“E Inosia Foi Outou e Nuu Uma”
1 I tausaga lata mai nei, na tatou olioli uma e faalogo i lipoti faafiafia loto e faatatau i faamanuiaga ofoofogia na tofo i ai tagata o Ieova i le lalolagi atoa. Ua uunaia i tatou i loimata fiafia i le faatulafonoina o le galuega i Malawi ina ua mavae tausaga e 26 o sauaga ogoogo. Na tatou mapu ma le toafilemu ina ua tatou molimauina le masofa i lalo o faiga faa-Kominisi lē talitonu i le Atua i Europa i Sasae, lea na iu i le faasaolotoina o le faitau afe o o tatou uso mai ana avega sauā. Na tatou vāai ma le matuā naunautai a o fesiligia le aloaiaina faaletulafono o lo tatou saolotoga e tapuai ai i Eleni; na faagaeeina o tatou agaga ina ua tatou mālo i se manumalo lauiloa i le fale faamasino e sili ona maualuga i Europa. Sa tatou fiafia e faalogo i lipoti e faatatau i le faatelega atili o lālā a le Sosaiete, lea ua mafai ona gaosia ai le anoanoai o lomiga mo ē e saili i le upu moni. Sa tatou ofo ina ua tatou aʻoaʻoina faapea, e silia i le 7,400 na papatiso i le tauaofiaga i Kiev, Ukraine. Ioe, o nei auiluma uigaese i le galuega o le Malo ua siitia ai o tatou agaga i se tulaga maualuga.
2 E ui e lelei le pogai mo lo tatou olioli, ae e ao ona tatou puipui faasaga i le soona olioli. O ni faasologa o lipoti lelei e mafai ona faapogaia ai i tatou e faaiua faapea, o teteega i le tala lelei ua malepe i lalo ma ua taliaina tagata o Ieova i le lalolagi atoa. E mafai ona taufaasese ia ituaiga o mafaufauga. E ui ua tatou mālo i nisi manumalo faamalieloto ma maua sina manuia laitiiti i le faamaualaloina o pa pupuni i le tala lelei i nisi atunuu, e lē tatau ona tatou faagaloina faapea, o loo tumau pea e lē suia la tatou faiā tāua ma le lalolagi. Ona o ni soʻo o Iesu, “e le ni o le lalolagi” i tatou. Ona o lea, ua tatou mautinoa le avea ma ‘e inosia e nuu uma.’ (Ioa. 15:19; Mata. 24:9) A o faaauau pea ona iai lenei faiga o mea, e leai se mea o le a na suia le tulafono faavae e faapea “o i latou uma foi o e loto ina nonofo ma le amio Atua ia Keriso Iesu, e sauaina i latou.”—2 Timo. 3:12.
3 Ua tautino mai e talafaasolopito le moni o lenei lapataiga. A o avatu e Iesu, Lē na Faavaeina le Faa-Kerisiano, faamaoniga ofoofogia i luma o pule malolosi ma o latou tagatanuu, na mafatia o ia i faiga leaga i aso taitasi ma sa lamatia pea ina ia fasiotia. E ui na fesoasoani ona aposetolo i le toatele e avea ma soʻo, faia se sao i le tusiaina o le Tusi Paia Kerisiano Eleni, ma faaalia meaalofa faavavega o le agaga, ae sa faapena foi ona itagia ma agaleagaina i latou. E ui lava i a latou amio lelei ma alolofa i tuaoi, ae sa vāai le toatele i Kerisiano uma, o se “lotu” inosia sa ‘talaeseina i nuu uma.’ (Galu. 28:22) A o faaaogā e Ieova le faapotopotoga Kerisiano i le lalolagi aoao i aso nei i se auala ofoofogia e faataulauina ai lona finagalo, o loo faaauau pea ona tetee ma faaleagaina e vala uma o lenei faiga leaga o mea. E leai se mafuaaga e faatalitalia ai le faamutaina o teteega.
