Tauaofiaga Itumalo i le 1994 “Mataʻu i le Atua”

¹ Sa faaalia e tamā o le au faatuatua le “mataʻu i le Atua” mai le taimi o Apelu ma Noa seia oo mai i le taimi nei. (Epe. 11:4, 7, NW) Ina ia faatino le mataʻu i le Atua o lona uiga ia faaalia “se fefe ma se faaaloalo loloto mo Lē na Foafoaina Mea ma le mataʻu tatau ia lē faia se mea e lē faafiafiaina ai o ia.” (it-1 itu. 818) Ia Aokuso, Setema, ma Tesema, o le a tatou faataitaia ai lenei faaaloalo loloto e ala i lo tatou auai i le Tauaofiaga Itumalo o le “Mataʻu i le Atua.” Pe o le a e iai ea i inā e olioli i le polokalama atoa, mai le pese amata seia oo i le tatalo faaiu?

² I tausaga taitasi, tatou te agaʻi atu ai i se tauaofiaga itumalo, ma se naunautaiga e fia auai. E ui lava e aafia ai taumafaiga e tele ma tupe o le a faaalu ai a le tagata lava ia, ae o faamanuiaga e maua ai e anoanoai. Tatou te foi atu i aiga ma le olioli, faamalieina, ma atiina aʻe faaleagaga. (Faatusatusa i le 1 Tupu 8:66.) E faagaeeina oe i le aufaatasiga, ma e saunia e le tauaofiaga se suiga o a tatou faasologa. Ae ia manatua, tatou te potopoto e tapuai ia Ieova. Ua ia faatonuina i tatou ina ia faia faapea. Ua ia aʻoaʻoina i tatou i le auala tatou te manuia ai.—Teu. 31:12, 13; Sala. 122:1.

³ Se Tauaofiaga mo Aso e Tolu: O le a tauaaoina le polokalama i tauaofiaga e fā i lenei tausaga i le oganuu a la tatou lālā. Sa avatu i Le Olomatamata o Fepuari 15, 1994, aso mo tauaofiaga i Amerika Samoa, Toga, Samoa i Sisifo ma Tuvalu.

⁴ O le a amata le polokalama i le Aso Faraile i le 10:20 i le taeao, ma o le a faaiu i le Aso Sa pe tusa o le 4:15 i le afiafi. I le Aso Toonai ma le Aso Sa, o le a amata le polokalama i le 9:30 i le taeao. E tasi le aso o le a muamua ai amata le polokalama a Toga, e amata mai i le Aso Tofi seia oo i le Aso Toonai. O le a tatalaina faitotoa i le 7:30 i le taeao. E na o i latou e iai ni a latou galuega patino o le a faatagaina e ulufale a o leʻi oo i lea taimi.

⁵ O le Faaaloalo Loloto mo Ieova ua Faagaeetia ai i Tatou ia Auai: Sa fautuaina e Paulo Kerisiano Eperu ia “tuuina atu le auaunaga paia i le Atua ma le mataʻu ma le migao.” (Epe. 12:28, NW) Ua sauniunia la tatou tauaofiaga itumalo i lenei tausaga e fesoasoani ia i tatou ia faia lena lava mea. Atonu o le a fetaiai ma ni faafitauli e tofotofo ai lo tatou maumauai e auai. O nei faafitauli atonu e foliga mai e pei o ni mauga, peitai e mafai ona tatou manumalo mai ai e ala i le fesoasoani a Ieova. (Mata. 17:20) Afai e lē o mafai ona fuafua lau malologa ina ia faaaofia ai le tauaofiaga atoa i le taeao o le Aso Faraile seia oo i le afiafi o le Aso Sa, po ua e tatalo ea ma alu atu loa i lou pule e faanoi mo na aso mālōlō? (Iako. 1:6-8) O tamaiti aʻoga o le a auai i se tasi o tauaofiaga e muamua amata a o faia pea aʻoga, e ao ona logoina ma le āva o latou faiaoga, o le a latou lē aooga i le Aso Faraile ona o lenei vaega tāua o la latou tapuaiga faalelotu.

