Faia se Suesuega Faale-Tusi Paia i Aiga
1 E faapefea ona faia se suesuega faale-Tusi Paia uigā i le aiga? O le ā se faaaoaoga autū o loo ia i tatou? E mafai faapefea ona iloiloina mau o loo i le mataupu o loo suesueina? O ai e ao ona faitauina palakalafa? E faaopoopo atu i faasologa autū o le faia o se suesuega, o ā isi mea e manaomia ina ia fesoasoani atu ai i le tagata aʻoga e avea le upu moni o sana meatotino? O ā mailei e tatau ona alofia?
2 Le Auala e Faia ai se Suesuega: I tulaga masani, e mulimuli le suesuega faale-Tusi Paia i aiga i le auala o loo faia ai le Suesuega o Le Olomatamata. E faitau muamua le palakalafa o le a talanoaina. Ona fesiligia lea e le tagata o loo faia le suesuega le tagata aʻoga i le fesili mo lena palakalafa, ma faatali mo se tali. Afai e faaletonu le tagata aʻoga, e ao i le faiaoga ona sauni e fai atu se fesili faatupu manatu e mafaufau i ai le tagata aʻoga i le mataupu o loo talanoaina, ma maua ai se tali saʻo.
3 Talanoa le auala e faatatau ai mau o i le palakalafa i le mataupu. Faasino i le tagata aʻoga le auala na te mataulia ai mau ua sii mai, ma iloilo faatasi ma ia le auala e faatatau ai na mau. Afai e taʻua mai ni mau ae lē o sii maia le faamatalaga, e lelei ona suʻe faatasi i ai i le Tusi Paia pe afai e lē uumi. Ona faataga lea o le tagata aʻoga e faitau ma faaopoopo mai i le auala e lagolago pe faamanino ai se manatu o loo taʻua i le palakalafa.
4 Fesoasoani i le Tagata Aʻoga ina ia Avea le Upu Moni ma Ana Meatotino: Faalaeiau tagata aʻoga e sauniuni lelei mo le suesuega. Faamamafa i ai le tāua o le faitau i le aʻoaʻoina. O le tele o mataupu o suesuega e faitau e le tagata aʻoga ma mafaufau loloto i ai, o lona lelei foi lea. O isi faiaoga latou te tuu uma atu palakalafa e faitau mai e le tagata aʻoga a o faia le suesuega. O nisi latou te faitau feauauai. E ao ona fuafua lelei, ma manatunatu mo le agaigai i luma faaleagaga o le tagata aʻoga.
5 O le faia o le suesuega i se uiga faapea e tau ina fai, atonu e fesoasoani i le tagata aʻoga e mauaina ai le poto, ae po o talitonu ea i mea o loo ia aʻoaʻoina? Afai e avea le upu moni ma ana meatotino, e ao la ona ia iloa le auala e aafia totino ai o ia i le mataupu sa talanoaina. O le ā sona lagona i mea o loo ia aʻoaʻoina? E mafai faapefea ona ia faaaogā mea ua ia aʻoaʻoina? Ia faaaogā fesili faatupu manatu ina ia pāʻia ai le loto o le tagata aʻoga.
6 Alofia Mailei: E iai ni mailei e ao ona alofia i le taimi e fai ai le suesuega faale-Tusi Paia. Pe a tulai mai mataupu e lē fesootai ma le mataupu lea e talanoaina, e masani lava o le auala lelei e faia o le talanoaina lea i le iuga o le suesuega, pe talanoa foi i se isi avanoa. E tāua foi le tali mai o le tagata aʻoga i ana lava upu na i lo o le faitau mai o le tali o loo i le tusi. O le a fesoasoani lenei auala ia te oe le faiaoga e te iloa ai po o malamalama le tagata aʻoga i le mataupu.
7 Aisea e lē fai ai ma ou sini le faia o se suesuega faale-Tusi Paia a itiiti mai o le tasi? E lē o se galuega fita lena mea pe afai e te faalagolago ia Ieova ma mulimuli i faasologa autū o le Suesuega o Le Olomatamata. O le auala sili ona uigā e aʻoaʻo atu ai le upu moni i isi ma faia ni soʻo, o le faia lea o se suesuega faale-Tusi Paia i aiga. O le faia o lenei mea, o le a e mauaina ai foi le olioli mai le faia o se sao atoatoa i le faataunuuina o le faatonuga a Iesu o loo i le Mataio 28:19, 20.