Taulimaina o le Tala Lelei—Ma le Faautauta
1 Sa faamamafa e le aposetolo o Paulo le manaoga ia faaaogā le faautauta i le taulimaina o le tala lelei i tagata e eseese talitonuga ma talaaga. I o tatou aso, o nisi tagata e tautino mai e lolotu, a o isi e lē fia gauai i mea faaleagaga ma e lē talisapaia aogā faaleagaga. Ona o tagata talaʻi o le tala lelei, e ao ona tatou taumafai e faamataaʻi “tagata uma” i le feau o le Malo i le faaaogāina o le faautauta i le faiva.—1 Kori. 9:19-23.
MALAMALAMA I LĒ ONA LE FALE
2 O le faatatauga faatino o le faautauta i le auaunaga i le fanua e aofia ai le tomai e fetuutuunai a tatou taulimaga i faanaunauga o lē ona le fale. E manaomia e lenei se sauniuniga lelei. I le faamasani atoatoa ma le tele o mataupu matalasi ua iloiloina i tusi ma mekasini o loo maua, e mafai ai e se tagata talaʻi ona sauni e taulima le tala lelei ma le matalasi o manatu e talanoa ai. A o tatou talanoa i ē matutua, talavou, ulu o aiga, avā tausi aiga, fafine i fale faigaluega, ma isi, e manaomia ona tatou taea o latou aiaiga totino ma faaaogā le faautauta e filifilia ai mataupu e taulimaina.
3 A o e faalatalata atu i lē ona le fale, ia mataalia i siomaga. Atonu e mafai ona e utagia o lē ona le fale o se matua, e patino i sea talaaga faalelotu, e naunau i le tausia o lona aiga, atoa ma isi. Faatasi ma ia faamatalaga, e mafai ai ona fetuutuunai lau faatomuaga ia fetaui ma aiaiga ma faanaunauga o lē ona le fale. E ala i fesili faaeteete, uta mamao ma le faalogologo ma le lē gasē i le faamatalaga a le tagata, atonu e te utagia ai lona talitonuga ma faalogona ona filifilia ai lea o le auala e sili ona lelei e faaauau ai lau taulimaga.
FAI FAATATAU LAU TAULIMAGA
4 Afai e te mātauina mea taʻalo po o tamaiti i lou taunuu atu i le fale, atonu e te amataina le Mataupu o Talanoaga o i ai nei e faapea: “O loo matou talanoa ma mātua i lenei vaiaai e faatatau i le faigata ona saunia o taʻiala mo a latou fanau, ona o le taatele o le faamasinolētonu i aso nei. Pe ua e mātauina se faafitauli e aofia i nei itu?” Faalogo i le tali a lē ona le fale. Afai e faaalia i le tali faapea e iai se lotu a lē ona le fale, e mafai ona e faaauau: “O se mea fiafia ona ua folasia e le Tusi Paia faapea o le a faia e le Atua se mea e uiga i le faamasinolētonu. Ua na aumaia foi taʻiala i mataupu silisili saʻo. Matau lenei mataupu i Le Olomatamata.” Faailoa le mataupu i le itulau e 21 o le lomiga o Fepuari 15, 1990, ma faasino atu mau i le palakalafa 5 e faatatau i le faamasinotonu a le Atua. E mafai ona e faapea atu: “Ona e faamasinotonu le Atua, aiseā o le a ia faataga ai le faamasinolētonu e faaauau, ma pe ua latalata ona ia faia iai o se mea? Faamata na te tauia aʻu pe afai ou te faatino le faamasinotonu? A o e faitauina lenei mataupu ma isi i Le Olomatamata, o le a e maua ai mo oe ma lau fanau tali faamalie loto i na fesili.” Ofo le tusiga mo le $10.00 (US$5.00).
5 Afai e faaalia i le tali a lē ona le fale faapea e lē aogā ia te ia le fautuaga a le Tusi Paia, e mafai ona e folasia le faautauta i le fesuiaia o lau taulimaga ma faapea atu: “Faamata e te amanaia pe a ou siligia pe aiseā ua e oo ai i lena faaiʻuga?” A maeʻa ona faalogologo i le tali mai, atonu e te faaauau: “Ua ou malamalama i le pogai ua e manatu ai faapea. O le mea moni, talu ai nei na ou faitauina ai se mea i lenei lomiga o Le Olomatamata ou te mautinoa o le a e fiafia i ai.” Sue i le itulau e 4 o le lomiga o Mati 1, 1990, ma faitau palakalafa 1 ma le 2. Faitau foi, le palakalafa 5 i le itulau e 6. Faitau le Mataio 7:12 lena e faataatia ai e Iesu le Tulafono faaʻAuro. Ona ofo lea o le tusiga o Le Olomatamata mo $10.00 (US$5.00) mo le tausaga e tasi.
6 A o tatou sauniuni lelei ma faaalia le faautauta i le auaunaga a Ieova, o le a mafai ona tatou fai atu e pei ona faia e le aposetolo o Paulo, “ua avea aʻu ma mea uma mo tagata uma, ina ia iu lava ina ola nisi ia te au.”—1 Kori. 9:22; Faata. 19:8.