⁶ Ia Faaaogā Lelei Lou Avanoa: O le ā lena mea? O le taimi ma le taumafaiga sa faia ina ia auai i le tauaofiaga. E lē o se mea poto le faia o ni fuafuaga lelei ina ia auai i le tauaofiaga itumalo i lenei tausaga ma toe foi i le aiga i le afiafi o le Aso Sa, ae misia se vaega telē o le polokalama. Pe o le a e tuumuli ese atu ea i le taimi o sologa lelei ai se faigaai, ina ia faia isi mataupu? Sa matauina i isi tauaofiaga i le tausaga talu ai le iai o nisi na tuumuli ese ina ua maeʻa vaega o le taeao. Peitai ane, o lo tatou taumatuaina faaleagaga ma le mataʻu i le Atua, e ao ai ona tatou lē faatagaina i tatou e misia so o se mea ua saunia e Ieova mo i tatou.—Faatusatusa i le 1 Korinito 2:9, 10.

⁷ Atonu o le toatele o i tatou e lē o mafaufau e vave tuua le tauaofiaga. Peitai, e mafai lava ona tatou misia se vaega tele o le polokalama. E mafai faapefea ona tupu lenei mea? E ala lea i lo tatou lē muai fuafuaina ia faamautinoa ua tatou maua le tele o aogā mai le tele o vaega ua tauaaoina. Tatou te mananao e amata le aso i le vave e tatau ai i le taumafaina lelei o se mālū o le taeao, ma ia faia isi mea e manaomia, ina ia mafai ai ona tatou nofoi i o tatou nofoa a o leʻi amataina le polokalama. O le lava lelei o le moe i le po, e tāua foi ina ia tatou mataalia ai ma mafai ona uai atu i le polokalama atoa o le aso.

⁸ O se auala ua faamaonia le seleseleina mai ai o le tele o aogā mai le polokalama, o le faia lea o ni faamaumauga tatau. E tutusa lava le tāua o le faia o faamaumauga a ē laiti e pei foi ona faia e le au matutua. Ua faapea mai se faamatalaga a se teine talaʻi e 16 ona tausaga: “Ou te tusia i lalo mau na taʻua i le lauga. Ona autaluina lea o le lauga i le fale.” Ua faaopoopo mai se tasi alii e 16 ona tausaga e faapea: “Ou te faamaumauina i lalo manatu tāua. E fesoasoani lea i loʻu uai atu i le polokalama.” I le tulaga masani lava ia, e pau lava mea e te manaomia moni mo le polokalama, o lau Tusi Paia, se tusi pese, se tamai api, ma se peni po o se penitala. O le mea moni, o mātua e iai a latou fanau iti, e tatau ona latou tausia o latou manaoga, ae e sili atu ona aua neʻi faalavelaveina i tatou ma isi i le soona avatu o ni kula tetelē o meaai, ma nisi mea totino se tele.

⁹ O nisi uso latou te pueina le polokalama i le faaaogāina o se laaupueleo po o se mea pueata vitiō, mo le toe taina i le fale pe a uma le polokalama. O se mataupu e fitoi tonu i le tagata lava ia lenei mea, peitai ua iloa e nisi, o le taimi lava e toe foi atu ai i a latou feau masani i le aiga, e leai se taimi e toe faaalia ai lena mea sa pue. E faaopoopo atu i ai, atonu e misia nisi manatu autū i se lauga i le tau faia o le mea e pue ai le tauaofiaga.

¹⁰ E ao ona tatou faia ni taumafaiga aʻiaʻi ina ia tatou nonofo i o tatou nofoa a o leʻi amataina le polokalama. E ui atonu o loo matuā sologa lelei a tatou fetufaaiga o mea tutupu fiafia ma a tatou uo ua leva, ae a oo loa i le taimi e faasilasila mai ai e le taitaifono o le a amata le polokalama, o le faaalia la o le faaaloalo mo i latou o i le polokalama, ae maise lava o o tatou uso, o le vave faamuta loa o a tatou talanoaga ma nofoi i o tatou nofoa.

¹¹ O tauaofiaga itumalo, e masani lava o ni faatasiga e olioli ai ona o le tele o faamanuiaga a Ieova. Tatou te maua mai ai aogā i le itu faaleagaga, ma le faaletino. E tatau foi ona manatua e tele ni tupe faaalu o aofia ai i le faaaogāina o le fale o faia ai le tauaofiaga. Ua sii foi i luga le tupe faaalu mo le saunia o meainu i le tauaofiaga i tausaga taitasi. Pe faapefea la ona faatupeina uma nei tupe faaalu? E ala lea i a tatou foai tauofo, a lē i le tinoitupe, po o siaki e totogi atu i “Molimau a Ieova.” Ua ogatusa lenei ma le agaga o loo i le Salamo 96:8, o loo faalaeiauina ai i tatou ina ia ‘avatu ia Ieova le viiga ma avatu taulaga [meaalofa] i ona lotoā.’

