Ni Toe Asiga e Faafaigofie ma e Aogā
1 Po o e faia e lē aunoa ni toe asiga, po o masani ea ona faafaigata ia te oe, ona o lou lē iloa o sau tala e fai atu? E leai se mafuaaga e te popole ai fua. E tolu ni mea o le a fesoasoani ia te oe ina ia taulau ai: (1) o sauniuniga lelei; (2) le tomai e talanoaina ai ni manatu tāua e tasi pe lua i ni mataupu faigofie o le Tusi Paia; ma le (3) le naunautai e faalogologo atu i le manatu faaalia o lē ona le fale.
2 A o sauniuni mo le faia o le toe asiga, ia manatunatu po o le ā se mataupu e talafeagai ona talatalanoa i ai ma lē ona le fale. Po o ia ea o se tagata aʻoga? O le toatele o tagata aʻoga o le a iai ni o latou taimi avanoa e talatalanoa ai i mataupu o le Tusi Paia i lenei masina, a o latou olioli i se malōlōga mai a latou aʻoaʻoga. Atonu o le a e maua ai nisi e mafai ona faalogo mai i le feau o le Malo. Pe sa e lāgā se fesili i le faaiʻuga o lau asiasiga ua teʻa atu, pe sa faaalia foi e lē ona le fale se naunau i se mataupu patino? Ia toe autalu au faamaumauga, ma faaaogā le tusi Reasoning e maua mai ai faamatalaga o le a e manao e fai atu ina ia matuā aogā ai le toe asiga. A o e toe asiasi atu, ia e mafana ma faaleuō. Ia faafeiloai atu lē ona le fale i le taʻu atu o lona suafa.
3 Afai sa e tuuina i lē ona le fale Le Olomatamata ma le Awake!, e mafai la ona faavae lau toe asiga i ni manatu tāua faigofie e tasi pe lua ua e filifilia mai i se mekasini. Afai sa e tuuina i ai se sāvali i lau uluai asiasiga, e mafai la ona e fai atu se faamatalaga, a lē i le sāvali po o le toe sosoo atu o le ofo lea, e ala i le faasino atu i se manatu talafeagai i se mekasini po o se polosiua.
4 Afai sa e ofoina atu le “Olaga i se Lalolagi Fou Filemu,” ia tau lava ina e faapea atu:
◼ “I laʻu asiasiga lea na teʻa atu nei, sa ta talanoa ai i le folafolaga a le Atua e faatatau i se lalolagi fou filemu. E pei ona ta talanoaina, o le a oo mai tulaga e sili atu ona lelei e ala mai i le Malo o le Atua. O le ā sou manatu, o le ā e manaomia ona tatou faia ina ia avea ai ma vaega o lena lalolagi fou filemu?” Faataga se avanoa e tali mai ai lē ona le fale, ona lua talanoa faatasi lea i le manatu o loo i le Salamo 37:9, 11, 29.
5 Afai sa e ofoina “O le ā le Faamoemoe mo Ē Pele ua Maliliu?,” o nisi nei o manatu atonu e mafai ona amata ai se talanoaga:
◼ “I le iʻuga o la ta talanoaga talu ai, sa ou tuu ai ia te oe se sāvali ua faaulutalaina O le ā le Faamoemoe mo Ē Pele ua Maliliu? O loo faatutū mai i le palakalafa lona tolu nisi o fesili tāua: ‘Aiseā ua oti ai tagata? O fea o iai ē ua oti? Ma e mafai faapefea ona tatou mautinoa e mafai ona latou toe ola mai?’ I le tamai ulutala o loo sosoo ane ai, ua faaulutalaina, ‘Maliu, ma le Mea e Tupu pe a Tatou Oti,’ o loo taliina ai fesili taitasi. O lea o loo iai le isi aʻu kopi o le sāvali i inei. Mātau mai foi le mea o loo taʻua ai i le palakalafa lona fa.” Ma a o mulimuli mai i le talanoaga lē ona le fale, ia faitau le palakalafa, e aofia ai ma le faitauina o mau e lua, ma ia fesili atu i lē ona le fale po o le ā sona manatu. Ia faalogologo atu ma le faaeteete po o le ā o le a ia fai mai ai, ona fai faatatau atu foi lea i ai o lau faamatalaga.
6 A o faagasolo le talanoaga, atonu e faaali mai e lē ona le fale ni manatu e lē saʻo. E lē talafeagai la lou finau atu i manatu uma na te taʻu maia. Ae na i lo o lea, ia pipii atu pea i le mataupu o loo talanoaina. So o sona manatu lava e lē faale-Tusi Paia e mafai ona faasaʻo i nisi toe asiasiga i le lumanai.
7 Ia matuā fuafua loa ina ia tulitatao so o se naunau, e ala lea i le faia o ni toe asiga e faafaigofie ma uigā, ia Aperila.