Paeonia—O se Faailoaga o le Alofa
1 O le alofa mo Ieova ma o tatou uso a tagata na te uunaia i tatou ina ia auai atoatoa atili i le galuega talaʻi. A o tuputupu aʻe lo tatou alofa mo Ieova ma tagata, o le a faagaeeina ai i tatou ina ia fuafua mo se sao e sili atu i le faiva. O le a faatuputeleina ai lo tatou alofa a o faateleina lo tatou “iloa lelei” o le Afioga a le Atua. (Fili. 1:9, 10) O le tele o lo tatou iloa e uiga i le finagalo o Ieova, o le tele foi lea o lo tatou talisapaia o le faanatinati o le taimi ua tatou ola ai. O le auala lea e faamalosia ai lo tatou manatu mo isi. Ua faaalia e le toatele lo latou manatu alofa e ala i le auai i le auaunaga faapaeonia.
2 Pe e mafai ona e faia ni fetuutuunaiga tatau ina ia avea ai ma paeonia lagolago po o se paeonia sauatoa? Ioe, e lē o i tatou uma e mafai ona paeonia. Ae e ao ia i tatou taitoatasi ona iloiloina ona tulaga faatasi ma le tatalo.
3 E toaitiiti lava Kerisiano ua latou iloa e lē tele so latou taimi avanoa e paeonia ai; o le mea lea, e tatau ai ona ‘faaaogā tatau taimi avanoa’ mai mea e lē tatau na o loo faaaluina ai nei o tatou taimi. (Efe. 5:15-17) E ao i lo tatou alofa mo le Atua ma tagata ona uunaia ai i tatou ina ia naunau e faataulagaina nisi o o tatou faanaunauga totino ma mea lelei ina ia faaalia atoatoa atili ai lo tatou alofa. (Mare. 12:33) O le tele o mea ua tatou maua, ma mea ua masani ai, atonu e manatu i ai o ni mea faamāumau tupe i isi vaega o le lalolagi.
4 O le ā e mafai ona faia e mātua ina ia fesoasoani ai i a latou fanau e manatunatu i lenei auala mai le Atua? E ao i mātua ona faataatitia ni sini faaleatua mo a latou fanau mai o latou uluai tausaga. A o latalata ina faauuina i latou mai le aʻoga, pe o latou mafaufau ea i ni sini faalelalolagi po o ni sini faaleagaga? Tatou te mananao e fesoasoani i o tatou tagata talavou e iloa aogā e faavavau e maua mai i le ulu atu i le auaunaga faapaeonia i uluai tausaga. O le auala lena e teuina ai ʻoa mo le lagi. (Mata. 6:19-21) E faafiafiaina ai le Atua ma e faamaonia ai foi lo tatou faamaoni ma le tuutoina atu ia te ia. Ma e faasaoina ai foi ola o isi.
5 E finagalo le Atua ina ‘ia faaolaina ituaiga uma lava o tagata.’ (1 Timo. 2:4) Pe e mafai ea ona tatou faaalia faapea o le mea foi lea tatou te loto i ai? Tatou te mafaia, pe afai tatou te naunau e faamuamua manaoga o le Malo. E mafai foi ona tatou faia lenei mea e ala i le mautinoa, o le a saunia e Ieova mea e manaomia mo le olaga. (Mata. 6:31-33) Atonu o le a faasolo ina leaga tele tulaga tau tamaoaiga, peitai, e lē taitai ona suia le folafolaga a Ieova, na te tausia i tatou.—Sala. 37:25.
6 O le pulunaunauina o i tatou lava ina ia auai i le faiva i le fanua, i le tele e faatagaina ai e o tatou aiaiga, o se faailoaga lea o le alofa. Mo nisi, o le a iʻu lenei i le avea ma paeonia sauatoa. Aiseā e lē amata ai ia Setema 1, 1992, e outou uma e mafai ona auai?