O Mea e Manaomia mo Faifeau Fou ma Faifeau ua Iai le Tomai
1 Na fesili atu le faisalamo o Tavita: “Ieova e, o ai ea e nofo i lou fale fetafai? O ai ea e mau i lou mauga paia?” Na tali Tavita i ni nai upu sa ia filifilia lelei e faapea: “O le savali ma le amio sao, ma ua fai le amiotonu, ma tautala ma le faamaoni i lona loto.” (Sala. 15:1, 2) E leʻi suia lava na mea manaomia. O i latou uma lava ua ō mai ina ia tapuai i le faapotopotoga Kerisiano, e tatau ona lafoaia amioga lē mamā ma le onā. E lē aofia i tagata o Ieova i latou o ē faamisa, e iai uiga lotoa, pe faagutugutulua. E tusa lava po o ni faifeau fou po o ni ē ua iai le tomai, ae tatau lava ona tatou faamaoni i le tausisia o tapulaa sili ua otooto mai i le Afioga a le Atua.—Kala. 5:19-21.
2 E toatele ē fou o loo auaufaatasi ma le faalapotopotoga a Ieova. Ua faapena foi ona suia e ē talavou ma ē matutua o latou mafaufauga ina ia ogatusa ai ala o o latou olaga ma mea o loo manaomia e le Atua. Sa tuputupu aʻe se tama i Amerika i Saute e aunoa ma se taitaiga faamātua, ma oo ai i ni faafitauli matuia i ona uiga totino. E oo atu i le 18 o ona tausaga, ua pulea o ia e fualaau faasaina ma sa falepuipui foi i le gaoi ona o le taumafai ina ia faaauau ai pea lana masani leaga. Ina ua faia sana suesuega faale-Tusi Paia, sa ia lē toe auaufaatasi atu ai loa i ana aumea sa iai muamua, ae ua maua ni ana uo fou i Molimau a Ieova, ma mulimuli ane ai tuuina atu lona ola i le Atua.
3 E faapena foi le tatau ona tatou maumauai e faafiafia le Atua i a tatou amioga uma, “i le amiotonu ma le amio lelei e faamaoni.” (Efe. 4:24) Ua ia i tatou le avega tauave ina ia “toeseina . . . le tagata tuai atoa ma ana amio” ma ia “[tatou] oofu i le tagata fou, o le ua faafouina i le poto, e faatatau ia foliga i le na faia o ia” pe afai tatou te fia tumau ai pea i le faalapotopotoga pei se mauga a le Atua.—Kolo. 3:9, 10.
4 Le Afioga a le Atua, o se Taaʻiga Malosi: O le uiga totino o Ieova lea ua faaalia ia i tatou e ala mai i le Tusi Paia, e mafai ona matuā taaina ai o tatou mafaufauga ma a tatou gaoioiga i se auala mautinoa. (Roma 12:2) Ua iai i lana Afioga le mana e faaliliuina ai manatu ma vaili ai loto. (Epe. 4:12) Ua aʻoaʻoina i tatou e le Tusi Paia faagaeeina e faapea, o le finagalo o Ieova e manaomia ai ona tatou ola i se olaga amiotonu tau amio, ia auai atoatoa i le faiva i le lautele, ma ia aua neʻi lafoaia sauniga faa-Kerisiano.
5 I nei aso faigata, e mafai e le anoanoai o omiga ona taaina ai se Kerisiano ina ia solia tulafono a le Atua. E oo lava i se Kerisiano sa matuā malosi, e mafai ona tafetafea ese mai le faatuatua, pe oo foi ina paʻū atu i amioga sese, pe a ia lafoaia suesuega totino, suesuega a le aiga, o sauniga a le faapotopotoga, po o le faiva. O le pogai lena na tusi atu ai Paulo ia Timoteo e faapea: “Ia oe lava ia te oe, atoa ma lau e aʻoaʻo atu” ma “Ia e mafaufau [“pea,” NW] i mea ou te fai atu na.”—1 Timo. 4:16; 2 Timo. 2:7.
6 E tusa lava pe tatou te fou, po ua ia i tatou le tomai ona o le tele o tausaga, ae tatau lava ona tatou matuā taulai atu i mea o manaomia e le Atua, ia tatou matuā paleni i le faiva, ma ia tausisia malosi pea lo tatou faamoemoe pe a fia faasaoina o tatou ola. (1 Pete. 1:13-16) E matuā manaomia tele le usitaia i aso taitasi o mea tonu ua manaomia mai e le Atua.
7 Ia fai ma ou sini lou auai atu i le auaunaga i le fanua i le masina mulimuli lenei o le tausaga faaleauaunaga o le 1993. Ia e maumauai e fesoasoani i isi ina ia tutupu aʻe i le faatuatua ma ia faateleina a latou galuega aogā i le faiva i le fanua. (Roma 1:12) Ia tuutasi atu ou mafaufauga i mea saʻo, e ala i le faia e lē aunoa o suesuega totino, o suesuega a le aiga, ma le auai pea i sauniga. (Fili. 4:8) O le a lē meleina au taumafaiga e faafiafia le Atua, e ala i lou ola e ogatusa ma mea o loo ia manaomia.—Kolo. 3:23, 24.