Manaomia—100 Paeonia Lagolago

Pe Mafai Ona E Paeonia Lagolago ia Mati? Aperila? Me?

¹ “E 1,000 Tagata Talaʻi e Manaomia” o le ulutala lea o se mataupu na lomia i le lomiga o le Watch Tower o Aperila 1881. Sa iai iina se talosaga mo tane uma ma fafine ua tuuina atu, “o ē ua avatu i ai e le Alii le poto e uiga i Lana upu moni,” ina ia faaaogā so o se taimi e latou te mafaia e tufa atu ai le upu moni o le Tusi Paia. O ē e mafai ona latou tuuina atu atoatoa le ʻafa po o le sili atu foi o lo latou taimi i le galuega a le Alii ua faalaeiauina ina ia tauofo atu e avea ma faievagelia faasauatoa—o teuteu ala ia i paeonia i aso nei.

² E ui lava ina suia taimi talu mai vaitausaga o le 1800, ae o loo tumau pea le mea moni e tasi—o auauna tuuina atu a le Atua e mananao e faaauau pea ona faaaogā le tele o le taimi e mafaia e faasalalau atu ai le tala lelei. O le auauna o ni paeonia lagolago e mafai ai e tagata talaʻi o le faapotopotoga ona faaleleia lo latou uigā a o latou faaaluina ni taimi faaopoopo i le faiva o le Malo.—Kolo. 4:17; 2 Timo. 4:5.

³ Talu mai lava ona amataina, ua olioli ai le faitau selau o afe o uso ma tuafāfine i le avea o ni paeonia lagolago i le lalolagi aoao. O le aasa mo lenei vala o le faiva faapaeonia sa tupu aʻe ai le faatelega i se tumutumuga e 100 paeonia lagolago na ausia i le oganuu a le lālā a Samoa i Sisifo ia Aperila 1989! E mautinoa le iai o le avanoa e toe faatino ai lenei taumafaiga lelei i le 1997.

⁴ E matou te faalaeiauina outou ina ia iai se sini e paeonia lagolago ai i le faagasologa o se tasi o ia masina po o le sili atu foi ia Mati, Aperila, ma Me. Aisea ua faaaofia ai ma Mati? Talu ai o lenei tausaga e paʻū i ai le Faamanatuga o le maliu o Keriso i le Aso Sa, Mati 23. E leai se isi auala e sili atu ona lelei e faaalu ai lo tatou taimi a o lei oo i le Faamanatuga nai lo le auai ma le maelega i le galuega talaʻi o le Malo, lea na faatonu mai lo tatou Alii ma le Faaola, o Iesu Keriso, e fai. Faatasi ai ma se molimau tele e tuuina atu ia Mati, e mafai ai ona tatou valaaulia le toatele o tagata naunau e faatasi ma i tatou i le faamanatuina o le maliu o Keriso. O le a faapitoa foi Mati, ona o le uluai taimi lea, o le a tatou taulimaina ai le tusi fou, o Le Ala e Maua ai le Fiafia i le Aiga. E lē gata i lea, o le masina o Mati e lima ona Aso Toonai ma e lima foi ona Aso Sa, e mafai ai ona faateleina galuega o le faaiuga o le vaiaso i le auaunaga i le fanua. O le mea moni, i le faagasologa o masina o Aperila ma Me, o se faaauauina maelega o taumafaiga i le faiva o le a faatagaina ai i tatou e tuliloa le naunau lea na maua ma amataina ai suesuega fou faale-Tusi Paia i aiga, e faaaogā ai le polosiua O le ā e Manaomia e le Atua Mai ia i Tatou? O le a tatou ufitiaina maeʻaeʻa ai foi la tatou oganuu, ae maise lava i faaiuga o vaiaso, i le tufaina atu o lomiga fou e fetaui mo le taimi nei o Le Olomatamata ma le Ala Mai!

⁵ O Ai ua Agavaa e Paeonia Lagolago?: I le tusi Organized to Accomplish Our Ministry, ua faamatalaina ai i le itulau e 114 e faapea: “Po o ā lava ou tulaga totino, afai ua e papatiso, o loo lelei lou tulaga tauamio, e mafai ona e ausiaina itula manaomia e 60 i se masina i le faiva i le fanua ma ua e talitonu e mafai ona e auauna mo se masina po o le sili atu foi o se paeonia lagolago, o le a fiafia lava toeaina o le faapotopotoga e iloiloina lau tusi talosaga mo lenei faaeaga o le auaunaga.” Pe e mafai ona e faaavanoaina oe mo lenei faaeaga ia Mati? Aperila? Me?

