Sauniga e Fesoasoani ia i Tatou e Faia Soʻo

VAIASO E AMATA IA IULAI 1

Pese 15 (35)

10 minu: Faasilasilaga masani ma Faasilasilaga e filifilia mai La Tatou Faiva o le Malo. Faamatilatila ni mataupu i mekasini o loo iai e mafai ona faaaogā i le galuega mekasini i le Aso Toonai.

15 minu: “Asiasiga i se Tagata Maʻi—Le Auala e Fesoasoani Ai.”

Lauga mai le mataupu i le Awake!, Mati 8, 1991. Faaauivi mai faatatauga a le faapotopotoga mo fesoasoani i ē matutua, ē lē atoatoa, po o ē ua faataotolia. Faamamafa le manatu i le itulau 11, palakalafa 4, i le aogā o laei tatau.

20 minu: “Ia Onosai ma Faimea Maeʻa i le Faiva.” Iloiloga le mataupu i fesili ma tali. Faamamafa le manaoga ia onosai, ae maise lava i oganuu ua masani ona galueaiina. A maeʻa ona talanoaina le palakalafa 6, ia faataʻitaʻi e se tagata talaʻi le auala e faaaogā ai le Mataupu mo Talanoaga pe a ofoina le polosiua Tolutasi.

Pese 74 (139) ma le tatalo faaiʻu.

VAIASO E AMATA IA IULAI 8

Pese 89 (162)

10 minu: Faasilasilaga masani. Tala o le tupe. Tala Faatiokarate. Faamanatu i le faapotopotoga faatatauga mo le auaunaga i le fanua i le faaiʻuga o le vaiaso.

15 minu: “Auai ma le Loto Atoa i le Faiva i le Fanua—Vaega 1.” Talanoaina i fesili ma tali e le ovasia o le auaunaga. Ia muai tofia i nisi mau autū ua filifilia e faitau, ma faia se faatatauga aogā i le faapotopotoga. Atiina aʻe le naunau i le faasologa o vaega e lima.

20 minu: Auaunaga Faataimi Atoa—O se Avanoa Matagofie e Savavali ai ma le Atua. (Mika 6:8) Ia avatu e se toeaina po o se auauna o le faiva agavaa, e sili ai se tasi o loo i le auaunaga faataimi atoa, se lauga mafana, ma faalaeiau. (Vaai Le Olomatamata faa-Peretania o Me 15, 1989, itulau 21-23.) Faaauivi mai ni faufautuaga aogā e fesoasoani i tagata talaʻi o le faapotopotoga, e tusa ma o latou aiaiga, ina ia mafaufau mamafa ai e uiga i le faia o le galuega faataimi atoa. Faatalanoa ni paeonia se toalua pe toatolu, ma faailoa mai le tele o aogā o le auaunaga faataimi atoa. O le tausaga fou faaleauaunaga o se taimi lelei lea e amata ai. O i latou e amata ia Setema 1, 1991, atonu o le a agavaa e ō i le Aʻoga o le Auaunaga Paeonia i le 1992.

Pese 109 (204) ma le tatalo faaiʻu.

VAIASO E AMATA IA IULAI 15

Pese 10 (32)

10 minu: Faasilasilaga masani. Afai e fesuiai taimi o sauniga a se faapotopotoga ia Setema 1, ia faasilasila le faasologa e ao ona mulimuli ai. Autalu manatu tāua mai le lipoti o le auaunaga i le fanua a le faapotopotoga ia Iuni. Faamālō i tagata talaʻi mo mea na faataunuuina i le fanua.

18 minu: “Taulimaina o le Tala Lelei—Ma le Faautauta.” Iloiloga le mataupu i fesili ma tali. Faataʻitaʻi manatu o loo i le palakalafa 5. Faailoa mai e se tagata talaʻi agavaa le auala e feutagai ai ma lē ona le fale o lē sa muai finauvale, e ala i le fesiligia ma le faautauta i ni fesili ma faaalia i ai le mea ua fai mai ai le Tusi Paia e uiga i le mataupu. E ao ona matuā saunia lelei le faataʻitaʻiga.

