Faailoa Atu Feutanaiga a Ieova
1 “Ia outou faailoa atu i nuu o ana [feutanaiga]; ia outou taʻutaʻu atu ua viia lona suafa . . . , auā ua faia e ia mea silisili ese.” (Isaia 12:4,5) E faapefea ona e tali atu i lenei valaau? A tatou toe manatunatu i feutanaiga a Ieova ma i tatou o se nuu ma o ni tagata taitoatasi, pe lē uunaia ai ea o tatou loto e taʻu atu i isi? I tausaga e 73 ua mavae, sa tuusaoloto ai e Ieova ona tagata mai le tafeaga i Papelonia. Talu mai le 1919 ua matuā mausalī lava ona faavaeina le tapuaiga moni ma ua salalau atu nei i vaega uma o le lalolagi. O le tele ua faia ai e Ieova nei mea ua sili mamao atu na i lo mea sa tatou faatalitalia. I lou lava tagata e toatasi, e faapeī le loloto o e talisapaia ai le taʻitaʻiga, le puipuiga, ma le faamanuiaga a le Atua? Pe mafai ea ona e faia e sili atu ina ia faailoa atu ai ana feutanaiga ma faasilisilia ai lona suafa?
2 Ua faamanatu mai e le taimi o le Faamanatuga se galuega tauatua, lea o le a tatou loto faafetai ai e faavavau. O le a avea le masina o Aperila o se taimi e faapitoa ona talafeagai e faailoa atu ai ia Ieova lo tatou loto faafetai ma le talisapaia e ala i le auai o se paeonia lagolago. Afai foi, e te paeonia lagolago i le taimi o le asiasiga a le ovasia matagaluega, o le a tele la ni aogā e te maua mai lana fesoasoani ma lana faalaeiauga i le faiva.
3 E masani lava ona taulau manuia fuafuaga pe a auai faatasi ni vaega o tagata talaʻi o ni paeonia lagolago. E mafai ona faia se faasologa lelei ina ia tofu uma ai le tagata ma se tasi la te galulue faatasi, ma e mafai e tuafāfine o loo iai fanau laiti ona fuafua e fesoasoani le tasi i le isi. Ona o fuafuaga lelei, ua iloa ai e le toatele faapea e lē faigata tele ona ausia le 60 itula manaomia. O lona uiga o le tuutoina atu lea o se tuu faatatau o le na o le 2 itula i le aso pe 15 itula i le vaiaso i le faiva. O nisi paeonia lagolago e molimau atu i se itula e tasi pe lua a o leʻi amataina pe maeʻa foi a latou galuega totogi ma auai mo se taimi umi i le auaunaga i faaiʻuga o vaiaso.
4 E tusa foi pe lē mafai ona e paeonia lagolago, ae atonu e mafai ona e faateleina lau galuega tau le auaunaga i le fanua. O le fesoasoani foi i feoaiga i taavale po o le galulue faatasi ma isi o ē o loo paeonia, o le a avea ai oe o se faalaeiauga ia i latou. Po o le ā lava le mea e mafai ona tatou faia e faailoa atu ai le suafa o Ieova ma ana feutanaiga, o le a lē faagaloina lea e lo tatou Atua sapaitalia.—Mala. 3:16.