Le Yearbook—O se Faaputugaoa o Faalaeiauga
1 O tala ma mea na tutupu e faatatau i galuega ofoofogia a Ieova, ua faafouina ai pea auauna a le Atua. (Iopu 38:4, 7; Faata. 25:25; Luka 7:22; Galu. 15:31) O lena le pogai ua avea ai le Yearbook of Jehovah’s Witnesses o se faaputugaoa o faalaeiauga.
2 O Yearbook uma ua aumaia ai ni tala faalaeiau o galuega ma mea ua faataunuuina e Molimau a Ieova i le lalolagi atoa. O mea na tutupu e faamalosi faatuatua, ua faamatilatila ai le taitaiga a Ieova, o lana puipuiga, ma faamanuiaga i ona tagata. Ua taʻu mai i le Yearbook ni tane ma fafine loto tetele o ē na tuua o latou aiga, o uo, ma o latou nuu moni, ina ia faaoo atu upu moni o le Tusi Paia i tagata o konitineta uma ma le tele o atumotu o le vasa.
3 Ua uunaia e le Yearbook le toatele o lana au faitau, ina ia latou faateleina atu la latou auaunaga i le Atua. E faapenei le tusi mai a se tasi tagata faitau: “Ua matuā lē mafai lava ona vave loʻu faitauina. E matuā faalaeiauina lava mea ia ua oo i ai laʻu faitau. Ua matuā oo mai ai lava ia te aʻu se lagona e faapea, e mafai ona tele atu nisi mea ou te mafai ona faia i le talaʻiina o le tala lelei, pe a ou vaai atu i mea o loo faia e isi a o fetaiai ma omiga.”
4 I tausaga uma lava talu mai le 1927, ua avea ai pea le Yearbook of Jehovah’s Witnesses o se faaputugaoa moni o tala ma mea tutupu e faagaeeina ai. Po o matuā aogā ea ia te oe lenei puna tutasi o faalaeiauga? Ina ia faia faapea, ia mautinoa la lou faitauina o le Yearbook i le taimi lava e te mauaina ai. Ona e toe autaluina lea o ona vaega patino mo ni faalaeiauga o loo manaomia e oe ma lou aiga, a o faagasolo le tausaga.