⁶ O le vaega a le ʻau toeaina o le iai lea o se vaaiga mautinoa, faatasi ai ma le lagolago ma le loto atoa e isi uma tagata talaʻi, e mafai ai ona taulau le tali mai i lenei valaaulia mo ni paeonia lagolago e 100. (Epe. 13:7) Ua faalaeiauina ulu uma o aiga ina ia faamautinoa pe toafia nisi o o latou aiga e mafai ona auai atu i muaʻau o paeonia lagolago a o faagasolo se masina po o ni masina foi o fotuai mai.—Sala. 148:12, 13; faatusatusa i le Galuega 21:8, 9.

⁷ Aua neʻi vave ona e manatu ifo faapea o le paeonia lagolago e te lē mafaia ona e te galue faasoloatoa i lau galuega totogi, ona o le faasologa a le aʻoga, ona o avega tauave faaleaiga, po o nisi lava matafaioi faale-Tusi Paia. O nisi atonu e lē faigofie ona fai se vaega; peitai ane, a iai se faamaopoopoga lelei ma le faamanuia a Ieova, e mafai ona latou taulau manuia. (Sala. 37:5; Faata. 16:3) Tau lava ina ia pulea ou tulaga e le faanaunauga fia auai i le auaunaga faapaeonia; ae aua neʻi puleaina e ou tulaga lou faanaunauga fia paeonia. (Faata. 13:19a) O lea la, ona o le malosi o le alofa mo Ieova ma uso a tagata, e toatele ua mafai ona fetuunai a latou faasologa masani o le olaga ina ia faalautele ai la latou faiva i le gasologa o masina. (Luka 10:27, 28) E tele faamanuiaga ua teuina mo i latou o finafinau malosi i le auaunaga o le Malo.—1 Timo. 4:10.

⁸ O mea ua Faataunuuina e le Paeonia Lagolago: O taumafaiga ma le solu atoa ua tuu atu e le toatele o auauna a le Atua ina ia paeonia lagolago ai ua iu i se alaga leotele o viiga ia Ieova. A o faamalosia e nei tagata talaʻi o le Malo i latou lava i le faasalalauina atu o le tala lelei i le toatele o tagata, ua latou matuā vavalalata totino atu ai foi ia Ieova ona ua latou aʻoaʻoina le sili atu ona faalagolago ia te ia mo lona agaga ma lana faamanuia.

⁹ O le iai ia i tatou o ni paeonia lagolago, sauatoa, ma faapito o loo galulue maelega, e fuaina mai ai se agaga e faaolaolaina ai le faapotopotoga. O o latou uiga aasa ua taaʻina ai isi a o latou talatalanoa e uiga i mea na tutupu ia i latou i le fanua. O lenei mea e uunaia ai isi ina ia toe fefulisai o latou lava tulaga i mea e faamuamua ma lo latou malosi e faalautele ai se sao i le galuega e sili ona tāua o le faiva. O se tuafafine sa papatiso ina ua 70 ona tausaga sa vave lava ona amata ona paeonia lagolago i se tulaga faifai pea. Ina ua fesiligia i ni tausaga mulimuli ane i le pogai ua ia matuā faamalosi ai pea i le faiva o se paeonia lagolago i masina uma a o iai i se tulaga matua, sa ia faapea mai e ui lava o le uluai 70 tausaga o lona olaga ua maimau, ae sa lē toe manao o ia e toe faamaimauina se vaega o totoe o lona olaga!

¹⁰ O tagata taitoatasi ua auai i le galuega faapaeonia lagolago ua latou atiina ae atili se tomai i le faiva. Sa taʻutino mai e se tasi molimau talavou e faapea: ‘⁠A o oʻu laititi lava sa masani ona matou ō faatasi ma oʻu mātua i le la galuega talaʻi. E mālie le auaunaga i le fanua. Peitai, na iai le taimi na ponatia ai aʻu i totonu o le aʻoga ona sa ese aʻu mai le isi toatele. Na oo ina avea ma avega mamafa loʻu tautala atu i isi tamaiti aʻoga e uiga i le upu moni. Pe a talaʻi mai lea fale i lea fale, na amata ona ou fefe i le manatu faapea e ma te fetaui nei ma se tasi ou te iloa i le aʻoga. I loʻu tulaga, ou te manatu o le faafitauli o le fefe i tagata. [Faata. 29:25] Ina ua maeʻa aʻu aʻoga, sa ou taumafai loa e paeonia i se tulaga lē tumau. O le iuga, na oo ina matuā tosina ai i le talaʻiga i se tulaga e lei iai lava muamua. Sa ou lē toe vaai i ai o se galuega e mālie, po o se avega mamafa. I le vaai atu i aʻu tagata aʻoga faale-Tusi Paia ua agaigai i luma i le upu moni, sa ou olioli ai i se fiafiaga loloto i le faamaonia e faapea sa lagolago mai le Atua i aʻu taumafaiga.’ O lenei talavou na oo lava ina auauna o se paeonia sauatoa.

