Faafetaiaia le Luʻi o le Faiva i Lea Fale ma Lea Fale

¹ O le alu atu i lea fale ma lea fale, ma le toe asia o tagata ese, o se matuā luʻi lava i le toatele o ē o loo auai i le tapuaiga mamā. Peitai, o le alofa moni ia Ieova e fesoasoani lea i se tagata e faafetaiaia lenei luʻi, ma ua oo lava i ē o lo latou lava uiga masani o le matamuli, ua agaʻigaʻi i luma i le tulaga o le avea ma tagata talaʻi faataimi atoa o le tala lelei.

² Ua manino mai i le Tusi Paia le faia o se sao o uluai Kerisiano i le tala lelei o le Malo o le Atua, e ala i le ō atu i lea fale ma lea fale. (Galu. 5:42; 20:20, 21) Ona o i tatou o ni Kerisiano i lenei 20 senituri, ua tatou saosaolaumea ai foi i lenei galuega. O lo tatou alofa mo le Atua ma o tatou tuaoi, ua uunaia ai i tatou e faia lenei galuega e ui ina atonu tatou te fetaiai ma ni tulaga lē fiafia, le ita mai, le manatu faatauvaa, po o ni teteega tuusaʻo.

³ Le Mea ua Faataunuuina i le Faafetaiaia o le Luʻi: I a tatou asiasiga uma, tatou te taumafai ai ina ia lūlū atu ni nai fatu o le upu moni, ma le faamoemoe e mulimuli ane ona iʻu lea i le fua mai ai o fua o le Malo. (Fai. 11:6) E fesuisuiai tulaga o tagata taitoatasi. Atonu e tupu se mea e ono toe manatunatu ai lē e ona le fale i se mea na taʻu atu i ai e se tasi o i tatou, ma atonu o le a sili atu ai loa ona ia talilelei mai i se isi taimi.

⁴ O la tatou faiva i lea fale ma lea fale ua faaava atu ai ia i latou o ē o loo naunau i le upu moni ma le amiotonu, le avanoa ina ia iloa ai Ieova ma ana fuafuaga, ma amata ai ona latou ula le ala i le ola e faavavau. O i latou o loo sailia fiafiaga a le lalolagi ua lapataia ma le alofa e faapea, e manaomia ona latou faia ni suiga ina ia mafai ai ona olioli i le faamaoniga a Ieova. O le faiva foi lenei ua faalauiloa atu ai le suafa o Ieova, ma avatu ai le viiga ia te ia, e tusa lava pe faalogo mai ē ona fale pe leai.—Eseki. 3:11.

⁵ O le galue i le faiva e fesoasoani lea ia i tatou ina ia atiina aʻe fua o le agaga, e pei o le alofa lē manatu faapito, le olioli, le filemu, ma le onosai. (Kala. 5:22) Ua fesoasoani lea ia i tatou ina ia loto maulalo ma tiga alofa, ona e aofia ai le faia o mea lelei mo isi. O le tele pea o mea e fai i le galuega a Ieova ua avea o so tatou puipuiga mai le lalolagi.—1 Kori. 15:58.

⁶ O Fesoasoani e Faafetaiaia ai le Luʻi: E manaomia ona iloa e ē fou le auala e saosaolaumea ai i lenei galuega e sili ona fiafia. E masani ona lē lava lo latou mautinoa, ma atonu e lotovaivai ona o le manatu e alu atu i lea fale ma lea fale. E mafai ona tatou talanoaina ma i latou teteega masani ma ni a tatou tali e avatu i ai. E mafai ona tatou faataʻitaʻia le faaaogāina o nisi o fautuaga lelei na o loo aumai i le tusi Reasoning e tali atu ai i ni mea e ono taofia ai se talanoaga. Aiseā e te lē ofo atu ai e fesoasoani i a latou sauniuniga mo le faiva i le fanua? Latou te maua foi ni fesoasoani se tele i le auai e lē aunoa i faatasiga mo le auaunaga i le fanua ma galulue ai ma tagata talaʻi ua sili atu lo latou poto masani. O le galulue faatasi ma se vaega e matuā faalaeiauina ai lava.

⁷ A o tatou ō atu mai lea fale i lea fale, ua faaeaina ai i tatou e fai ma sui o lo tatou Atua, o Ieova. O le ā se faaeaga e sili atu, e mafai ona maua e se tasi na i lo o le avea moni ma sē e faigaluega faatasi ma le Atua? (1 Kori. 3:9) Afai tatou te faalagolago ia te ia, o le a fesoasoani mai la lona agaga ia i tatou ina ia faafetaiaia le luʻi o le faiva i lea fale ma lea fale.—2 Kori. 3:5.