Galulue ma le Uigā i Lea Fale ma Lea Fale
1 O loo talaʻiina atu le “tala lelei” i le lalolagi atoa i aso nei. (Mata. 24:14) Ua faaautū ona faataunuuina lenei galuega e ala i le faiva i lea fale ma lea fale.—Galu. 20:20, 21.
2 E tatau ona iai se uiga moni o a tatou taulimaga i tagata tatou te feiloai. Auā e eseese mea e naunau i ai tane, fafine, atoa ma talavou. O lea, o se mea lelei le sauniuni o ni mataupu eseese faale-Tusi Paia e ono mafai ona tosina i ai tagata i la tatou oganuu.
3 Faaaogā Tatau Lomiga: O loo talanoaina e le tusi o le Ola e Faavavau, le anoanoai o mataupu e ao ona tosina ane i ai le toatele o tagata i so o se mea. O faataʻitaʻiga ua aumaia i ata ma upu, o ni fesoasoani uigā ia. E gausia ai loto i le tusi, ma e fesoasoani ai i tagata ina ia iloa le manaoga o le faia o ni faaiʻuga, ioe, ina ia suia ai o latou talitonuga, amio, uiga, ma le ala o loo ola ai. I le masani atoatoa ma mataupu o iai i le tusi Ola e Faavavau, o le a mafai ai ona talatalanoa ma le uigā ma tagata, i le anoanoai o mataupu eseese. O le a fesoasoani lenei ia i tatou ina ia iloa ai le tele o le naunau o lē ona le fale.
4 Ina ia uigā i le faiva, e manaomia ona tatou faaalia atu le naunau totino. (Fili. 2:4) Ia taumafai e tataʻi le talanoaga i se mataupu o le Malo, e aafia ai le tagata ma ona manaoga. Saili ina ia malamalama i manatu o le tagata, e ala i le faia o fesili talafeagai e masua mai ai i fafo. Ia faalogologo ma le lē gasē i ana tali. Atonu o le a fesoasoani ana faamatalaga ia te oe, e te iloa ai se mataupu o le a ia naunau i ai. Tatou te mananao e fesoasoani atu i tagata, ina ia iloa le tāua o le feau o le Malo ma faaali atu ia te i latou le auala e aʻoaʻo atili ai. Na faamatala mai e se tasi ulugalii e faapea, na la taliaina se suesuega faale-Tusi Paia, ona sa faailoa atu e le uso o lē na asiasi atu ia te i laua, le naunau totino faamaoni ia te i laua.
5 I Oganuu e Galueaiina Soo: E faapitoa lava le tāua o le atiina aʻe o le uigā i oganuu e galueaiina soo. O le a fesoasoani ia i tatou se faiva e sili atu ona uigā, ina ia faalautele atu ai la tatou oganuu. (w-SM 1/15/90 itu. 15-20) Na i lo o le gaoioi e pei lava tatou te leʻi asiasi muamua atu i lena aiga, e mafai ona tatou manatuaina uiga o lē ona le fale i le taimi ua mavae, ona faaaogā lea tatou te talanoa atu ai. E mafai ona tatou tulitataoina la tatou asiasiga faatoʻā mavae atu, ma faaauau ai i mea sa talanoaina i lena taimi. E mafai ona fetuutuunai i manaoga o la tatou oganuu, taulimaga sa fautuaina i lomiga ua tuanai atu o La Tatou Faiva o le Malo, atoa ma le tusi Reasoning.
6 O loo tatalaina pea ma le onosai e Ieova le faitotoa mo nisi tagata e sili atu ina ia mauaina aogā mai faamanuiaga o le Malo. Sa uigā le faiva a Iesu ona o lona alofa mo tagata. (Mare. 6:34) Po o tatou faia ea le mea silisili tatou te mafaia e mulimuli ai i lana faaaʻoaʻoga. (1 Pete. 2:21) Tau lava ina ia aua neʻi taofia i tatou mai le auai atoatoa ma le uigā i le faiva i lea fale ma lea fale.—2 Timo. 4:5.