Taulimaina o le Tala Lelei—Faatasi ma Mekasini i Oganuu ua Ufitia Soo
1 Ua tatou faitau i le Galuega 8:25 e faapea sa avatu e Peteru ma Ioane se molimau maeʻaeʻa i Samaria ma mulimuli ane ai ua folafola atu “le tala lelei i aai e tele.” I aso nei, e ao foi ona tatou tinoū e ufitia le oganuu ua tofia mai i la tatou faapotopotoga ina ia avatu ai se molimau maeʻaeʻa.
2 Ona o le faatupulaʻia saosaoa o tagata talaʻi, ua tele ai nei faapotopotoga ua fai si ufitiaina soo o la latou oganuu. A o atonu sa faaleogalua la tatou uluai tali atu i le galueaiina soo o oganuu, ae lē o le tulaga lenei e tatau ona iai. Ua maua pea i lomiga taitasi o Le Olomatamata ma le Awake!, mataupu fou ma le faaoso naunau e mafai ona tatou fetufaaʻi ai ma tagata i la tatou oganuu. Talu ai foi, ona ua tatou ufitiaina soo la tatou oganuu, ua tatou maua ai la se avanoa e faaaluina ai se taimi faaopoopo i fale taitasi.
TALANOA MA TAGATA
3 Ua faaaogāina ni nai taulimaga pupuu lava o mekasini ina ia ufitia uma ai a tatou oganuu ma faalauteleina ai le tufatufaina atu o mekasini. Peitai, e tatau faapitoa lava i tagata talaʻi o loo galulue i oganuu ua ufitia soo ona faaaluina atili le taimi e talanoa ai ma tagata o aiga. E mafai foi e tamaiti laiti ona faaopoopo atili atu i mea sa latou naunau i ai mai se mataupu. O le ā faapefea ona faataulauina lenei mea? E matuā tāua lava ona faamasani lelei ma mataupu i mekasini. E manaomia ai e lenei mea le taimi ma le muai manatunatu. A e faitau i mekasini, ia faamautinoa po o le ā o le a tosina i ai tagata i lau oganuu. Ona mulimuli ane lea, a o e leʻi alu i le auaunaga, toe tagai i mekasini ma ilo mai ai ni mataupu o le a e faatomuaina. Manatunatu po o le ā le mataupu o le a e faatomuaina pe a fetaiai ma tulaga eseese i aiga. Faaaogā se tasi o mataupu lelei i se mekasini e fai ma manatu e taulaʻi i ai lau faatomuaga. Ia faatosina mai manatu o lē ona le fale i se talanoaga faaleuo. E mafai ona ofo le mekasini i mea e faaalia ai le naunau.
4 Ona o loo tatou ofoina atu lomiga e aunoa ma se totogi, o loo iai la se manaoga ina ia matuā faautauta i le faaaogāina o a tatou lomiga. O le faaaluina o le taimi e talanoa ai, e mafai ona fesoasoani ai ia i tatou e faamautinoa pe faamata e naunau moni lava le tagata. I lenei auala, o le a faaitiitia ai lo tatou tuua o mekasini i tagata o ē e lē faaaluina le taimi e faitauina ai. O lea e mafai ai ona tatou faaaogā ma le atamai a tatou lomiga.
TEU I MANATU LA TATOU FUAFUAGA
5 O la tatou fuafuaga i le ō atu i lea fale ma lea fale, e lē ina ia iloa po o le ā le tele o mekasini ma tusi e mafai ona tatou tufatufaina atu. O lo tatou faanaunauga o le fesoasoani lea i isi ina ia maua le poto saʻo o le upu moni. Sa taʻu atu e Peteru ma Ioane le afioga a Ieova i tagata Samaria i se auala maeʻaeʻa, ma e faapena foi ona tatou mananao e faaaluina le taimi tatau ina ia vaai po ua avatu i tagata i la tatou oganuu se avanoa e tali mai ai i le upu moni.
6 I le faaaogāina ma le uigā o mekasini o se faavae mo a tatou talanoaga, e mafai ai ona tatou faataulauina lenei fuafuaga. E ao ona tatou tatalo mo i tatou lava ma isi ina ia mafai ona foaiina mai ia i tatou le ‘tomai e tautala ai...ina ia faailoa atu le mea lilo paia o le tala lelei, . . . ma le faamalosi.’—Efe. 6:18-20.