17 minu: “Faatatauga o le Suesuega Tau Tusi a le Faapotopotoga—Vaega 1.” Talanoaga a se toeaina agavaa ma nisi toeaina e toatasi pe toalua po o ni auauna o le faiva o loo fai ma taʻitaʻi o Suesuega Tau Tusi a le Faapotopotoga. Ia faamamafa faapitoa ni mataupu se lua pe tolu o loo matuā manaomia i le faapotopotoga, e pei o le tali i upu a le tagata lava ia ma le faia o se faatatauga aogā o le mataupu ua iloiloina.

Pese 38 (67) ma le tatalo faaiʻu.

VAIASO E AMATA IA IULAI 22

Pese 99 (118)

15 minu: Faafoe e se toeaina po o se auauna o le faiva agavaa faasilasilaga masani. Fesili i le aofia mo ni manatu e talanoa i ai mai le polosiua Tolutasi. Fili mai ni manatu e fetaui ma le Mataupu mo Talanoaga ma e atiina aʻe ai le nofo faatali o lē ona le fale mo le faitauina o le polosiua. Fai se faataʻitaʻiga puupuu e faafesootai ai i le polosiua, ma se manatu talafeagai e talanoa i ai.

20 minu: “Fuafua Nei e Auai i le Tauaofiaga Itumalo 1991 ‘O Ē Alolofa i le Saolotoga’”—Vaega 1. Talanoaga ma le aofia o palakalafa 1-9, ma se autaluga puupuu o “Faamanatu o le Tauaofiaga Itumalo” pe a lava le taimi. Atonu e mananao tagata talaʻi e talanoaina ni manatu talafeagai ma a latou tagata aʻoga o le Tusi Paia o ē o le a auai i le tauaofiaga.

10 minu: Manaoga o le faapotopotoga. Iloilo manatu e lagona e toeaina o loo manaomia ai e le faapotopotoga le fesoasoani. E mafai ona iloiloina faale-Tusi Paia nisi o mea na aumaia i luma o le faapotopotoga i le taimi o le asiasiga mulimuli a le ovasia matagaluega.

Pese 82 (152) ma le tatalo faaiʻu.

VAIASO E AMATA IA IULAI 29

Pese 33 (56)

10 minu: Faasilasilaga masani ma le iloiloga o le Pusa Fesili.

15 minu: “Tauaveina la Tatou Lava Amo o Avega Tauave.” Talanoaina e se toeaina le mataupu i se vaega faaleaiga. Toe manatu i le auala na aogā ma olioli ai le faapotopotoga mai polokalama o fonotaga matagaluega i aso nei ma atiina aʻe ina ia tepa taulaʻi atu mo le polokalama fou o le fonotaga matagaluega. Fesili i ulu o aiga i le aofia pe na faapefea ona fesoasoani le polokalama o le 1991 i o latou aiga. Faalaeiau tagata uma e faia ni faatatauga aʻiaʻi ina ia auai ma maua aogā mai le polokalama ua faaauivi mo le tausaga faaleauaunaga 1992. Afai ua iloa le aso o le isi fonotaga e sosoo ai, e mafai ona faasilasila.

20 minu: “Fuafua Nei e Auai i le Tauaofiaga Itumalo 1991 ‘O Ē Alolofa i le Saolotoga.’”—Vaega 2. Talanoaga ma le aofia o palakalafa 10-22. Faaaofia ai faamanatu talafeagai e faavae i le faamatalaga i Le Olomatamata faa-Peretania o Iuni 15, 1989, itulau 10-20. Faalaeiau aiga e autalu manatu i ia mataupu a o lumanai le tauaofiaga.

Pese 70 (132) ma le tatalo faaiʻu.