Ia Pāʻia le Loto o Lau Tagata Aʻoga o le Tusi Paia
1 Pe e te manao e faatatauina e lau tagata aʻoga o le Tusi Paia mea o loo ia aʻoaʻoina? E tatau ona ia faia faapea pe afai e na te fia maua aogā mai le poto o loo ia mauaina. Ina ia uunaia lau tagata aʻoga o le Tusi Paia e gaoioi, e tatau ona e pāʻia lona loto. I le aso o le Penetekoso 33 T.A., na ‘tuia ai loto’ o tagata pe tusa ma le 3,000 i le lauga faagaeeloto a le aposetolo o Peteru, ma o na tagata sa latou “talia lana upu ma le fiafia” ma papatiso ai lava i lena aso. (Galu. 2:37, 41) E mafai faapefea ona e pāʻia le loto o lau tagata aʻoga o le Tusi Paia?
2 Ia Sauniuni Maeaea: Aua le taumafai e talanoaina se mataupu telē ae itiiti ai le taimi e mafai ona fefulifulisai ai manatu ma le tagata aʻoga i le mataupu. Ia muai faamautinoa ni manatu o le a e faamatilatilaina, ma ia mautinoa ua e malamalama i ai ma mafai ona e faatatauina mau i se tulaga aogā. Ia muai manatunatu i ni fesili e ono oso aʻe i le mafaufau o le tagata aʻoga ona o ona tulaga ua masani ai. Afai ua e masani lelei i lau tagata aʻoga, o le a fesoasoani la lenei iloa ia te oe, e te sauniuni ai i ni faamatalaga o le a fetaui patino ia te ia.
3 Ia Faataitai i le Auala na Aʻoaʻo atu ai Iesu: Sa faaaogā e Iesu faataitaiga e faafaigofie ai ni manatu faigata, ma fesoasoani ai i ana tagata aʻoga e maua le uiga ma le lagona tonu o le tulaga o loo iai. (Luka 10:29-37) I le tulaga tutusa, e mafai foi ona e faagaeeina le loto o lau tagata aʻoga o le Tusi Paia i aʻoaʻoga matagofie, e ala i le faafaigofie o au faataitaiga, ia faaaogā ni mea e masani ai i le olaga, ona faatatau patino atu lea i tulaga o le tagata aʻoga.
4 E sili ona aogā fesili i le pāʻiaina o loto o tagata aʻoga o le Tusi Paia, e pei ona masani ona faataitaia mai e Iesu. (Luka 10:36) Ae aua le tau ina faamalieina oe pe a na ona faitau mai lava e le tagata aʻoga le tali mai le tusi. Ia faaaogā fesili tatai e faasino atu ai lona mafaufau i se faaiuga atonu na te leʻi mafaufauina lava muamua. Ua fesoasoani foi lenei faiga i le tagata aʻoga e atiina aʻe ai lona tomai e mafaufau ai. Ia fai atu fesili faatupu manatu ina ia iloa ai po o ā ona lava talitonuga i se mataupu. Atonu e te mataulia ai ni vaega o loo manaomia ai se fesoasoani, ma mafai ona e sagaʻi atu loa i ai ma nisi fesoasoani patino.
5 Afai e lē o agaigai i luma le tagata aʻoga o le Tusi Paia, e manaomia ona e taumafai e faasufi mai ni mafuaaga o lona faapena. E aofia ai le asiasi atu i ai i nisi taimi e ese mai i le taimi masani o le suesuega. Aisea e faatalatu ai o ia e faia ni gaoioiga? Po o iai ea ni manatu faale-Tusi Paia na te lē o malamalama i ai? Po o musu ea o ia e faia ni fetuutuunaiga i le auala o loo ia ola ai? Afai o loo taumafai se tagata aʻoga o le Tusi Paia e ‘faalotolotolua i ni manatu eseese se lua,’ ia fesoasoani la ia te ia ina ia ona iloa le matautia o le faia faapea.—1 Tu. 18:21.
6 Na iloa e le aposetolo o Paulo e faapea, o le aʻoaʻoina o upu moni o le Tusi Paia i tagata fiafia o se galuega faasaoola, o le mafuaaga lena na ia fautuaina ai Kerisiano uma ina ia ‘uai atu pea i mea o loo latou aʻoaʻo atu.’ (1 Timo. 4:16) O i latou o loo tou suesueina faatasi le Tusi Paia, e tatau ona latou aʻoaʻoina mea e sili atu na i lo o na o mea moni e uiga i le Tusi Paia ma mea o loo tutupu i le lalolagi. E tatau ona latou maua le poto saʻo e uiga ia Ieova ma Iesu, ma ia fesoasoani atu i ai ina ia atiina aʻe se faiā totino mafana ma i laua na. Ua na o le faia lava faapea, o le a uunaia ai i latou e faaali atu lo latou faatuatua e ala i galuega. (Iako. 2:17, 21, 22) Pe a pāʻia le loto o le tagata aʻoga, o le a uunaia ai o ia e uia le ala o le a viia ai Ieova, ma leoleomaluina ai foi lona lava ola.—Faata. 2:20-22.