Maeu le Aogā o le Toe Mafaufau i Mea sa Faia e Ieova!

¹ Na faamalosia e le tusitala faagaeeina o le Salamo 48 i latou i Isaraelu e ‘taamilo i Siona, faitau ona ʻolo, mafaufau i lona aupa, ina ia latou talatala atu ai i le tupulaga atali.’ Uunaia e le alofa mo Ieova, o le a latou naunau tele i faamatalaga auiliili uma o lena nofoaga tutotonu faalelalolagi o le pulega faatiokarate. Maeu le tautele o le a iai nei faamatalaga auiliili, ona o luga o le aai lenei na tuu i ai e Ieova lona lava suafa! O le a latou talanoa e uiga i ai, ma sa faapitoa ona latou faamautinoa ua faalogo i ai a latou fanau e uiga i mea uma na latou teuina i o latou lava loto.—Sala. 48:12, 13.

² Ua tatou ola nei i le taimi ua lē o toe faamautu le pulega faatiokarate a le Mesia a Ieova i Siona faalelalolagi, ae i le Ierusalema faalelagi. (Epe. 12:22) Ua pule nei le Malo o Ieova i aao o Iesu Keriso talu mai le 1914. (Faaa. 12:10) O ana gaoioiga o se mea e sili ona tatou naunau i ai. O loo tatou matuā naunau foi i le auala na taitaia ai e Ieova ana auauna i le lalolagi, ina ia mafai ona latou faataulauina lona finagalo o ni sui vaaia o lena Malo. O faamatalaga auiliili uigaese e faatatau i lenei mea, o loo faamatalaina mai i la tatou tusi fou Jehovah’s Witnesses—Proclaimers of God’s Kingdom. Maeu lo tatou fiafia i le mauaina o lea tusi i la tatou Tauaofiaga Itumalo “Aʻoaʻoga Mai le Atua” faatoʻā mavae atu!

³ Ua maeʻa ona tatalaina le tusi i gagana e 20 ia Setema 1, ma ua galueaiina nei ona faaliliu ma lomia ia faamalieina le manaoga o i latou e tautatala i isi gagana e 13. Ua maua e lou aiga se kopi? O e faitauina? O e talanoa e uiga i mea na e aʻoaʻoina mai ai?

⁴ Ina ua uma ona matamata i ata ma faitau faamatalaga e faatatau i ai e pei ona sa fautuaina mai i le tauaofiaga, e toatele uso ma tuafāfine sa vave ona sailiili i le aano o faamatalaga. O ā a latou faamatalaga? O nisi nei o i latou.

⁵ Na tusi mai se tuafafine e faapea: “Ua na o le pau lea o le tusi na ou maua sa ou matuā naunau e faauma ae seʻi toe faitauina. Ua ou iai nei i le mataupu e 25. O le tele o loʻu faitau i ai, o le tele foi lea o le maligi o loimata ma ua faatumuina loʻu loto i le alofa mo Ieova. O se tusi e matuā faalaeiau ma faamalosia ai le faatuatua.”

⁶ Na faapea mai se uso ua silia i le 40 tausaga talu ona auauna ia Ieova: “Ou te leʻi iloa muamua le matuā aafia o le a iai lenei tusi. Na tuai ona ou moe ma vave ona ala ma faamaea le faitauina i le lua vaiaso. O se tasi moni lava o tusi e matuā faamomoiloto na ou faitau i ai. O se galuega silisili i sailiiliga, ae o se galuega silisili foi i faalaeiauga.”

⁷ Se Polokalama Faitau e Lē Aunoa: O nisi o ē vave ona faitauina le tusi atoa ua maumauai e toe faitau, ae i le taimi nei i se tulaga faifaimalie.

⁸ Afai e silia i le tasi le sui o lou aiga e i le upu moni, atonu e te manao e faaaogā vaega o le tusi i la outou suesuega faaleaiga. Sa faia faapena e nisi aiga i ni nai aso mulimuli ane ina ua maeʻa ona maua se kopi i le tauaofiaga. E lē uiga lenei faapea o isi mea, e pei o le sauniuni mo le Suesuega o Le Olomatamata, e ao ona tuu ese. Ae atonu e te mauaina le aogā tele i le faaaogā o se isi 15 pe 20 minute mo le faitauina ma le talanoaina o faamatalaga mai le tusi Proclaimers.

⁹ O isi aiga, e lua pe tolu itulau e faitau—atonu o ni tamai ulutala e tasi pe lua—i afiafi uma a o leʻi tuua le laulau ʻai. Atonu ua maeʻa ona latou faitau taitoatasi le tele o le tusi, ae latou te maua aogā mai se ufitiaga lemū faatasi ma le avanoa e talanoa ai faamatalaga. O nisi o ē o loo faia lenei sa auauna ia Ieova mo le tele o tausaga. E tele mafaufauga mafana e tutupu aʻe a o latou faitauina. E faamafanafanaina o latou loto a o latou talanoaina faatasi o latou sao i mea na tutupu o loo latou faitau i ai.

