Tauaofiaga Itumalo 1992 “O Ē Faasusulu Atu le Malamalama”
1 Na fetalai Iesu e faapea, o le a avea ona soʻo ma “malamalama o le lalolagi.” (Mata. 5:14) I le tuufaafeagai, ua matuā faateteleina lava le pogisa faaleagaga ma itu tau amio a le lalolagi i aso taitasi ua tuanai atu. (Isaia 60:2; Roma 1:21) Ua sili atu ai ona uigā la tatou avega tauave o le avea ma ē faasusulu atu le malamalama, a o tatou latalata atu i le iʻuga o lenei faiga o mea. I le amanaia o le vaega tāua o loo tatou faia, ua tatou naunau ma faamoemoe ai e tepa taulai atu ina ia auai i le Tauaofiaga Itumalo 1992 “O Ē Faasusulu Atu le Malamalama.”
2 Ua loa ona avea tauaofiaga o se vaega e sili ona tāua o o tatou olaga o ni tagata tapuai o Ieova. Sa faapotopoto faatasi le faitau selau ma le faitau afe o tagata Isaraelu anamua i ni faatasiga faapitoa i le gasologa o le tausaga mo ni tausamiga eseese, po o ni ‘tauaofiaga paia.’ (Levi. 23:1-36) O na faatasiga mataʻina, sa saunia ai se avanoa e tapuai atu ai ia Ieova le Atua, e mafuta ai ma se aofaiga toatele o tagata, ma aʻoaʻoina ai e ia. Ua maua foi i tauaofiaga i aso nei ni avanoa faapena, ma o loo olioli ai le faitau miliona o tagata o le Atua. E aunoa ma le masalosalo, sa tofutofusia le toatele o outou i faamanuiaga na maua e le 1,370 o ē na auai i le tausaga ua mavae, i Tauaofiaga Itumalo e lē ma faagaloina “O Ē Alolofa i le Saolotoga,” ia sa usuia i atunuu e fa i lalo o le Lālā i Samoa i Sisifo. Sa olioli foi nisi o outou e iai i le toʻa 22 na papatiso. O le taimi la lenei e amata ai sauniuniga ina ia auai mo le isi faatasiga faafiafia loto e tolu aso—o le Tauaofiaga Itumalo 1992 “O Ē Faasusulu Atu le Malamalama.” Po o le a e auai ea ma lou aiga i inā?—Teu. 31:12.
3 Se Tauaofiaga e Tolu Aso: Mo le Lālā i Samoa i Sisifo, o le a tatou faia ai se faasologa e fa o Tauaofiaga Itumalo 1992 “O Ē Faasusulu Atu le Malamalama,” e pei ona mulimuli mai: Amerika Samoa, Lee Auditorium, Utulei, Aokuso 14-16; Toga, Tongan National Centre, Nukuʻalofa, Aokuso 27-29; Samoa i Sisifo, Apia Park (faa-Samoa) ma le Maota o le Malo (faa-Peretania), Apia, Setema; 25-27; Tuvalu, Maota o le Malo, Funafuti, Tesema 17-19. O le a amata le polokalama i le 10:20 i le taeao o le Aso Faraile, ae o le a faamutaina i le pese ma le tatalo e tusa o le 4:15 i le afiafi o le Aso Sa. O le a mananao tagata uma o Ieova ina ia auai atu mo le polokalama atoa. Po ua e faia ea se filifiliga totino ina ia auai i inā mo aso uma e tolu? Ia mautinoa ua e tatalo mo le faamanuiaga a Ieova i au taumafaiga.
4 E ao ona faaosofia e le polokalama atoa lo tatou uaʻi atu, mai le lauga amata i le taeao o le Aso Faraile seʻia oo atu i upu faaiʻu i le afiafi o le Aso Sa. O le a saunia ma tauaaoina faamatalaga faagaee loto i lauga, faataʻitaʻiga, faatalanoaga, atoa ma se tala. Ia fuafua ina ia iai i lou nofoa a o leʻi taitai ona amata le polokalama i le Aso Faraile. E masani lava i le uluai aso, ona manaomia se taimi tele mo le pakaina o taavale, sailia o ni nofoa, ma isi mea faapena. O lea, ia lava se taimi e faia ai au gaoioiga. E ala i le uaʻi atu i vaega uma, ma faatali ai pea mo le pese ma le tatalo faaiʻu, o le a tatou mauaina ai aogā atoatoa o le polokalama, ma faaalia ai lo tatou talisapaia mo lo tatou faaeaga o le auauna o ni ē faasusulu atu le malamalama.
