Ia Faalautele atu Lau Oa o le Auaunaga o le Malo
1 Sa faatusaina e Iesu le faamoemoe o le Malo i se oa tautele. (Mata. 13:44-46) Po o faapei ea i tatou o tagata ia e taʻua i tala faatusa a Iesu, o ē na latou faatauina atu ā latou meatotino uma ina ia latou faatau mai ai se mea e sili atu lona tāua? Afai o lena le tulaga, o le a tatou faamuamuaina ai la le Malo o le Atua, e ui lava atonu e aofia ai ni lē sologa lelei ma le faatuatuanaia ai o oe lava.—Mata. 6:19-22.
2 Talu ai o la tatou auaunaga o le Malo o se oa, ua ao ai lava ona tatou faanaunau ina ia faalautele atu. O le ā ua faaalia e ō tatou ala totino o le olaga? Po o tatou faalauteleina atu ea la tatou galuega o le Malo? E mafai ona tatou faia faapea e ala i le auai i tafa eseese o le faiva, e aofia ai le galuega mai lea fale i lea fale, o le faia o toe asiga, le faia o suesuega faale-Tusi Paia, ma le molimau atu lē fuafuaina.
3 ‘Pe Mafai Faapefea ona Ou Faateleina Loʻu Sao?’ Mo le amataga o le tausaga fou faaleauaunaga, e lelei ai mo tagata taitoatasi ona toe autalu ana gaoioiga totino ina ia iloa po o le ā atonu na te faia ina ia faateleina ai le taimi i le faiva i le fanua ma ia fesili ifo ai: ‘Pe mafai ea ona ou faatulaga aʻu meafai ina ia mafai ai ona ou avea o se paeonia lagolago mai lea taimi i lea taimi po o le faia faifai pea? Pe a uma ni nai toe fetuutuunaiga, po o le a mafai ea ona ou ulu atu i le auaunaga faapaeonia sauatoa?’ O paeonia fou o le a amata i a Setema 1, e agavaa i latou e auai i le Aʻoga mo le Auaunaga Faapaeonia (Pioneer Service School) i le tausaga o sosoo mai.
4 O nisi tagata talaʻi ua fai ma ō latou sini totino le molimau atili atu lē fuafuaina. E masani ona maua mai ai i lenei galuega ni fua e sili ona lelei. Atonu e manaomia e nisi le faaleleia o le faia o toe asiga uigā, po o le amataina o suesuega fou faale-Tusi Paia.
5 Pe afai tatou te iloa e iai ni itu e faatapulaa ai la tatou faiva, o le ā e mafai ona tatou faia ina ia faalautele atu ai? O i latou ua taulau manuia i le ausiaina o ni sini tetele ua latou fautuaina le tatau ona tatou muai faia o se filifiliga mautu ina ia faamuamua manaoga o le Malo e tusa lava po o ā tulaga e tulai mai. (Mata. 6:33) E manaomia le faatuatua ma le faalagolago atoatoa i a Ieova. (2 Kori. 4:7) Ia saili lana fesoasoani e ala i le tatalo atu faamaoni ma le faatauanau. (Luka 11:8,9) E mafai ona tatou mautinoa o le a faamanuiaina e Ieova ā tatou taumafaiga faamaoni, ina ia faateleina atu ai so tatou sao i lana auaunaga.—1 Ioa. 5:14.
6 Ia talanoa atu i isi uso ma tuafāfine o ē ua taulau manuia i le faateleina o la latou faiva. Ia fesili atu i a i latou i auala na mafai ai ona latou foia toatuga e aunoa ma le faavaivaia ai. O mea na latou oo totino i ai atonu o mea tonu na o loo manaomia ina ia faamautinoa ai i a te oe o le faateleina o lau faiva o se mea e mafai ona fai.
7 Pe a e faitauina mataupu i Le Olomatamata po o La Tatou Faiva o le Malo lea e talanoaina ai le auaunaga i le fanua, ia e iloiloina faatasi ma le tatalo auala e mafai ona e faaaogaina ai manatu o loo faatutū mai i lau faiva. Ia faia faapea pe a e auai i sauniga a le faapotopotoga po o fonotaga. O fautuaga o loo tauina mai i lenei mataupu e faavae aʻe i se talanoaga lea sa avea ma vaega o le polokalama o le fonotaga a le matagaluega i le tausaga ua teʻa. O le mataupu muamua lena o se faasologa o mataupu na fuafuaina e fesoasoani ai i a i tatou ina ia usitaia ma faaaogaina timaiga na saunia e lena polokalama.
8 Sa matuā tāua i a Iesu lana faiva, i le avea o se mea sili sa ia manatu mamafa i ai. Na ia folafola mai: “O laʻu mea e ʻai, ia ou faia le finagalo o le na auina mai aʻu.” (Ioa. 4:34) Po o lo tatou lagona ea foi lena? Afai o lea, e mautinoa la o le a tatou sailia auala ina ia faalautele atu ai la tatou galuega ma tufa atu ai “mea lelei” i isi mai la tatou faaputuga oa.—Mata. 12:35; Luka 6:45.