¹² Pe o le a Maua se Viiga i Lau Amio? I tausaga taitasi, e faamanatu mai ai e le lomiga o La Tatou Faiva o le Malo o Iulai le tāua o amioga lelei a o auai i le tauaofiaga itumalo. O le mea moni, e tatau i taimi uma lava ona avea a tatou amio ma faaaoaoga, ae pe a tatou potopoto loa i ni faatasiga tetele, e masani lava ona tilofaia totoʻa i tatou e i latou e lē o i le upu moni. O a tatou amio, pe lelei pe leaga, atonu e leotele atu lea na i lo o la tatou talaʻiga. Tatou te mananao e viia Ieova i mea tatou te tautatala atu ai ma faia.—Faata. 27:2; 1 Pete. 2:12.

¹³ Ina ua maeʻa le Tauaofiaga Itumalo i le tausaga talu ai o “Aʻoaʻoga Mai le Atua,” sa matauina ai e se tasi tamaloa e leoleo i se tasi o fale talimalo e faaapea: “O se vaega e sili ona lelei lenei o tamaiti ua ou mataia talu mai le tele o taimi ua mavae.” Ma ina ua uma lana faamatalaga e uiga i le leaga o amio ma le faaleaga mea o isi vaega o tamaiti, sa faaopoopo mai o ia e uiga i tamaiti Molimau a Ieova e faapea: “Latou te amio lelei ma o se fiafiaga le faatasi atu i ai. Ou te moomoo maimau pe ana faapea isi tauaofiaga na faia i inei.”

¹⁴ Na faapea mai se faamatalaga a se tasi tamaloa fai nusipepa i le Iunaite Setete e uiga i le tauaofiaga: “Sa laeiina e fafine ma teine laei lelei, ma o tamaloloa ma tama sa laei o latou suti ma fusiua. Sa latou filigā e fai faamaumauga a o latou faalogologo atu i failauga mo aso e fa. Ma afai e moni le upu e faapea o le tumamā e pito atu i le faaleatua, ia ua faaalia la e Molimau a Ieova le maualuga tele o lena tulaga e atagia mai ai le faaleatua.” E ui i lea, e lē o tala uma na iai lena tulaga taʻuleleia.

¹⁵ I nisi nofoaga, ua soonafai ai e tamaiti le faaaogāina o vaitāele. Latou te aafia ai i le taaalo lē pulea, i le iai pea i le vaitāele i taimi ua faasa ai. O lenei tulaga, e masani lava ona tupu pe a leai se tagata matua e vaaia.

¹⁶ I se isi tauaofiaga sa lipotia mai ai e faapea sa tele le feoai solo o tagata a o faagasolo vaega o le polokalama. Pe ā ma le selau (o le toatele o tamaiti) i latou sa faitauina i le faapaologa i le taimi o le polokalama o le aoauli o le Aso Toonai, ua faaalia ai le manaomia tele o le toleniga a mātua. O le feofeoai solo i le faapaologa, e faapogaia ai le tele o le paʻō e faalavelave ai ia i latou o loo taumafai e faalogologo. E toaitiiti lava i latou e iai ni mea e tatau ona faafoeina a o faagasolo le polokalama, ae pe lē ao ea ona nonofo i nofoa le isi vaega uma o i tatou, ma faalogologo atu ma le lē gasē?

¹⁷ O le toatele lava o mātua e tautatala malosi i a latou fanau ina ia auai i sauniga a le faapotopotoga i vaiaso taitasi. Pe lē tatau ea ona faapena foi lo latou tautala malosi i le faamautinoaina o nonofo faatasi a latou fanau ma i latou, ma ia aua neʻi feoai solo i le faapaologa a o faagasolo le polokalama? O le fale o loo faia ai le tauaofiaga, ua avea o se Maota tele o le Malo, peitai o le faiga o mea a Satani lenei tatou te iai, ma e faigofie ai lava mo tagata lē taupulea ona ulufale atu i le fale ma ni uiga lē talafeagai. E MANAOMIA ONA E ILOA PO O FEA O IAI LAU FANAU MA PO O Ā A LATOU MEA O LOO FAI I TAIMI UMA.

