Ofoina o le Tusi Ua Fesili Mai Talavou
1 E mafai ona e ofoina le tusi Ua Fesili Mai Talavou iā Fepuari pe afai e te talanoa atu i se matua po o se talavou o loo fia malamalama e uiga i faafitauli o loo faafaigatā i talavou.
2 Atonu e talafeagai ona e faapea atu:
◼ “E lē faigofie le tuputupu aʻe i nei taimi faigatā. Ua fesagaʻi le ʻautalavou ma le tele o tulaga fou e manaʻomia ai ona latou faia ni filifiliga tāua. ‘Pe e tatau ona ou inu? Ae ā le faaaogāina o fualaau faasāina? O ā amioga e tatau ai i le isi itupā? Pe a fesiligia e talavou nei mataupu autū, e masani ona lofia i latou i ni tali e feteenaʻi. O le ā sou manatu o fea e masani ona liliu atu i ai le toʻatele o i latou mo ni fautuaga? [Tuu le avanoa mo se manatu.] O lenei tusi, Fesili ua Fesili Mai ai Talavou—Tali e Aogā, ua saunia ai ni faamatalaga aogā. [Tataʻi manatu i le faasologa o mataupu, e faaalia ai mataupu eseese o loo aofia ai.] E manaʻomia e talavou tali e tuusaʻo ma moni. O tali o iai i lenei tusi ua lagolagoina e ala i mea o loo fai mai ai le Tusi Paia.”
3 O le isi lea taulimaga e mafai ona e faaaogāina:
◼ “Ua omia le ʻautalavou i le tele o faafitauli i aso nei. Ua latou manaʻomia ai se fesoasoani e faafetaiaʻia ai ma le manuia. Pe afai tatou te taumafai e faia le mea sili tatou te mafai e fesoasoani ai iā i latou, pe tatou te lē saʻilia ea se mea o aumaia ai ni taʻiala aogā? [Tuu le avanoa mo se manatu.] O nisi o omiga matuiā e auala mai lea i isi lava talavou, a latou lava tupulaga. Mātau ata o loo i le itulau e 76 ma le 77 i lenei tusi. [Tataʻi manatu i faamatalaga o nei ata ma palakalafa o loo tusi faasisipa i le itulau e 77.] O itulau o loo mulimuli mai o lenei mataupu ua otooto mai ai tali e moni ma aogā.”
4 E moni lava o ‘aso nei e gata ai e oo mai ai aso faigata’ aemaise lava mo talavou. (2 Timo. 3:1) E mafai ona fesoasoani moni le tusi Ua Fesili Mai Talavou i se tagata talavou ina ia faafetaiaʻia ai ma le manuia luʻi o aso nei. Ua matuā mananaia lava ata o loo iai i mataupu e 39, ma e moni ma aogā nei mataupu. Seʻi mataalia e faaaogā lenei lomiga aogā, i so o se avanoa.