5 Faalogologo Ma Le Lē Gasē: Ua folafola mai e le faisalamo: “Ua ou mafaufau i au tulafono. Ua tele lava loʻu naunau i lau tulafono; ou te mafaufau i ai i le aso atoa.” (Sala. 119:95e, 97) I faatasiga uma lava tatou te faapotopoto ai ina ia aʻoaʻoina e Ieova, o loo iai se manaoga ina ia uaʻi atu ma faalogologo, e lē gata i o tatou taliga ae faapea foi ma o tatou loto. E ui i lea, e sili atu ona faamamafa o le manaoga mo lenei mea, pe a tatou auai i faatasiga tetele e pei o se tauaofiga itumalo. E tele naʻuā mea e taaʻina ai la tatou vaai ma la tatou faalogo. Pagā so tatou gau pe afai tatou te faasaoina le taimi ma tupe ina ia auai i le tauaofiaga, ae foi mai i le aiga ma na o sina vaega itiiti o manatu aogā, i le auala e mafai ai ona tatou faaleleia, i le avea ma ē faasusulu atu le malamalama! E tatau ona tatou faia le mea silisili tatou te mafaia e faafetaiaia ai so o se faatosinaga pe afai tatou te fia maua aogā atoatoa mai le polokalama. E mafai faapefea ona tatou mautinoa o le a matuā mauaa faamatalaga i o tatou loto ma mafaufau i le faaiʻuga o le polokalama o le tauaofiaga?
6 O le faalogologo o se tomai lea e tatau ona atiina aʻe ma faaaogāina. O le uiga o le upu “faalogologo, o le lagonaina lea ma mafaufau loloto i ai.” Seʻi manatu i nai faufautuaga nei: (1) Ia faamuamua taumafaiga uma ina ia taunuu i le nofoaga o le tauaofiaga ma toafilemu lelei ai i taeao taitasi. O le a manaomia ai i lenei mea le faia o se fuafuaga ma le felagolagomai o le aiga. Afai e te vaivai ona sa leʻi lava lau moe, pe fiaʻai ona e te leʻi tausami i le taeao, po ua e lē mautonu ona o le faananati atu, o le a itiiti la se mea e te maua mai le polokalama. (2) Faatalitali ma manatu i le auala o le a taulimaina ai le matua. I le avea ma vaega o la outou suesuega faaleaiga, i nai vaiaso a o leʻi oo i le tauaofiaga, aiseā e lē tuu atu ai i sui taitasi e faamatala mai po o le ā le uiga ia te ia o le avea ma sē faasusulu atu le malamalama. A o auai i le tauaofiaga, ia toe autalu vaega taitasi o lena aso a o leʻi amata le polokalama. (3) Ia laei talafeagai, ma ia aloese mai le aai ma feinu a o faagasolo mataupu. Ua matauina nisi e toaitiiti i vaega o loo iai nofoa o maota fono po o malae fono o loo aai ma feinu ai a o faasolo le polokalama. O se lē faaaloalo lena, ma e faatosina ese ai isi, ma e faaalia ai le lē lava o le pulea totino.—Vaai Le Olomatamata o Novema 15, 1991, itulau e 8-18.
7 Tatou te mananao e uaʻi faapitoa atu lava i le faia o faamaumauga. Afai e fai faalelei, o le a fesoasoani lea ia te oe e mulimuli ai ma le matuā faaeteete i failauga, ma manatua ai mea o loo e faalogo i ai. Talu ai ona e faafa ona vave atu o tatou mafaufau na i lo o la tatou tautala, o le auala la e sili ona lelei e taofia ai le soona tafaofao solo o le mafaufau, o le faia lea o faamaumauga. E pei ona matauina e se tasi o tusitala e faapea, “E masani lava ona faigatā atu ona faalogologo i se lauga na i lo o le taulimaina.” Atonu o e manatua, sa lauiloa uluai Kerisiano i lo latou aveina i sauniga o fasi ipu ele ua taʻei, ma faamaumau ai mau i se vaitusi. Tatou te faafetai, ua mafai ona sili atu i tatou, ua maua se tamai ʻapi faamaumau, atoa ma se peni po o se penitala. O le tomai i le faia o faamaumauga, o lona uiga, ua lava na o ni manatu e tusia i lalo e taaofai ai le manatu autū, ae lē o le telē naʻuā o faamaumauga, tatou te faia ai pea tusitusiga. O le a lē taulau ai i lena la tatou fuafuaga, ma iʻu ai i le misia o manatu tāua o loo talanoaina e le failauga. Tusi i lalo na o upu autū, ma ia faaaogā faapuupuuga o upu. O le a sili atu ona aogā au faamaumauga ia te oe, pe afai e te toe autaluina i lena afiafi, atoa ma le taimi a o leʻi oo ina talanoaina e le faapotopotoga manatu autū o le polokalama i le Sauniga o le Auaunaga.
