Faamanuiaga e Maua Mai i le Galulue ma Isi
1 E te lagona e iai ni faamanuiaga e mafai ona olioli ai pe a galulue ma isi i le faiva? Sa faapena Iesu. E ui sa tele le seleselega ae toaitiiti le aufaigaluega, na ia aauina atu i le fanua soo e toʻa 70 “e taitoalua.” Maeu se taimi tauia mo i latou uma, ona sa talaʻi atu “i aai uma ma mea uma o le a maliu atu i ai o ia”!—Luka 10:1, 17; Mata. 9:37.
2 O se faageeloto le galulue faatasi ma isi. O nisi o i tatou e matamumuli ma faigata ona faafeiloai atu i ni tagata ese. A o le iai o se isi tagata i ou tafatafa, tatou te maua ai le mautinoa e tautala atu i le Afioga a le Atua ma le faamalosi. Pe a tatou ō faatasi ma se tasi, o le a faigofie mo i tatou ona faatinoina le galuega i le auala na aʻoaʻoina ai i tatou. (Faata. 27:17) Fai mai le tagata poto: “E sili ona lelei o le toalua i le toatasi.”—Fai. 4:9.
3 E lelei le galulue ma tagata talaʻi eseese ma paeonia. O aumea a le aposetolo o Paulo i le auaunaga, sa iai Panapa, Sila, Timoteo, ma Ioane Mareko, ma sa latou olioli i faamanuiaga e tele a o talaʻi faatasi. E mafai foi ona faapena i aso nei. Pe sa lua galulue ma se tasi ua leva i le upu moni? O le mātau o lona tomai e molimau atu, e te maua ai manatu lelei e aogā i a te oe e faaleleia ai. Pe na tou ō faatasi ma ni tagata talaʻi fou? Atonu la sa mafai ona e tufaina atu nisi o mea na e aʻoaʻoina ma mafai ai ona fesoasoani i a i latou ia atili ai ona uigā ma maua ai le olioli e sili atu i la latou faiva.
4 Po o e faia se suesuega faale-Tusi Paia i le taimi nei? Afai o faia, aisea e lē valaaulia ai se tasi o toeaina po o le ovasia matagaluega lua te ō? E aogā tele le faamasani o ā tatou tagata aʻoga o le Tusi Paia i ovasia. Afai e te faatalatū e faia le suesuega a o iai se toeaina, atonu o le a ia lotomalie na te faia le suesuega a o e vaavaai. Ona e fesili lea i ai mulimuli ane mo ni fautuaga i le auala e mafai ai ona e fesoasoani i le tagata aʻoga ia vave agaigai i luma.
5 Ia avea oe o se aumea e faalaeiau pe a tou galulue ma isi. Ia fai ni tala mautinoa o le oganuu. Aua le faia fua tala o isi pe faitio i faatulagaga a le faapotopotoga. Taulai tasi lou mafaufau i le faiva ma faamanuiaga a Ieova. Afai e te faia faapena, o le a lua foi ma lau aumea i le aiga ua matuā faafouina faaleagaga.
6 O ou tulaga, atonu o le a faafaigata ai i a te oe ona galulue e lē aunoa ma isi uso ma tuafāfine. Ae peitai, afai e mafai, aisea e lē fuafua ai e faaalu sina taimi e galulue ai ma se isi tagata talaʻi? O le a faamanuiaina ai oulua uma!—Roma 1:11, 12.