Auai ma le Manuia i La Tatou Faiva Faasaoola
1 Na fesuisuiai e le aposetolo o Paulo lana taulimaga o le tala lelei ina “ia iu lava ina ola nisi” ia te ia. (1 Kori. 9:19-23) O le a faapena foi ona sili atu le faamanuiaina o la tatou faiva, pe afai tatou te mataala e mātau manaoga o lē ona le fale, ma ia nofo sauni e faafetaui atu la tatou talanoaga ina ia tusa ma ona manaoga. E lē tatau ona faigata lenei itu pe a ofoina atu Le Olomatamata ma le Awake! po o so o sa tatou polosiua.
2 Pe a uma ona faailoa atu oe, atonu o le a e amata i lou faapea atu i au lava upu:
◼ “E toatele tagata ua lē mautonu ona e foliga mai e leai se tomai o faiga malo a le lalolagi e saunia ai ni vaifofo aogā i faafitauli o o tatou aso. Ua tuuaʻia foi e nisi tagata faiga malo mo o latou faafitauli. Pe e te manatu ea e iai se faiga malo e mafai ona matuā tausia lelei o tatou manaoga uma lava? [Faataga mo le tali.] Pe e te silafia ea ua ia i tatou se folafolaga mautinoa o se faiga malo o le a aveesea aʻiaʻi faafitauli uma o loo tatou fesagaʻi?” Ia faalogo lelei i le tali a lē ona le fale. Ia nofo sauni e sui i se taulimaga mai le tele o taulimaga eseese, e fuafua i lana faamatalaga o le a fai mai.
3 Afai e tau iloa atu i faamatalaga a lē e ona le fale e faapea o ia o se Kerisiano, e mafai la ona tatou fesili atu i ai po o ia tatalo i le Tatalo a le Alii. Afai e maumauai lana tali mai, e mafai ona tatou toe faaleo atu i ai le tatalo faaaʻoaʻo seia oo i le vaega lea e faapea mai ai, “Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:9,10) E faamaonia ai e faapea, e iai se aso o le a faataunuu ai i le lalolagi le finagalo o Ieova. Ona mafai loa lea ona faasino atu i se mataupu talafeagai mai Le Olomatamata po o le Awake! mo nisi faamatalaga, po o se polosiua foi o loo faamatala mai ai lenei manatu, e pei o le itulau e 3 O le Malo O le a na Aumaia Le Parataiso.
4 Afai e faamaonia mai e lē faatuatua i le Atua lē ona le fale, e mafai ona e faasino atu i le Eperu 3:4 ona suʻe lea i le itulau e 4 o le polosiua Po o Silasila Alofa mai ea le Atua ia i Tatou? Ia faitau palakalafa 1 ma le 2 ma fai atu i ai le fesili o loo tusia i le pito i lalo o le itulau. E mafai foi ona e faaopoopo atu i ai ma se mataupu talafeagai mai se mekasini fou.
5 Afai e foliga mai o loo faamalieina lē e ona le fale i lona tulaga o le olaga, e mafai ona e lāgā le fesili:
◼“Aiseā e ao ai ona tatou manatunatu mamafa i upu a le Tusi Paia e faatatau i le lumanai o se faiga malo?” Ona tatou faaaogā lea o le faamatalaga o loo i le tusi Reasoning i itulau e 154 ma le 155, ma faamatala puupuu atu i ai se mafuaaga e tasi pe sili atu mai mafuaaga e valu o loo iai. Afai e faaalia e lē ona le fale se naunau fiafia, ia faaaogā le sāvali Po o le a Faasaoina ea Lenei Lalolagi?, e amata i le uluai palakalafa i le itulau e 2, ina ia faaauau atili ai le talanoaga.
6 O le a lē faamanuiaina atoatoa lau uluai asiasiga pe afai e te lē faaosofiaina le naunau o lē ona le fale mo se isi asiasiga. O lea la, ia mautinoa ua fai atu se fesili faaoso naunau ma folafola atu i ai o le a taliina pe a e toe foi atu.
7 Ia e filifili mai i lenei mataupu ni faaupuga e te lagona ua e toʻa lelei e fai atu. Ia fetuutuunai nei manatu ina ia talafeagai ma lau oganuu. Ia e faamasani i mataupu o polosiua, mataupu o sāvali, ma mataupu o mekasini na o le a e faaaogā, ina ia vave ai ona e faafetaui atu lau talanoaga i manaoga o lē ona le fale. Seʻi o tatou sauniunia uma ma le atamai a tatou taulimaga “ona o le tala lelei” ma tatou auai ai ma le manuia i lenei faiva faasaoola.—1 Kori. 9:23.