¹¹ I se tulaga aogā, pe a toatele ē e auauna o ni paeonia lagolago i le faapotopotoga, e iu ai ina galueaiina maeʻaeʻa ai le oganuu. E mafai e le uso o loo taulimaina le tofiga o oganuu ona fesili atu i paeonia lagolago mo la latou fesoasoani i le galueaiina o oganuu e seāseā faia. O le aveina o se taumafataga o le aoauli ma faaalu ai se aso atoa i le auaunaga o le a faigofie ai ona galulue e oo lava i vaipanoa mamao o le oganuu.

¹² Ia Faia e Toeaina Sauniuniga Mamao: I le gasologa o le tolu masina o sosoo mai, e ao ai ona faia ni faatulagaga e faasolo ai ni ituaiga eseese o molimau atu i taimi eseese o le vaiaso, e aofia ai le aoauli ma le afiafi, ina ia mafai ai e le toatele ona fai so latou sao. E faaopoopo atu i le galuega faifai pea mai lea fale i lea fale, le iai o se taimi mo le molimau atu i ala tetele, i oganuu o pisinisi, ma le asiasi atu i aiga e lei maua atu muamua. O le faia faapea, e fesoasoani atu ai toeaina ia i latou o ē o loo paeonia ina ia auai faatasi ma le faapotopotoga i le auaunaga, i se taimi o le a sili ona talafeagai ma fetaui mo paeonia. E ao ona faailoa manino atu i le faapotopotoga ia faatulagaga uma o le auaunaga i le fanua. E ao ona maopoopo lelei le taulimaina o nofoaga e fetaui i ai mo le auaunaga. E lē gata i lea, e ao ona lava oganuu e faaavanoa ma ia lava mekasini ma ia faia loa ota mo nisi lomiga.

¹³ Ia Fuafua Lau Lava Faasologa Totino o le Auaunaga: Sa faapea mai se tasi uso, o lē sa faatalatū e tali atu i le paeonia lagolago: “E matuā faigofie lava nai lo le mea na ou manatu i ai. E na o le faasologa lelei lava le mea e manaomia.” I tua o lenei faaopoopoga, pe o e vaaia ai ea se faataitaiga o le faasologa a le paeonia lagolago lea o le a aogā mo oe? O le faia o se faasologa mo le sefululima itula i vaiaso taitasi mo le faiva e na o le pau lena o mea e manaomia mai i paeonia lagolago.

¹⁴ Ina ia mafai ona auauna o ni paeonia lagolago, o avā nofofale ma tagata e faigaluega i le aoauli e masani ona mafai ona faatulaga e i latou le taeao mo le auaunaga i le fanua. O tamaiti aʻoga ma ē e faigaluega i le afiafipo e mafai ona latou faaaogaina aoauli i le galuega talaʻi. O ē galulue faasoloatoa i galuega totogi a lē o le ave o se aso mālōlō i le vaiaso po o le faaalu atoatoa o faaiuga o vaiaso i le faiva, e faaopoopo ai i le molimau atu i le afiafi. O le toatele o ē e na o le faaiuga o le vaiaso e ō ai i le auaunaga i le fanua ua latou filifilia masina e lima ona faaiuga o le vaiaso. I lenei tausaga, ua moni ai lena tulaga ia Mati, faapea foi ma Aokuso ma Novema. O le faaaogaina o le faasologa faataitai lea e i le itulau e 6 ua avea o se taiala, e manatunatu i ai ma le faaeteete faatasi ma le tatalo, o le a aogā ai lau faasologa totino o le auaunaga mo lou lava tulaga.

¹⁵ O se tasi aogā o le fuafuaga mo le paeonia lagolago o le mafai lea ona fetuutuunai. E mafai ona e filifilia ni masina o le a e paeonia ai, ma e mafai ona e auauna i le tele e te manao ai. Afai e te manao e paeonia lagolago i se tulaga faaauau ae e te lē mafaia ona faia faapea, pe o e mafaufau ea e auai faavāvā i nisi masina a o faagasolo le tausaga? I le isi itu, o nisi ua mafai ona faaauau pea o ni paeonia lagolago mo se vaitaimi faaumiumi.