8 Pese ma Tatalo mai le Loto: O le usuina o viiga ia Ieova ma faalatalata atu ma le faaaloalo ia te ia i le tatalo, o ni vaega tāua ia o la tatou tapuaiga. (2 No. 30:21, 27) E mafai ona tatou auai uma i na vaega tāua o le tauaofiaga. I aso e tolu o la tatou Tauaofiaga Itumalo “O Ē Faasusulu Atu le Malamalama,” o le a tatou usuina ai pese e 18 o viiga ia Ieova, ma autasi ai i tatalo e valu i lo tatou Tamā faalelagi. E matuā lē mafaatauina lava na faaeaga. E sili atu mea ua foaiina mai e Ieova ia i tatou, na i lo o le 12 itula o aʻoaʻoga ma toleniga faaleagaga. O nai minute ua faaavanoaina mo le pese ma le tatalo, tatou te faafetai atu ai ia Ieova mo ana meaalofa agalelei, ma vivii atu ai ia te ia. Talu ai ona tatou te faalatalata atu ia Ieova i le tatalo o se faapotopotoga tele, pe tatou te mananao ea e silasila mai o ia ia i tatou o ni tagata manatu faapito ma le lē loto faafetai ona o le lē taulau ona tatou auai i le pese ma le tatalo, ona o le lē lelei o fuafuaga? E lē gata i lena, o le a tele foi aofaiga o lomiga e maua i tauaofiaga taitasi i lenei tausaga, o lea, o i latou o ē nonofo faalelei ai pea i o latou nofoa seʻia faaiʻuina le vaega, o le a latou lē misia. E faapena foi ona lē tatau ona alu ese se tasi a o leʻi faaiʻuina le vaega, ina ia tu muamua ai i le laina o meaʻai i lo o isi.—Mata. 7:12; Roma 12:10; Fili. 2:1-4.
9 Faia Mea Uma mo le Viiga o le Atua: I tausaga taitasi, e faamanatu mai ai ma le agalelei ia i tatou le tāua o uiga ma amioga lelei i tauaofiaga. E ao ona faamālō atu i le toatele ona o le manatu mamafa e utagiaina ia manatu ua toe faamanatu mai. A o tau lalata atu lenei faiga o mea i lona faaiʻuga, ua faateleina pea le uunaia o i tatou i mafutaga ma tagata i galuega ma aʻoga, o ē o loo valoia a latou amio i le 2 Timoteo 3:1-5. E mafai i na mafutaga ona matuā aafia ai lava i tatou pe afai tatou te lē leoleoina i tatou. Ia aua lava neʻi tatou mananao e faia se mea e faapogaia ai se tasi e ‘upu leaga ia i tatou, e peiseaī o i tatou o ni tagata amioleaga.’ (1 Pete. 2:12) Ua manaomia ai ona tatou matuā uaʻi atu i o tatou uiga faa-Kerisiano na i lo o le mea e masani ai. E ao i tagata uma ona vaavaai a latou amio i le tauaofiaga, ma so o se nofoaga i le lautele, e pei o fale mautotogi ma faleʻaiga. E naunau toeaina i o latou uso uma lava. (Fili. 2:4) E ao ona latou loto fesoasoani ma faamālō i isi mo a latou amio lelei. Ia saoloto foi toeaina e avatu se fautuaga alofa pe afai e manaomia, e tusa lava pe latou te lē masani totino ma se uso po o se tuafafine. So o se faafitauli matuiā e matauina, e ao ona lipoti atu i le Ofisa o le Pulega o le tauaofiaga.