¹⁸ Laei ma Teuga: Ua tatou ola i se tupulaga o loo manatu ai tagata e lē afaina ofu tafao, po o ni foliga e atagia mai ai le lē manatu i isi tagata. E toatele tagata e ō i lotu ma konoseti pe faiʻaiga foi i ni faleaiga i ni laei tafao ua matuā lē manaia lava i le vaai. O le faamatalaga sa sii mai i le palakalafa e 14, ua faaalia ai e iai i latou o loo tulimataia pea laei e mamalu, ae maise lava i le fesootai atu i tapuaiga. O laei e faatalale ona fai ma lē manaia, ma teuga e lē fetaui, e taʻu atu ai mea e tele e uiga ia i tatou. Ia manatua o le fale o loo faia ai le tauaofiaga ua lē o se fale taalo i taimi o le tauaofiaga. Ua avea ma Maota o le Malo i lea taimi. O nisi tagata e ofu lelei mo le tauaofiaga ae a uma le polokalama, ua ō i faleaiga ma isi nofoaga ma laei e lē talafeagai.

¹⁹ E manaomia ona faamanatu i sui papatiso e iai ni ofu tāele e lē fetaui mo le papatisoga. E ao ona onomea le ofu ma ia fetaui mo le papatisoga. O ai e ao ona faamautinoaina lenei mea? O toeaina e paʻū i ai le vaavaaia o i latou e papatiso mai i a latou faapotopotoga ina ia aua neʻi avea se tasi ma mea e faatausuai ai. (2 Kori. 6:3, 4) O lenei tulaga o le a lē faaaogāina ai ofu tāele e faaletonu i le vaai ma mitiafu e iai ni faaupuga faalelalolagi po o ni faasalalauga. E talafeagai mo toeaina ona talanoa i lenei mataupu ma le tagata o le a papatiso pe a autaluina fesili i le tusi Our Ministry.

²⁰ Fale Talimalo: E masani lava ona manaomia le lava o le onosai ma le agaalofa pe a tatou taunuu atu i se fale talimalo. Tatou te manaomia ai ona faaalia fua o le agaga i taimi uma ae maise lava pe a feutagai ma le au faigaluega i fale talimalo ma faleaiga.

²¹ Masini Pueleo ma Ata: E pei ona taʻua atu i le amataga, o le faaaogāina o masini pueleo, ae maise lava o lipine e pue ai vitiō, o le filifiliga lea a le tagata lava ia. Afai e te faaaogāina ia mea, faamolemole ia faaalia lou magafagafa mo i latou o loo i ou autafa. Atonu o le a fai oe ma faalavelave, e tusa lava pe o faia i le mea o loo e nofo ai. E lē tatau i se tasi ona ia punitiaina le vaai a isi au usufono a o pueina ata vitiō. E lē gata i lea, e lē faatagaina masini pueleo po o se isi lava ituaiga o mea e tasulu atu i uaea po o masini o loo faaaogā mo le faaleotele leo o le fonotaga, ma e lē tatau foi ona faalavelaveina ai auala o savalia e tagata.

²² Nofoa: O faafitauli e tutupu mai i le taofiaina o nofoa o loo manaomia ai pea se taumafaiga. O lea, matou te mananao e toe faamanatu atu i tagata uma e faapea: O NOFOA E MAFAI ONA TAOFI MO NA O TAGATA LAVA O LOU AIGA MA NISI O TOU MALAGA FAATASI MAI I LAU TAAVALE. I nisi tauaofiaga o le taimi lava e tatala ai le fale i le 7:30 i taeao taitasi, e lolofi atu ai uso ma tuafafine e ulufale atu i le fale. Ua matauina “o i latou o le auuso o ē savavali atu e sailia ni o latou nofoa e pei ona masani ai, e faatoʻā maua lava ni o latou nofoa i le pito i luga o le fale. E toatele latou te taofiina le toetoe lava o le laina nofoa atoa, ae mulimuli ane o le tele o na nofoa sa taofia e lē nonofo ai ni tagata.” O nei faiga lē mafaufau ua foliga mai o loo tumau pea e ui lava ina faamanatu soo mai. Pe e lē ao ai ea la ona tatou manatunatu ifo i o tatou loto i lenei mataupu ma mafaufau loloto i mataupu silisili i le Filipi 2:3, 4?