4 I le uluai senituri, sa sauaina e Satani soʻo o Iesu i auala eseese. Na taʻua e ē tetee inosia ni pepelo leaga na tauseseina ai i latou. (Galu. 14:2) Sa iai ni taumafaiga e faafefe ai i latou i faamatauga matuiā. (Galu. 4:17, 18) Sa taumafai tagata inainā e taofia lo latou tautatala atu. (Galu. 19:29-34) Sa faafalepuipui i latou e aunoa ma se pogai tatau. (Galu. 12:4, 5) E masani i ē faaoosala ona faaaogā sauaga i le tino. (Galu. 14:19) I nisi tulaga, sa fasiotia ma le mautinoa i latou o ē e leʻi faia ni mea sese. (Galu. 7:54-60) Na onosaia e le aposetolo o Paulo le toetoe lava o nei ituaiga uma o sauaga. (2 Kori. 11:23-27) Sa vave ona faaaogā e ē tetee so o se avanoa e faasalavei ai i le galuega talaʻi ma faaoo atu mafatiaga i nei au faigaluega faamaoni.
5 I aso nei, o loo faaaogā e Satani togafiti e tali tutusa. Ua taʻua pepelo leaga, faaalia sese i tatou o se lotu mavae po o se lotu taufaasese. I nisi atunuu, ua faasilasila mai e pule maualuluga faapea o a tatou lomiga e faatupu faalavelave ma ua faasaina. O lo tatou faaaloalo mo le paia o le toto ua ulagia ma luia i le lautele. I le va o le 1940 ma le 1945, sa osofaia ai e tagata tetee o loo feita i le finauga o le faalo i le fuʻa o tatou uso, faamanualia, ma faaleagaina o latou fanua. E faitauafe sa tuuina i falepuipui ona o le finauga i le solitu. I atunuu o pulega tautalatasi, na tuuaia sese ai o tatou uso i le tau faoa o le malo, ma na iu i le faatamaia faamoamoa ma fasiotia i falepuipui ma nofoaga o faasalaga le faitau selau. O loo faaauau pea omiga, e faaalia manino ai ua inosia i tatou e aunoa ma se pogai tatau.—Tagai i le Proclaimers, mataupu e 29.
6 O le ā O Loo Umia e le Lumanai? A o maua e tagata o Ieova se manuia mai lea taimi i lea taimi e tau faamāmā ai omiga i nisi vaega o le lalolagi, ae o loo tumau pea i le mea e tasi le tulaga atoa. O loo ita pea le Tiapolo i lona toilalo i le 1914. Ua ia iloa ua puupuu lona taimi. E mautinoa le faateleina o le aasa o lona ita a o latalata mai le puapuaga tele. Ua tuuina atu atoa o ia i lana taua faasaga i le Tupu o loo nofo i le nofoalii, o Keriso Iesu, ma o loo ia maumauai e tau seia oo i le iuga. E mafai ona ia faaalia ma ana temoni lo latou ita i na o tagata lava o Ieova i luga o le lalolagi, o ē “tausi [faamaoni] i poloaiga a le Atua, ma ua taofi le mau ia Iesu.”—Faaa. 12:12, 17.
7 O lea a o tatou vāai atu i le lumanai, e manaomia ona tatou mafaufau saʻo i mea e faatalitalia. E leai se mafuaaga e mafaufau ai faapea o le a faaitiitia le ita o le Tiapolo pe faatoilalo. O le inosiaina o i tatou ua ia tuuina i lenei lalolagi, e mafai ona pasae aʻe i so o se taimi ma i so o se vaipanoa. I le tele o atunuu, o lo tatou saolotoga e talaʻi ua malupuipuia ona ua maeʻa se tauiviga umi. Atonu o lena saolotoga e faigofie ona faamutaina, ua faatumauina ona ua na o se pule agalelei o loo iai nei po o se tulafono e leʻi talia lelei. O suiga uigaese e mafai ona tutupu faafuasei, aumaia le vevesi ma sauaga matuia i aiā faaletagata.
8 O le manuia ma le saolotoga i le taimi nei o loo tatou olioli ai i nisi autunu e mafai ona iu faafuasei, ma toe oo i o tatou uso sauaga lava ia na latou mafatia ai muamua. Aua neʻi tatou lolo atu i se agaga o le lē popole po o le lē manatu mamafa, i le mafaufau faapea ua tatou manumalo i o tatou fili. Atonu e lē faaalia atoatoa maia i taimi uma le inoino o lenei lalolagi, ae e faaauau pea ona maaa. Ua faaalia e mea uma i le Afioga a le Atua o le a faamalosia le tetee o le lalolagi na i lo o le faaitiitia a o agaʻi mai le iuga. O lea, e manaomia ai ona tatou mataala, i le faaalia o i tatou e “atamamai pei o gata, a ia fifilemu e pei o lupe.” (Mata. 10:16) E tatau ona tatou iloa o le a tatou ‘malolosi ona finau’ seia oo i le iuga, ma o le tumau o le ki lea i lo tatou faaolataga.—Iuta 3; Mata. 24:13.