10 O le ā e manaomia ona teu i o tatou mafaufau? E tatau ona āva ma faaaloalo i ē o loo pulea fale mautotogi. Afai tatou te soona tagisā pe tuua ai potu i se tulaga matagā i le vaai, atonu o le a lē toe ioe ai ē o loo pulea fale mautotogi e talia Molimau a Ieova mo nisi tauaofiaga i le lumanai. E manaomia lava ona toe faamanatu atu i nisi o i tatou lenei mea. Na o sina toaitiiti lava e mafai ona faaleagaina ai le talaaga lelei o le toatele.
11 Ua faatusaina le tagata fou o loo taʻua i le Efeso 4:24, i se ofu e ofuina e se tasi pe a uma ona toeseina uiga tuai. O lenei suiga i uiga, e ao ona atagia atu foi i o tatou laei e fai. Ua matauina nisi o uso ma tuafāfine, ae maise lava le au talavou, e matuā faatalalē lava i o latou laei, ua oo foi ina lē onomea i nisi o taimi. O isi latou te aveeseina o latou seevae ae tuu o latou vae i tua o nofoa o loo i o latou luma pe savavali foi i totini. Po o faapena ea ona tatou ō atu i le Maota o le Malo? E lē gata i lena, ua oofu atu nisi sui papatiso i mitiafu lima pupuu o loo i ai upu faifai ma faaupuga faalelalolagi, po o loo lolomi ai foi ni faasilasilaga mo oloa eseese. E ao i toeaina o ē latou te autaluina fesili ma i latou o loo sauniuni mo le papatisoga, ona faamautinoa ua malamalama i latou o ē o le a papatisoina, i laei e talafeagai mo lea faamoemoe.—Vaai Le Olomatamata o Iuni 1, 1985, itulau 30, ma Aperila 15, 1973, itulau 254-5.
12 Meapuʻeata ma Laau puʻeleo: E ui ina faatagaina meapuʻeata video, ae matou te lapatai atu ia i latou o ē faaaogāina, ina ia magafagafa i isi, ia filifili lelei mea e puʻe, ma ia faaaloalo mo i latou o ē atonu e lē mananao e puʻe o latou ata a o taumamafa, pe faalogologo i le polokalama, po o le taimi o tatalo. E ao i so o se tasi e puʻe video, pe puʻeina ni lipine, ona alofia le faalavelave po o le faasoesa i le aofia. E lē faasāina le puʻeina o nisi o vaega o le polokalama mai le mea o loo e alaala ai. Ae a o faagasolo vaega, o le a lē talafeagai mo so o se tasi ona fealuai solo i ala e feoai ai ma luma o le aofia, i le puʻeina o le polokama. Afai e tatau, e ao i tautua ona talanoa atu i so o se tasi e lē taulau ona faaalia le alofa faaleuso i lenei itu. Faamolemole ia manatua, e faasā ona sulu ni meapuʻeata video po o ni laau puʻeleo i le eletise po o mea faaleo tele leo i le tauaofiaga, e lē tatau foi ona faatūina so o se meapuʻeata video i le va o nofoa po o nofoaga e tutū ai taavale.
13 Mo Mātua: Matou te toe fia faamamafa atu le tāua o le faatonutonuina e mātua o a latou fanau i taimi uma, pe i totonu o le nofoaga o le tauaofiaga, po o le fale o loo mautotogi ai. (Faata. 29:15e; Luka 2:48) A o faagasolo le polokalama, ia mautinoa o loo uaʻi atu lau fanau ma latou faia ni faamaumauga. O le a maua avanoa i taimi o malōlōga e mafuta faatasi ai ma uo mai isi faapotopotoga.
14 Ina ia faataʻitaʻia le tāua o le iloaina o le mea o i ai lau fanau i taimi uma, i se tasi o tauaofiaga, na lipoti atu e se ave taavale laau pasese (taxi) i se uso, faapea na ia aveina ni teineiti laiti se toalua mai le mea o loo faia ai le tauaofiaga. E foliga mai sa la fuafua e ō ese mo le afiafi atoa, ma na la taʻu atu i le ave taavale e faapea o le a lē popole lo la tinā ia i laʻua seʻia oo i le 5:00 i le afiafi. Sa popole lenei ave taavale mo lo la lelei, ae e faapefea lo la tinā? Pagā se tulaga mataʻutia e iʻu i ai pe ana faapea e oo ia i laʻua se faalavelave, ae e lē taulia ai le faalumaina o le suafa o le Atua ma ona tagata!