²³ I tauaofiaga taitasi ua faia ai sauniuniga mo i latou e iai manaoga faapitoa, e pei o ē matutua ma ē e lē atoatoa le malosi o le tino. Faamolemole, ia mautinoa e te lē o nofo ai i se tasi o nei nofoa pe afai e te lē o iai i lea tulaga. E lē gata i lea, ia nofouta e fesoasoani i se tasi o iai ni ona manaoga faapitoa i le saili o se nofoa pe afai e lē o iai se tasi e vaaia lea tagata.

²⁴ Tauaaoina o Tusi ma Meainu Malulu ma Meainu Vevela: Pe a tatou potopoto mo le tauaofiaga itumalo, tatou te tofo ai i le fau ma soloi o meaai faaletino ma faaleagaga. E tatau ona tatou talia ma le faafetai na mea uma, ma ia lē faamaimauina se mea. (2 No. 31:10; Faata. 3:10; Ioa. 6:12) E ui ina e leai ni mea taumafa e saunia i le tauaofiaga itumalo, ae na matauina i ni tausaga e leʻi leva tele atu, le aveina o ni vaiinu ae lē faaaogāina. Pe tatou te mananao ea e faaalia le talisapaia mo sauniuniga uma a Ieova? Afai o lea, o le a tatou aveina la na o mea o loo tatou manaomia, ma lē faamaimauina ai se vaiinu. Mātua e, po o malamalama ea lau fanau i le tāua o le lē faamaimauina o se meaai po o se vaiinu? E ao ona e faia se faaaoaoga lelei mo i latou. Faamolemole aua neʻi aveeseina atu vaiinu mai le nofoaga o le tauaofiaga mo le faaaogāina i se isi taimi. Ina ia alofia le soona tumutumu atu, e sili ai ona lelei pe a alu atu na o se tagata e toatasi o le aiga e aumai ni vaiinu mo le aiga atoa, ma ia aua neʻi soona aumaia e sili atu na i lo le mea o loo manaomia i lena taimi. Faamolemole, ia fuafua e aumai la oe lava taumafataga. Matou te talisapaia le agaga lelei ua faaalia e le toatele, o ē latou te aumaia faatele a latou taumafataga ina ia faasoasoa atu i isi. O lena uiga limafoai ua siitia atili ai le agaga o le tauaofiaga.

²⁵ Ia Iuni 3, 1994, na amataina ai le tauaofiaga muamua o Tauaofiaga Itumalo o le “Mataʻu i le Atua” i le Iunaite Setete, ae o a tatou tauaofiaga o le a amata i le masina o loo sosoo mai. Po ua maeʻa ea au sauniuniga, ma po ua e nofo sauni e olioli i le aufaatasiga ma uso i na aso e tolu ma mea lelei faaleagaga? O la matou tatalo faatauanau ia Ieova ina ia faamanuia mai ia tou taumafaiga ina ia faaavanoaina ai lena taimi ma ia fafagaina i le laoai o mea lelei a Ieova i le Tauaofiaga Itumalo o le “Mataʻu i le Atua.”

[Pusa i le itulau 6]

Toe Faamanatu o le Tauaofiaga Itumalo

Papatisoga: O sui papatiso e ao ona nofoi i o latou nofoa i le vaega ua faatulagaina a o leʻi amata le polokalama i le taeao o le Aso Toonai. Ua matauina le laei e nisi o ni ofu e lē mamalu ma lē fetaui ma lea sauniga. E ao i le tagata o loo fuafua e papatiso ona aumai se ofu tāele e onomea ma se solo. Pe a uma le lauga o le papatisoga ma le tatalo e faia e le failauga, ona fofoga atu lea e le taitaifono faatonuga pupuu i sui papatiso, ma mulimuli ane usuina le pese. Pe a maeʻa le fuaiupu mulimuli o le pese, o le a faasino atu e le au tautua ia sui papatiso i le mea e faia ai le papatisoga. Talu ai o le papatisoga o le faailoaina lea o le tuuina atu o se tasi, o se mataupu tāua e patino i le tagata lava ia, e lē manaomia ai ona faia ni faauouooga po o ni uugalima a ni tagata a o papatisoina.