¹⁰ Ona o tulaga i totonu o lou aiga, atonu e te faitau toatasi i ai na o oe. Fai mai se tasi tuafafine na tusi i le Sosaiete: “Sa ou faitauina se vaega laitiiti o lenei tusi i po taitasi ae ou te leʻi moe. Ua fafauina e lenei tusi i totonu ia te aʻu se talisapaia loloto ma le alofa mo le upu moni, ma ua ou lagona le latalata ia Ieova ma matuā loto faafetai ona o aʻu o se vaega o lana faalapotopotoga. Oʻu te olioli moni i itulau taitasi o loo oʻu faitauina.”

¹¹ E ui e telē le tusi, ae e lē faapena vaega taitasi. O le vaega amata o se ufitiaga vave, ae e matuā faatosina o mea na tutupu mai aso o Apelu e oo mai i le tausaga e 1992—i le na o le 108 itulau. O isi vaega e 13 e oo i le 150 itulau. Ua vavaeina nei vaega taitasi i se aofaiga o mataupu. Nai lo o le vave ona tilofaia, ia faitau se vaega e tasi, se mataupu e tasi, po o se tamai ulutala e tasi; ia fiafia i ai; ma ia maua mai ai aogā.

¹² Faaalu se Taimi e Mafaufau i Mea E te Faitauina: O le ā o le a avea ma ou taulaiga autū a o e faitau? E lē tatau ona avea ma ou sini le na o le ufitia o itulau—faamaeaina o le tusi. O loo iai i le tusi Proclaimers se faamaumauga o lou tupuaga faaleagaga. E ao ona e iloaina lelei. Faaalu se taimi e mafaufau e uiga i fautuaga o loo e faitauina. A o e autaluina gaoioiga a molimau anamua a Ieova, manatunatu pe mafai faapefea ona e faataitai i lo latou faatuatua. (Epe. 12:1, 2) A e faitau e faatatau i le tupu aʻe o le faaaposetate sili, ia mātau faapitoa lamatiaga na maileia ai i latou o ē na liliuese, ma se vaaiga o le malupuipuia o lou lava itu faaleagaga. Ma a o e autaluina lo tatou talafaasolopito faaonaponei, mātau uiga faaleagaga o i latou na faaaogā e le Atua, i le auala na latou faataitaia ai faapea o le faia o le finagalo o le Atua sa sili ona tāua i o latou olaga, ma le auala na latou tali atu ai i tulaga—o nisi o na tulaga sa sili ona faigata—na faatagaina e le Atua.—Epe. 13:7.

¹³ O le a faamalosia ai lou faatuatua, pe a sueina faamatalaga auiliili ua faaalia ai le auala na taitaia ai e Ieova ona tagata, i le malamalamaga manino o upu moni mai le Tusi Paia ua tatou olioli ai nei. O le a tuputupu aʻe lou talisapaia o sauniuniga vaaia o loo faaaogā e Ieova, a o amata ona e masani lelei ma le galueaiina o le faalapotopotoga. O le a mautinoa lou lagonaina o le fiafia a o e faitau pe ua faapefea i le faataunuuga o le valoaga, ona taunuu le tala lelei i tuluʻiga o le lalolagi. O le a faamafanafanaina lou loto i tala o mea sa tutupu i ē faamaoni i vaega uma o le lalolagi, o ē sa galulue maelega e folafola le Malo. O le a faamalosia oe e faafetaiaia tofotofoga totino a o e faitau i mea sa onosaia e uso ma tuafāfine faamaoni ona o lo latou alolofa mo Ieova.

¹⁴ A maeʻa ona e faitau i se vaega o faamatalaga, faaalu se taimi e talanoa faatasi ai i ona vala tautele ma ia autalu faamatalaga auiliili. Afai e iai sau fanau laiti, ia faaaafia i latou i le faamatalaina o ata ma taʻu atu ia oe po o le ā ua latou iloa e faatatau i tagata o faaalia. E tusa pe o e faitau na o oe, taumafai e fetufaai ma isi i mea o e aʻoaʻoina. A talafeagai, faaaogā faamatalaga i toe asiga ma pe a faafoeina suesuega faale-Tusi Paia i aiga. O lou toe taʻua o i latou o le a tamau ai i lou lava mafaufau ma le loto, ma o le a aogā foi i isi.

¹⁵ Ia Naunau i Faamatalaga Auiliili: O taimi o loo e tuuina atu i le faitauina o le tusi Proclaimers, e tatau ona avea ma taimi fiafia ma faamanuiaina.