15 Talisapaia Lou Felagolagomai Atoatoa: E talosagaina lau lagolago mai i le mataupu o le taofia o nofoa. Faamolemole ia teu i manatu, NA O SUI LAVA O LOU AIGA MA NISI TOU TE MALAGA FAATASI MAI I LAU TAAVALE E MAFAI ONA TAOFIA I AI NOFOA. O le a iai ni vaega faapitoa e nonofo ai ē matutua ma ē e lē atoatoa le malosi i tauaofiaga uma. Matou te talosaga atu i tagata uma faamolemole, ia matau ma le faaeteete faailoilo ma mulimuli i taʻitaʻiga a le au tautua. Sa tau suʻe ni nofoa o nisi uso matutua i vaega e faigatā ona ui atu i ai, ona ua tumu i ē talavou nofoa o le vaega e nonofo ai ē matutua. Faamolemole ia magafagafa mo ē matutua. Matou te faamalūlū atu ona ua lē mafai ona faamalieina talosaga na aauina mai mo ni nofoaga po o ni potu e faaesea mo i latou e iai faafitauli e pei o allergies (mea e ilitata ma āfaina ai le soifua).
16 E fautuaina faapea ia tausisi e faaitiitia au mea totino e aumai i le tauaofiaga. Afai o se mea e lē ofi i lalo o lou nofoa, atonu e sili ona lelei pe a tuu i le fale.
17 E pei ona faia i le tausaga ua mavae, e ao i tagata uma ona fuafua e aumai a latou lava meaʻai i le tauaofiaga mo le ʻaiga o le aoauli, auā e leai ni meaʻai o le a saunia i le tauaofiaga. Peitai, o le a saunia vai vevela ma vaiinu malūlū e lē totogia mo i latou e auai i le tauaofiaga. Maeu se sauniuniga lelei. O le a faamāmā ai i lenei fuafuaga galuega i le tauaofiaga, mo le manuia o tagata uma. E lē taumatea o lena agaalofa o le faalapotopotoga a le Atua, o le a uunaia ai i tatou ma le loto faafetai e faaalia atu lo tatou talisapaia i ni auala faatino. (Faata. 11:25) Faamolemole ia faaeteete aua le faamāumauina vaiinu po o isi sauniuniga o le tauaofiaga. Tatou te lē mananao e melea le agaalofa ua faaalia, ma solia ai mataupu silisili faale-Tusi Paia.—Ioane 6:12.
18 E talisapaia e tagata o Ieova le mafai ona latou auaufaatasi i fale lelei, ina ia maua ai aogā mai le polokalama faaleagaga ua saunia. Tatou te talisapaia foi le tele o galuega ma mea aogā sa saunia i na faatasitasiga. I se tulaga matuā faaeteete ma se aofaiga tele o tupe ua faaalu e le Sosaiete, ua faia ai ni faatatauga ia lava ma totoe nofoa, ia faapipii mea faaleotele leo taugata, ia saunia vai vevela ma vaiinu malūlū, atoa ma le tele o isi galuega ina ia avea ai le auai i le tauaofiaga o se mea e olioli ai ma faafouina ai faaleagaga.
19 Afio mai i le Tauaofiaga Itumalo “O Ē Faasusulu Atu le Malamalama”: E ala i le auai i le Tauaofiaga Itumalo “O Ē Faasusulu Atu le Malamalama,” o le a faagaeeina ai i tatou e faalogologo i le pogai ua avea ai o se faaaloaloga, ma o se faaeaga le avea ma ē faasusulu atu le malamalama. O le a toe faamanatu mai ai ia i tatou e faapea, o se avega tauave matuiā lea. I le matuā uaʻi atu i mea e faalogologo ai i le tauaofiaga na i lo o le mea e masani, o le a faaleleia ai lo tatou tomai ma lo tatou talisapaia o a la tatou matafaioi o ni ē faasusulu atu le malamalama. Ia faia nei au fuafuaga ina ia auai i vaega uma lava, mai le pese amata i le Aso Faraile seʻia oo i le tatalo faaiʻu i le afiafi o le Aso Sa.
