusi i lē ona le fale o lē ua faaalia le naunau faamaoni i le talanoaga o le Tusi Paia. E mafai ona fai atu le tagata talaʻi: “O Molimau a Ieova o ni tagata galulue tauofo o ē ua lagona faapea e matuā tāua mo tagata o ē matataʻu i le Atua ona maua lenei tala lelei ua matagofie nauā ona faamatalaina i le tusi o le Tusi Paia o Faaaliga. O foai tauofo a Molimau a Ieova atoa ma isi tagata o ē ua iloa le aogā o aʻoaʻoga a le Tusi Paia i aso nei, ua fesoasoani e lagolagoina lenei galuega ma ua mafai ai ona matou ofoina lenei tusi e aunoa ma se totogi i tagata o ē ua naunau faamaoni e aʻoaʻo le mea o loo teuina e le Atua mo le fanau a tagata.” Fesili lē ona le fale: “O lona uiga e mafai ona tuu ma aʻu le tusi?” Tali le tagata talaʻi: “Ioe, e mafai pe afai e te naunau moni lava i le feau a le Tusi Paia o loo iai. Ma o le a ou fiafia e toe asiasi mai ma talanoaina atili sina vaega o lenei faamatalaga ma oe. Afai e te finagalo e fai sina foai laitiiti i le faaauilumaina o lenei galuega tau aʻoaʻoga faale-Tusi Paia, e mafai ona e faia faapea. O le a sapaitalia lau foai ma faaaogāina atoatoa mo le faaauilumaina o le tala lelei o le Malo. Ofo atu e lē ona le fale se foai ma faapea ane i ai o le a ia talia se toe asiga. Amata le faataʻitaʻiga lona lua, i le vaega faaiʻu o le faamalamalamaga a le tagata talaʻi o le faatatauga mo le tufatufaina o lomiga, ona tuu lea i lē ona le fale e faapea mai: “O le a ou fiafia tele e faitau le tusi.” Fai atu le tagata talai: “Ou te iloa o le a faagaeeina oe ma atonu foi o le a e ofo i nisi o mea sa tusia anamua e uiga i o tatou aso. Ou te fiafia ta te talatalanoa atili i se vaega o lenei faamatalaga i se isi taimi. Faamata e lelei mo oe pe afai ou te afe mai, po o le taimi lava lenei e tasi i le vaiaso a sau pe a matou faia isi o asiga i lenei pitonuu?” Malie i ai lē ona le fale ona alu loa lea o le tagata talaʻi. Taʻu atu faapea atonu e manaomia e nisi o tagata talaʻi talavou ona matuā galulue vavalalata ma o latou mātua i le faiva i lea fale ma lea fale seia oo ina latou tomai e felafolafoai ma tagata o aiga. O le a mananao tagata talaʻi fou ma ē e itiiti le poto masani e galulue ma tagata talaʻi o ē e mafai ona aʻoaʻoina i latou e faaaogā le Mataupu mo Talanoaga ma faamatalaina ma le uigā le faatatauga faigofie mo le tufatufaina o lomiga. I le tauaveina o le faiva i lenei auala, ua tuu ai le faamamafa atili i le galuega talaʻi ma mafai ai ona tatou iloa ma manino atili i le mea o loo faaalia ai le naunau moni. O lo tatou popolega autū o le sueina lea ma fafaga i mamoe a le Alii ma fesoasoani e faaauupegaina i latou e sao atu i le lalolagi fou a Ieova.

Pese 4 (6) ma le tatalo faaiʻu.

VAIASO E AMATA IA MATI 11

Pese 47 (87)

10 minu: Faasilasilaga masani ma le tala o le tupe. Faaaofia ai le talialoaia o foai. Faamanatu i tagata uma o le a faia le Faamanatuga i le afiafi o le Aso Toonai, Mati 30. Faailoa atu le taimi tonu ma le nofoaga. Fesili i le faapotopotoga pe o faapefea ona latou fuafua e valaaulia ē fou i le Faamanatuga, ma faataʻitaʻi pe mafai faapefea ona faia lenei mea. Faamanatu i le faapotopotoga o loo maua tusi valaaulia ua uma ona lomia.

15 minu: Manaoga o le faapotopotoga, po o se lauga e faavae i le mataupu “Maua le Upu Moni Atoatoa!” i Le Olomatamata o Ianuari 15, 1991.

20 minu: “Le Aso e Silisili ona Tāua i le 1991.” Fesili ma tali. O se taulimaga mafana ma aasa e faalaeiau ai le faapotopotoga ina ia maua le agaga o le aso e silisili ona tāua o le tausaga. Faamatilatila le tāua o le faia o faatatauga lelei e tuliloaina ai le naunau faaalia o tagata e auai i le Faamanatuga mo le uluai taimi.