Pine Fatafata: Faamolemole ia laei mai le pine fatafata o le 1994 i le tauaofiaga a o malaga mai i le tauaofiaga pe toe foi atu i le fale. E masani ona aumaia e lenei mea se avanoa e avatu ai se molimau lelei a o tatou femalagaai. Na matilatila le saʻo o lenei mea i le tauaofiaga sa faia talu ai i Moscow ma Kiev. O le laeiina o pine fatafata o le a faafaigofie ai foi lou mauaina o meainu vevela ma meainu malulu i le tauaofiaga. O pine fatafata ma o latou faavaa, e ao ona maua atu i la outou faapotopotoga, auā e lē mafai ona maua i le tauaofiaga. Ia manatua e tatau foi ona tauaveina lau pepa Faatonu Faafomai. O sui o aiga Peteli ma paeonia e ao foi ona iai ia i latou a latou pepa faamaonia (identification cards).

Apitaga: O le toatele o ē auai i tauaofiaga i le oganuu a la tatou lālā e mafai lava ona nonofo i o latou aiga po o le fai foi o ni fuafuaga mo o latou lava apitaga. Peitai, afai o e fia manaomia se apitaga, faamolemole ia e tusia se tusi e otooto uma ai mea o loo e manaomia, ona tuu atu lea i le failautusi a la outou faapotopotoga, mo lona faaooina atu i le matagaluega o apitaga o le tauaofiaga.

Taavale Toso mo Pepe: I le tele o atunuu, e lē mafai ona faaaogāina ai ni taavale toso o pepe i ni fonotaga i le lautele. E tusa ai ma aiaiga a le au tinei mu, e faasaina ai ona tuu nei taavale i faapaologa ma auala po o va foi o nofoa. Talu ai o le tumutumu o tagata e oo ai i se tulaga o le feomai, e matuā matautia ai taavale pepe e lē gata i le pepe ae faapena foi i se tagata atonu e lāvea ai. O lea, faamolemole aua neʻi aumaia na mea i le mea e faia ai le tauaofiaga. E ui i lea, o nofoa mo pepe e faatagaina auā o nei nofoa e mafai ona faamau i nofoa e sosoo ma mātua. O lau lagolagosua i lenei tulaga e matuā talisapaia.

Auaunaga Tauofo: Pe e mafai ona e faataatia ese se taimi i le tauaofiaga e fesoasoani ai i se matagaluega? O le auauna mo o tatou uso, pe i le na o ni nai itula, e telē sona sao ma e aumaia ai foi se tulaga faamalieina. Afai e mafai ona e fesoasoani, faamolemole ia lipoti atu i le Matagaluega o Auaunaga Tauofo i le tauaofiaga. O tamaiti e i lalo o le 16 tausaga le matutua, e mafai ona faia sa latou tauofo i le galulue faatasi ma o latou mātua po o se tagata matua maufaatuatuaina.

Upu Lapatai: O le mataala pea i faafitauli e ono mapuna aʻe, e mafai ona puipuia ai i tatou mai faigata e lē manaomia. E masani lava, o ē gaoi ma tagata lē taupulea, latou te avea mea a tagata e lē o iai i o latou aiga po o taavale. Ia loka lau taavale i taimi uma, ma ia aua neʻi tuua se mea i le taavale e tilotilo atu i ai se tagata ma faaosoosoina ai o ia e gaoi. Ua iloa lelei e le au gāoi ma le au seʻi ato lo latou manuia i tauaofiaga tumutumu. Ua lē o se mea poto ai la le tuua o se mea tāua i lou nofoa. E te lē o mautinoa i tagata uma o loo tou faatasi po o ni Kerisiano uma. Aisea e avatu ai se faaosoosoga? Ua maua mai foi i lipoti ni taumafaiga e faia e tagata ese ina ia māunu mai tamaiti. IA VAAI LAU FANAU I TAIMI UMA.

O televise o loo maua i le tele o fale talimalo, e masani lava ona faamatilatila mai ai ata lē mamā. Ia nofouta i lenei mailei, ma ia aua neʻi faatagaina lau fanau e tuulafoai e matamata na o latou i le televise i le potu.

Faamolemole ia aua neʻi telefoni atu i le pulega o le tauaofiaga o vaaia le fale e saili mai ai ni faamatalaga e uiga i so o se mataupu mo le tauaofiaga. Afai e lē maua le faamatalaga o loo manaomia i toeaina, faamolemole ia tusi atu i le tauaofiaga i le tuatusi lea e mafai ona e mauaina mai i le failautusi o le faapotopotoga.