9 I le vaega o le lalolagi o loo tatou ola ai, atonu o loo lauolaola le galuega e aunoa ma ni faalavelave iloga mai i ē tetee. E mafai e lenei mea ona matuā faatalitonuina i tatou e faatatau i le leai o se pogai e manatu mamafa ai. Ae ui i lea, e iai se manaoga ina ia tiotio. E mafai ona vave suia tulaga. Ma le leai o se lapataiga, e mafai e ē tetee ona faaaogā ni finauga e faasagatau mai ai ia i tatou. O loo faaauau ona sailia e aposetate se pogai e faitio ai. O faifeau inainā o ē e lagona o loo faamatauina i la tatou galuega, atonu e tauleagaina i tatou i le lautele. O a tatou fuafuaga e fausia se Maota o le Malo i lo tatou vaiaai atonu e faatupu aʻe ai se vevesi o le a lē fiafia ai le vaipanoa atoa. Atonu e tulai mai ni faamatalaga tusia faatupu faalavelave, e faaleagaina ai lo tatou tulaga. Atonu e faaalia sese e tagata lauiloa masani i tatou, e faapogaia ai o tatou tuaoi ia agaleaga mai pe a tatou asiasi atu. E oo foi i ē e pele i lo tatou lava aiga atonu e tetee ma sauaina mai i tatou. O lea ua iai se manaoga ia mataala, i le iloaina faapea o le feitagaiga a le lalolagi o loo ola pea, ma e mafai ona mānu aʻe i so o se taimi.
10 E Tatau Faapefea ona Aafia i Tatou i Lenei? E faaaafia e nei mea uma o tatou mafaufauga ma la tatou vaaiga mo le lumanai. I le ā le itu? Pe tatau ona tau faamatauina ai i tatou i lenei mea, i le popole e faatatau i mea atonu e ao ona tatou onosaia? Pe tatau ona tatou faifailemu i la tatou galuega talaʻi, ona o loo faalavelavea ai nisi i lo tatou vaiaai? Pe e iai se mafuaaga tatau e lagona ai le ita pe a tauleagaina lē tonu i tatou? Pe e tatau ea ona faapea, ona o le lē taofia o faiga sauā o le a aveesea ai lo tatou olioli i le auauna atu ia Ieova? Po o iai se lē mautonu e faatatau i le iuga? Leai, e lē taitai. Aisea e leai ai?
11 E lē tatau ona tatou faagaloina le mea moni faapea, o le feau o loo tatou faalauiloaina e puna mai ia Ieova, ae lē ia i tatou. (Iere. 1:9) O la tatou matafaioi le utagiaina o le timaiga: “Ina valaau atu ia i lona suafa; ia outou faailoa atu i nuu o ana galuega; . . . i le lalolagi uma.” (Isa. 12:4, 5) Ua ia faapalepale i le faia leagaina o ona tagata, ona o se mafuaaga patino, o le ‘taʻua o lona igoa i le lalolagi uma lava.’ (Eso. 9:16) O loo tatou faia se galuega na faatonuina e Ieova, ma o ia lea o loo ona aumaia ia i tatou le lototele e tautala atu ai ma le faatoatoa. (Galu. 4:29-31) O le galuega sili lea ona tāua, e aogā, ma faanatinati e mafai ona faia i nei aso faaiu o le faiga tuai o mea.
12 Ua aumaia e lenei poto ia i tatou le lototele e tu mausali ai e tetee malosi atu ia Satani ma lenei lalolagi. (1 Pete. 5:8, 9) O le iloaina e faapea o loo faatasi Ieova ma i tatou, ua ‘faamalosia ma faalototeleina’ ai i tatou, ma aveesea ai so o se mafuaaga e mataʻu ai i luma o ē sauaina i tatou. (Teu. 31:6; Epe. 13:6) A o tatou taumafai pea e faaalia le uta mamao, fetuutuunai, ma fuafua lelei pe a faamataʻu mai ē tetee, o le a tatou faamanino faapea, o loo tatou maumauai e ‘anaana i le Atua i lo le tatou anaana i tagata’ pe a luia la tatou tapuaiga. (Galu. 5:29) A iai avanoa talafeagai e tautala atu ai e lagolagoina i tatou, o le a tatou faia. (1 Pete. 3:15) Ae peitai, o le a tatou lē faamaimau lo tatou taimi e finau ai ma ē tetee faaulu malō, o ē na o le naunau e taʻu faaleaga i tatou. Na i lo o le tatou feita pe taumafai e finau atu pe a latou taufaaleaga pe tauseseina i tatou, tatou te “tuu pea ia i latou.”—Mata.15:14.