Pese 66 (129) ma le tatalo faaiʻu.

VAIASO E AMATA IA MATI 18

Pese 72 (135)

10 minu: Faasilasilaga masani. Tala Faatiokarate. Taʻu atu faatatauga o le auaunaga, ma iloiloina manatu tāua mai mekasini o loo iai e mafai ona faaaogā i le auaunaga mekasini. E mafai foi ona faamatala atu ni mea na tutupu i le taulimaina o le ofo o loo iai. Faalaeiau le galuega paeonia lagolago mo Aperila.

20 minu: Sauniunia ni Faatomuaga Uigā. Fesoasoani se toeaina o lē e uigā i le faiva i le fanua i ni tagata talaʻi e sauniunia ni faatomuaga o le a talafeagai ma le oganuu. Faavae faufautuaga i itulau 9-15 o le tusi Reasoning. Iloilo ni faatomuaga se lua pe tolu e mafai ona faaaogā faatasi ma le Mataupu o Talanoaga o loo iai po se isi mataupu e fetaui ma lena taimi. Faataʻitaʻi e ni tagata talaʻi agavaa ni taulimaga i lea fale ma lea fale, e faaaogā ai faufautuaga ua aumaia i le Sauniga o le Auaunaga mo le vaiaso e amata ia Mati 4. A lava le taimi, faamatala puupuu ni mea na tutupu i lou vaipanoa e faataʻitaʻia ai le aogā o faatomuaga e faatosina ai lē ona le fale.

15 minu: Lauga i le aogā o le faitauina o mau e faatatau i le Faamanatuga ua lisiina mai i le 1991 Calendar mo Mati 25-30. Atonu e mananao ni aiga e faitauina faatasi ma iloiloina le uiga o lea faatasiga. E mafai foi ona aogā le faitauina o le mataupu i lalo o le “Talisuaga Afiafi a le Alii” i le Insight, Tusi 2, itulau 268-271. O sea sauniuniga e mafai ai ona siitia le sapaitalia mo le Faamanatuga ma tosia vavalalata ai aiga i le fusi o le tapuaiga moni.

Pese 103 (193) ma le tatalo faaiʻu.

VAIASO E AMATA IA MATI 25

Pese 84 (168)

10 minu: Faasilasilaga masani. Faaauivi mai faatatauga mo le Faamanatuga. Ia faamanatu i le aofia e aumai o latou aiga ma tagata naunau i le Maota o le Malo i le vave e mafai ai ina ia maua ni nofoa. I nofoaga e faia ai e ni faapotopotoga se lua pe sili atu foi le Faamanatuga i le maota e tasi, o le a saunia e toeaina taʻiala e faatatau i le taimi e ao ai ona taunuu ane le faapotopotoga. Faafeiloai tagata fou i uso ma faamasani i latou ma le Maota o le Malo pe afai o lo latou uluai taimi lea i inā. Faasilasila faatatauga mo le galuega i le fanua i le Aso Toonai ma le Aso Sa, faalaeiau i tagata uma ina ia maua se faaiʻuga o le vaiaso e tumu i mea faaleagaga.

15 minu: “Pe o le a Faaauau ona E Savali i le Upu Moni?” Lauga e faavae i Le Olomatamata o Mati 15, 1991. Faamamafa le manaoga mo tagata uma ia savavali pea i le upu moni e ui i omiga ma faigata.

20 minu: “Agaʻigaʻi i Luma i le Faiva.” Talanoaga i le va o se toeaina agavaa ma se uso o loo aafia i lea vaega o le fai si umi ona iai i le upu moni ae lē agaʻigaʻi lava i luma. Tuu ia i laʻua e faataʻitaʻi puupuu maia le vaega faataʻitaʻi o loo faasino i ai i le palakalafa 3. A talanoaina le palakalafa 4, ona faailoa lea e se paeonia po o se isi tagata talaʻi uigā i se tagata talaʻi e itiiti le poto masani pe faapefea ona faafesagaʻi ma feagai ma tulaga e faapea ona faafetaiaia mai lea taimi i lea taimi i le oganuu. Faaaofia i le talanoaga faufautuaga o loo maua i Le Olomatamata o Mati 1, 1986, itulau 15-20, e faatatau i loto e aapa atu. Faaiʻu le vaega i le faalaeiauina o tagata uma e faia ni fuafuaga maʻoti e faaleleia ai felafolafoaiga ma tagata ma le tuliloaina o le naunau.

Pese 63 (123) ma le tatalo faaiʻu.