¹⁶ Faamata e te fiafia e asiasi atu lou aiga i le ofisa ulu i le lalolagi a Molimau a Ieova? O loo faaalia i itulau e 208-209 fale na faaaogā e le Sosaiete i le senituri ua mavae i le vaipanoa o Pittsburgh. O itulau e 216-217 o loo faamasani ai oe ma fale na mulimuli ane faaaogā i Brooklyn. O ata i itulau e 352-356 e mafai ona fesoasoani ia te oe e vaai ai faalemafaufau i le ofisa ulu i le lalolagi i aso nei. O mataupu e 26 ma le 27 o loo iai faamatalaga auiliili e faatatau i le galuega o loo faia i Peteli, ma i itulau e 295-298 o loo aumaia ai faamatalaga faaopoopo e faatatau i le olaga i Peteli.

¹⁷ O le toatele o i tatou e lē mafai ona asiasi atu i le tele o lālā a le Sosaiete. O itulau e 357-401 o le tusi Proclaimers o le a na avea oe i se matamataga i le lalolagi. E leai se mafuaaga e faananati ai ona tilofaia. Faaalu sina taimi laitiiti i atunuu taitasi ma ia fiafia i ai. Faaaogā le faafanua o le lalolagi i itualu e 415-417 e suʻe ai nofoaga taitasi. Faitau faaopoopoga o loo ō mai faatasi ma ata o lālā taitasi. I le faasino upu (index) e mafai foi ona e maua ai isi faamatalaga mataina e faatatau i atunuu taitasi. Faaaogā lenei avanoa e faamasani ai i sui o lou aiga faaleagaga i isi atunuu.

¹⁸ A miomio faatasi tagata, i nisi taimi e masani ona latou taaalo i taaloga e aafia ai le poto i mea moni faalelalolagi. Faamata e lē sili atu ona aogā le iloa o aso ma mea tutupu e onomea ona matauina i le talafaasolopito faaonaponei o tagata o Ieova? O le a e mauaina le tele o na mea moni o loo lisina mai i itulau e 718-723 i le tusi Proclaimers. O loo saunia e lena lisi se auivi faigofie; e mafai ona e faaopoopo i ai mai faamatalaga auiliili o loo maua i le tusi atoa. Faaaogā i latou nei o se faavae mo autaluga. Atonu o le a vave ona manatua e ē laiti i totonu o le aiga i latou. O nisi o i tatou mātutua atonu ua fai si gese. Ae o faamatalaga auiliili nei o le talafaasolopito faatiokarate e mafai ona aogā ia i tatou uma pe a iloaina. A maeʻa ona e aʻoaʻoina aso ma mea moni faigofie, fau aʻe i lena faavae. Tagai pe o le ā le tele o faamatalaga auiliili e mafai ona e manatua e faatatau i mea taitasi na tutupu. Ona talanoa lea e faatatau i le vaega o lena mea na tupu i le faataulauina o le finagalo o le Atua. Ona sosoo ai lea ma le talanoaina pe faapefea ona aafia ai lou lava olaga, ma faapefea ona e fetaui i le mea o loo faia e Ieova.

¹⁹ Tagai i Avanoa o loo Tatala Atu ia te Oe: A o e faitau ma talanoaina le Jehovah’s Witnesses—Proclaimers of God’s Kingdom, o le a e iloa manino ai i lau vaai le faataunuuga matalasi o le Isaia 60:22. O loo taʻua i le itulau e 519 o le tusi faapea: “O le faataunuuga o le folafolaga faapea ‘o le toaitiiti e fai ma toaafe’ ua mautinoa ua tupu, ma matuā anoanoai! I atunuu taitasi e silia i le 50 sa leai ma ni ē ‘toaitiiti’ na iai—i le mea sa leai ni Molimau a Ieova i tuā i le 1919, i le mea sa leʻi faia ai lava se talaʻiga—o loo iai nei le silia ma le afe ē o loo viia Ieova. I nisi o nei atunuu, o loo iai le faitau sefulu afe, ioe, e oo lava i le silia ma le selau afe, o Molimau a Ieova o ē o loo faasalalauina maelega le Malo o le Atua! I le lalolagi aoao, ua avea Molimau a Ieova ‘ma nuu malosi’—e sili atu le fuainumera e pei o se faapotopotoga autasi i le lalolagi atoa, na i lo o le aofaiga o tagatanuu o se isi lava nuu tutoatasi pe a ma le 80 i le lalolagi.”

²⁰ O lena galuega o le faaauilumaina o le Malo e mautinoa e leʻi faaiuina. I le tuufaafeagai, ua faatelevaveina e Ieova i se saoasaoa e leʻi faapea muamua. O le ā le tele o le a e saosaolaumea ai? O e iloa moni avanoa uma o loo tatalaina atu ia te oe? A o e aʻoaʻoina mea o loo faia e isi, seʻi uunaia ia e lou lava loto oe lava e faaavanoaina oe e saosaolaumea atoatoa i le galuega matalasi, o loo faatonutonuina e lo tatou Atua alofa, e ala ia Iesu Keriso i o tatou aso.