13 E faamalieina Ieova i lo tatou onosaia o tofotofoga. (1 Pete. 2:19) O le ā le tau e tatau ona tatou totogia mo lena faamaoniga? Pe ua tatau ona tatou faamavae i tatou lava mai le auauna ma e aunoa ma le olioli ona ua inosia ma teteeina i tatou? E matuā leai lava. Ua folafola mai e Ieova le tauia o lo tatou usiusitai i le “olioli uma atoa ma le filemu.” (Roma 15:13) E ui i mafatiaga matuia, na tumau pea le fiafia o Iesu ona “o le olioli sa tuu i ona luma.” (Epe. 12:2) E moni foi lea ia i tatou. Ona o le taui mo lo tatou tumau e sili naua, ua uunaia i tatou ia “olioli ma fiafia” e ui ina tatou mafatia i tofotofoga matautia. (Mata. 5:11, 12) E oo lava i taimi o toatuga, o lenei lava olioli, o se pogai mo le tuuina atu o le viiga ma le faamamalu ia Ieova i le lagolagoina o le feau o le Malo.
14 Po o iai ea se lē mautinoa e faatatau i le iuga mulimuli, i le aumaia ia i tatou o mafuaaga e matatau pe lē mautonu ai? E leai, o le iuga o le taua i le va o le faalapotopotoga a Ieova ma le lalolagi a Satani ua leva ona filifilia. (1 Ioa. 2:15-17) E tusa po o le ā le malolosi ma le faigata o teteega, o le a aumaia e Ieova ia i tatou le manumalo. (Isa. 54:17; Roma 8:31, 37) E ui o loo matuā tofotofoina i tatou, e leai se mea e mafai ona taofia i tatou mai le mauaina o le taui. E leai se pogai tatou te ‘popole ai i se mea e tasi,’ auā ua tali mai Ieova i a tatou aioiga i le aumaia ia i tatou o le filemu.—Fili. 4:6, 7.
15 O lea tatou te faafetai ai ia Ieova i taimi uma tatou te faalogo ai i lipoti e faatatau i le laveaia mai o o tatou uso mai sauaga, po o le tuuina atu i ai o le saolotoga e talaʻi ai i vaipanoa sa faasaina ai i latou i taimi ua mavae. Tatou te olioli pe a tatalaina e fesuiaiga o tulaga, avanoa fou mo le faitauafe o tagata faamaoni e maua le feau o le Malo. Tatou te loto faafetai moni ina ua aumaia e Ieova ia i tatou le manumalo i fetauaiga ma ē tetee inainā. Ua tatou iloa o le a ia faamanuiaina ma faaolaolaina la tatou galuega i so o se auala manaomia ina ia faalauiloa ai lona maota o le tapuaiga moni, ma avatu ai i ē “ua manaomia” mai nuu uma le avanoa e ulufale mai ai.—Hakai 2:7; Isa. 2:2-4.
16 I le taimi lava e tasi, o loo tatou iloa atoatoa o lo tatou fili, o Satani, e malosi tele, ma o le a ia tetee malosi ia i tatou seia oo lava i le iuga. O ana osofaiga atonu e manino ma lauiloa, pe atonu foi e faatogafiti ma e taufaasese. Atonu e pasae aʻe faafuasei sauaga i nofoaga sa tatou iloa e na o le filemu sa iai i taimi ua tuanai. O ē e tetee amioleaga atonu e matuā sauā ma lē toilalo i taumafaiga e teena ma le lē tonu i tatou. O le a iai le taimi e manino ai ia i latou uma na, o loo latou “fai taua i le Atua,” ma o le a ia faaumatia i latou. (Galu. 5:38, 39; 2 Tesa. 1:6-9) I le taimi nei, e tusa po o le ā e tatau ona tatou onosaia, ua tatou maumauai e tutumau mausali i le auauna ma le faamaoni ia Ieova, ma talaʻia le feau o le Malo. O i tatou o tagata e pito sili ona fiafia i luga o le lalolagi, i le iloaina faapea, ‘a uma ona tofotofoina, e maua e i tatou le pale o le ola.’—Iako. 1:12.