¹⁶ O se Auala e Sauniuni ai mo le Paeonia Sauatoa: O le toatele o ē ua iai le agaga faapaeonia e mananao e auauna o ni paeonia sauatoa, ae o loo tau mānatu pe e iai so latou taimi, pe talafeagai ma o latou tulaga, ma pe e mafai foi ona tumau ma le onosai i lea mea. E lē taumate o le toatele o i latou ua avea nei ma paeonia sauatoa sa muai faaaogaina le auaunaga faapaeonia lagolago o se auala e sauniuni ai mo le galuega faataimi atoa. E ala i le faateleina o le faasologa o le paeonia lagolago i le tasi le itula i aso taitasi, po o le aso atoa i vaiaso taitasi, e faafaigofie ai ona faataulauina le faasologa o se paeonia sauatoa. Ina ia vaai pe e te mafaia, aisea e te lē taumafai ai e tuuina atu le 90 itula i le faiva a o faagasolo se masina po o ni masina foi o le paeonia lagolago? I le taimi lava e tasi, o le a e atiina ae ai ni toe asiga ma ni suesuega faale-Tusi Paia, lea o le a fesoasoani ia te oe e olioli ai i se faiva paleni lelei faapaeonia.

¹⁷ O se tasi tuafafine sa olioli i le paeonia lagolago faaauau pea mo le ono tausaga. I lena taimi umi sa iai sona sini e fia ulu atu i le auaunaga faapaeonia sauatoa. Ona o lena tulaga sa ia faataitai ai ona faigaluega i galuega totogi e fa e eseese, ma le faamoemoe e mafai ai ona ia maua le 90 itula manaomia mo paeonia sauatoa. I masina taitasi, na te tusia ai se faasologa a lē tasi pe lua ina ia fuafua ai pe mafai ona ia faia faapea. Ae i le iloiloina o nei faasologa, sa ia lagona ai e na te lē ausia le faiva faasauatoa. Sa faaauau pea ona ia talosaga atu ia Ieova mo lana taitaiga. Ona oo lea i se tasi aso a o ia sauniuni mo le Sauniga o le Auaunaga, sa ia faitauina ai se mataupu i La Tatou Faiva o le Malo o Setema 1991 lea sa faapea mai: “Nai lo le soona faatauaina o itula manaomia, aisea e lē taulai atu ai manatu i le faateleina o avanoa e auai ai i le galuega o le aoaoina? (Ioa. 4:35, 36)” Ua ia taʻua e faapea: “Sa ou faitauina faalima i le faaono lenei fuaiupu, ma sa ou mautinoa ai o le tali lenei mai ia Ieova. I lena lava taimi sa ou faia ai loa se filifiliga e ulu atu i le auaunaga faapaeonia sauatoa.” E ui lava sa lē matuā lelei tele lana faasologa i le galuega totogi faavaitaimi lea sa iai, ae sa naunau o ia e talosaga atu mo le paeonia sauatoa. I se vaiaso mulimuli ane ai sa suia lana faasologa, ma sa ia mauaina ai ni itula talafeagai e galue ai i lana galuega totogi. Sa ia faaiu mai e faapea: “Pe e lē o le aao mafola ea lenei o Ieova?,” ma na ia faaopoopo mai: “Afai e te talosaga atu ia Ieova mo le taitaiga ma e mauaina ai, aua neʻi e sola ese ai—ia taliaina.” Afai o lou faanaunauga moni o le paeonia sauatoa, atonu i le faaiuga o le tolu masina lea o le a paeonia lagolago ai i lenei vaitaimi ia Mati, Aperila, ma Me, o le a faatalitonuina oe e faapea e mafai foi ona e taulau manuia i le faiva faapaeonia sauatoa.

¹⁸ E matou te mautinoa o le a faamanuia e Ieova le maelega ma o le a ia lagolagoina taumafaiga a ona tagata a o latou faalauiloa atu le tala lelei o le faaolataga, i le faagasologa o lenei vaitaimi o le tauosoosoga o le galuega faapitoa. (Isa. 52:7; Roma 10:15) Pe o le a e tali atu ea i le valaau mo ni paeonia lagolago e 100 e auai ia Mati? Aperila? Me?

[Pusa i le itulau 3]

Le Auala e Taulau Manuia ai o se Paeonia Lagolago

■ Ia iai se vaaiga mautinoa i ou faamoemoega

■ Tatalo ia Ieova ia faamanuia i au taumafaiga

■ Ia valaaulia se isi tagata talaʻi e paeonia faatasi ma oe

■ Ia fuafua se faasologa talafeagai lelei o le auaunaga

■ Ota ia lava mekasini

■ Ia lagolago i faatulagaga a le faapotopotoga mo le auaunaga

■ Ia tulimatai avanoa e molimau atu ai lē fuafuaina