[Pusa i le itulau 8]
Faamanatu o le Tauaofiaga Itumalo
Api: E toaitiiti lava outou o le a manaomia ni api e faamautū i ai, ona a tou lē nonofo i lo outou aiga i le taimi o le tauaofiaga i lou lava atunuu, po o le faia foi o au lava fuafuaga ina ia nonofo ma au uo. Peitai, afai o e fuafua e auai i se tasi o isi tauaofiaga, ma e te manao e fuafua e le tauaofiaga sou api, faamolemole ia tusi mai auiliiliga i se tusi ma saini mai ai le failautusi o lau faapotopotoga. Ia auina mai lau tusi i le Ofisa o le Lālā, ona matou auina atu ai lea i le matagaluega o le tauaofiaga o le a e auai atu i ai.
Nofoa Faataavale o Pepe: E ui ina e seāseā ona faaaogāina ia mea i atumotu, ae atonu o loo e manao e aumai i le tauaofiaga. Afai o lea, faamolemole aua le faatuina i polotito, ma ala e feoai ai, po o le va o atu nofoa, ona e faasāina e tulafono a le au tineimu. Ia mulimuli i faatonuga a le au tautua i le mea e ao ona tuu ai, ina ia lē faalavelave ai i isi o loo auai i le tauaofiaga ma lo latou ui atu i le vaega o nofoa.
Papatisoga: E ao i sui papatiso ona iai i o latou nofoa, i le vaega ua faailogaina a o leʻi amata le polokalama i le taeao o le Aso Toonai. O ē taitoatasi ua fuafua e papatiso, e ao ona aumaia se ofu taele onomea ma se solo taele. A maeʻa le lauga o le papatisoga ma le tatalo a le failauga, o le a avatu e le taʻitaʻifono o lena vaega faatonuga pupuu i sui papatiso, ona taloina loa lea mo le pese. A uma le fuaiupu mulimuli, ona faasino atu lea e le au tautua o sui papatiso i le vaega e faatofu ai po o taavale e ave ai i latou i inā. Ona o le papatisoga o se faailoga lea o le tuuina atu o se tasi, e patino ma o se mataupu totino i le va o se tagata ma Ieova, ua leai la se sauniuniga mo le mea ua taʻua o le papatisoga faipaga, lea e toalua ai pe sili atu foi sui papatiso e faauōuō pe uulima a o papatiso.
Galuega Tauofo: E manaomia fesoasoani tauofo mo le sologa lelei o taualumaga o le tauaofiaga itumalo. E tusa foi pe na o se vaega o le tauaofiaga e mafai ona e galue ai, e matuā talisapaia lava lau auaunaga. Afai e mafai ona e lagolagosua, faamolemole logo i le Matagaluega o Galuega Tauofo pe a e taunuu atu i le tauaofiaga. E mafai foi e fanau e i lalo ifo o le 16 tausaga le matutua ona saosaolaumea mo le manuia o le tauaofiaga, ae e manaomia ona latou galulue faatasi ma se matua po o se tagata matua na te vaaia.
Pine Fatafata: Faamolemole ia laei mai pine fatafata ua fuafuaina faapitoa mo le tauaofiaga ma pe a malaga atu pe tuua foi le nofoaga o le tauaofiaga. E masani lava ona mafai ai ona tatou avatu se molimau lelei a o femalagaai. I le mataulia o oe o se sui usufono e ala i se pine fatafata ua tusia manino, o le a faafaigofie ai ona faafoe le fuafuaga ua faafaigofieina mo le saunia o vai vevela ma vaiinu malūlū. E ao ona maua pine fatafata e ala i lau faapotopotoga, auā o le a lē maua i tauaofiaga.
Upu Lapatai: Po o fea lava e tu ai lau taavale, e ao ona loka i taimi uma ma ia aua lava neʻi tuua ai se mea e iloa atu i totonu. Loka au mea totino i tua o lau taavale, pe a tatau ai. Ia leoleo foi i tagata gaoi ma ē lima tagoese, o ē e tosina ane i faatasiga tetele. E aofia i lena le lē tuua o so o se mea tāua i luga o nofoa i tauaofiaga. O loo iai nisi o lipoti e uiga i tagata lē pulea e taumafai e maileia ese le fanau laiti mai le nofoaga o le tauaofiaga. O lea, faamolemole ia faaeteete.
Ua lipotia mai foi faapea i nisi o faletalimalo, ua faigofie ona maua ai le avanoa e matamata ai i ata televise e faaalia ai amioga leaga po o ata matagā. Ua faamatilatila ai i lenei mea le manaoga ina ia alofia le tuufau o tamaiti e matamata i le televise i nei fale e nonofo ai.