Pusa Fesili

◼ O ā laei e manatu i ai ua talafeagai ona laei ai se tasi mo le papatisoga?

E ui lava ina eseese tulaga o laei i vaega eseese o le lalolagi, ae ua tumau pea le lapataiga a le Tusi Paia mo Kerisiano uma, ina ia laei ‘ia onomea ma ia faautauta’ e tusa lava po o fea o loo latou nonofo ai. (1 Timo. 2:9) E ao ona faatatauina lenei mataupu silisili pe a manatunatu i laei e talafeagai mo le papatisoga.

I le Watchtower o Iuni 1, 1985, i le itulau e 30, ua aumaia ai lenei fautuaga mo se tagata o le a papatiso: “Ua mautinoa e ao ona faaali atu le onomea i le ituaiga o ofutaele e faaaogā. Ua tāua lea tulaga i aso nei, a o foliga mai ua mananao ē o loo fuafuaina ituaiga o laei, ina ia faaaliali atu i le lautele faiga faaleituaiga, ma oo i le tulaga o le toetoe lava telenoa. O le isi vala e ao ona mafaufauina e faapea, o nisi ofutaele e foliga mai e onomea a o mago, ae ua lē o lena le tulaga pe a oo ina susū. E leai se isi e papatiso o le a manao e avea o ia ma pogai o le tuumuli ese po o le tausuai i se sauniga uigā e pei o le papatisoga.—Filipi 1:10.”

I le ōgatasi ma lenei fautuaga, o le a mananao ai i latou o le a papatiso ina ia oofu i lavalava e onomea, ma ia manatua le tāua o le sauniga. O lea, o sina tamai ofutaele, pe a matuā pipii i le tino ma lē onomea ai pe a susū, ua lē tatau ona laei ai se Kerisiano ma e tatau ona alofia. E faapena foi ona lē talafeagai mo se tasi ona tueleelea po o le faatalalē i ona foliga atu. E lē gata i lea, o le a lē talafeagai foi ona ofuina ni mitiafu o loo iai ni tusitusiga faalelalolagi po o ni ‘agaga e viiviia ai ni mea.

A o autaluina e toeaina ua tofia, fesili mo le papatisoga ma lē o le a papatiso, o le taimi lena e talanoaina ai le tāua o le ofuina o laei talafeagai. O le faia faapea o le a tausisia ai le mamalu o le sauniga, ma o le a faaauau ai foi ona matilatila lo tatou tulaga e ese mai le lalolagi.—Faatusatusa i le Ioane 15:19.