Pe Mafai ea ona E Auauna ia Ieova i le Avea ma Paeonia?

¹ I le Tauaofiaga Itumalo i le tausaga ua mavae “O Ē Faasusulu atu le Malamalama,” na fesili ai se failauga e faapea: “E mafai ea ona e paeonia? Po o le a e paeonia ea?” Sa ia iloa le aogā o le fesiligia o nei fesili auā ua matuā lalata mai Amaketo, ma o lenei mea ua sili atu ai ona faanatinati le galuega talaʻi i se tulaga sa leʻi faapea muamua.—1 Kori. 7:29a.

² E lē fesiligia le faigata o le galuega paeonia. E manaomia ai lou puleaina o oe lava ma le maopoopo lelei. Peitai, o lo tatou tautigā i le faiva “e le se mea faaleaoga.” (1 Kori. 15:58) Pe e mafai ona fai atu foi faapena i isi gaoioiga atonu tatou te filifilia e tuliloaina ma faaalu ai lo tatou taimi ma le malosi? O le alofa mo Ieova ua uunaia ai Kerisiano ina ia maelega i lana auaunaga, ma o le maelega mo le auaunaga a Ieova ua taʻitaʻiina ai le toatele e ulu atu i le galuega faapaeonia.—1 Ioane 5:3; Faaa. 4:11.

³ O le toatele o auauna talavou a Ieova ia faatoʻā uma a latou aʻoaʻoga maualuluga, ua mafaufau mamafa i le avea ma paeonia. Ua matuā alagātatau lea. O le ā se isi galuega e sili atu ona tāua na i lo o le faiva faataimi atoa? (Mata. 6:33) E tatau ona talaʻiina le tala lelei o le Malo o le Atua; o le galuega lenei a Ieova, ma maeu se faaeaga o le matuā faaaafia i ai mai lava i le taimi e talavou ai se tagata ma agaʻi atu ai!—Mata. 24:14.

⁴ Po o faalaeiauina ea e outou mātua a outou fanau ina ia auai i le auaunaga faataimi atoa? Po o malamalama lelei lau fanau faapea o loo e manao ia i latou ina ia faaaogā o latou loto atoa, o latou agaga, o latou mafaufau, ma o latou malosi atoa i lenei galuega e sili ona aogā? (Mare. 12:30) E toatele tagata talaʻi talavou ua latou saunia i latou lava mo le galuega paeonia sauatoa e ala i le auai o ni paeonia lagolago i so o se avanoa a o latou iai pea i aʻoaʻoga. E mautinoa o se tuutoina faapena ia Ieova e faafiafiaina ai lona finagalo!—Faata. 27:11.

⁵ O le mea moni, e lē o tagata uma e iai ni avanoa e mafai ai ona auauna faapaeonia. Ae peitai, pe faaipoipo pe nofofua, matua pe laitiiti i tausaga, po ua e manatunatu ea faatasi ma le tatalo ia auauna atu ia Ieova i le avea o se faifeau paeonia o le tala lelei? (Kolo. 3:23) E toatele ulugalii faaipoipo talavou o loo galulue ina ia faalauteleina la latou faiva ina ia mafai ai e le toatasi po o i laua uma ona paeonia.

⁶ Afai e lē o mafai ona e paeonia sauatoa i le taimi nei, e mafai ea la ona e avea ma paeonia lagolago? Atonu o le toatele o tagata talaʻi i lau faapotopotoga o loo fuafua e faia faapea ia Aperila. E mafai ea ona e aufaatasi ma i latou? E ui lava o loo maua e auauna faamaoni uma a Ieova le tele o faamanuiaga, ae e iai faamanuiaga faaopoopo o loo faatalitalia mai mo i latou o loo i se tulaga e faaalu le taimi e sili atu i le auaunaga o le Malo i le sailia o ē pei ni mamoe.—Galu. 20:35.