E Fesoasoani Paeonia i Isi
1 Na fetalai Iesu: “E tele le saito e seleseleina, a o le au faigaluega e toaitiiti ia; o lea ia outou aioi ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” Talu ai sa toaitiiti le aufaigaluega o le seleselega i le uluai senituri ae sa tele naua le oganuu sa tatau ona galueaiina, sa ono mafai la e Iesu ona faatonuina i latou ina ia oo atu i le toatele o tagata i le tele e mafai ai ma le tala lelei i le aauina atu o i latou taitoatasi. Na i lo o lea, sa ia “aauina atu o i latou e taitoalua.” (Luka 10:1, 2) Aisea ua taitoalua ai?
2 O na soo o ni soo fou ma e lei lava le poto masani. I le galulue faatasi, sa mafai ona latou aʻoaʻoina mai ai ma faalaeiau ai le tasi i le isi. E pei ona faaupuina ai e Solomona, “e sili ona lelei o le toalua i le toatasi.” (Fai. 4:9, 10) E oo lava i le taimi ina ua uma ona liligi ifo le agaga paia i le aso Penetekoso 33 T.A., na ō atu faatasi ai Paulo, Panapa, ma isi uso talitonu i le faiva. (Galu. 15:35) Maeu se faaeaga atonu na maua e nisi i le toleniina totino o i latou e na tane atamamai!
3 Se Polokalame Lelei e Toleni Ai: I le pei o lona soa i le uluai senituri, ua avea ai foi le faapotopotoga Kerisiano i aso nei ma faalapotopotoga talaʻi. Ua saunia foi e le faalapotopotoga ni toleniga mo i tatou. Ia i tatou taitoatasi, e tatau ona avea ma o tatou faanaunauga mai le loto le molioo atu o le tala lelei i se auala uigā tatou te mafaia. Ina ia mafai e nisi tagata talaʻi ona faaleleia le uigā o la latou faiva, ua saunia ai se fesoasoani.
4 I le Aʻoga o le Faiva o le Malo lea na faia talu ai nei, na faasilasila atu ai e le Sosaiete se polokalame mo paeonia ina ia fesoasoani i isi i le faiva i le fanua. Po o iai se manaomia mo lenei mea? Ioe, o loo iai. E sili atu i le tasi le miliona tagata talaʻi na papatisoina i le tolu tausaga ua mavae, ma o le toatele o i latou nei e manaomia se toleniga ina ia avea o ni tagata talaʻi e sili atu ona uigā i le galuega talaʻi. O ai e mafai ona faaaogā e faatinoina lena manaoga?
5 E mafai ona fesoasoani paeonia faataimi atoa. Ua saunia e le faalapotopotoga a Ieova mo i latou na le tele o fautuaga ma toleniga. Ua maua e paeonia faatonuga e fesootai atu ma o latou manaoga i le lua vaiaso na faia ai le Aʻoga mo le Auaunaga Faa-Paeonia. E latou te maua foi aogā mai a latou feiloaiga ma le ovasia matagaluega ma le ovasia itumalo, faapea foi taiala mai toeaina. E ui e lē o paeonia uma e iai le poto masani e pei o Paulo ma Panapa, ae ua latou maua se toleniga tāua, o loo latou fiafia e tufa atu.
6 O Ai o le a Maua ai Aogā? Pe e na o tagata talaʻi fou po o tagata fou faatoʻā uma ona papatiso e tatau ona auai? E leai! O loo iai ē talavou ma ē matutua ua loa tausaga talu ona iloa le upu moni, ae o le a talisapaia se fesoasoani i nisi o vala o le faiva. Ua faia e nisi se sao e sili ona lelei i le tufaina atu o lomiga, ae e faigata ona faia toe asiga po o le amataina o suesuega faale-Tusi Paia. O isi atonu e faigofie lava ona amataina ni suesuega faale-Tusi Paia ae ua matauina e faapea, e lē o agaigai i luma a latou tagata suesue. O le ā o taofia ai na tagata suesue? E mafai ona talosagaina paeonia ua iai le poto masani e fesoasoani atu ia i latou i nei vala. E iai nisi paeonia ua maua ni iuga lelei i le faatupuina o le naunau o le tagata ma amataina ni suesuega faale-Tusi Paia, ma i le tataʻiina atu o tagata suesue fou i le faalapotopotoga. O le a aogā tele lo latou poto masani i lenei polokalame fou.
7 O e iloa e lē o mafai e lau faasologa ona e maua ai se avanoa e lagolago ai i faatasiga e lē aunoa a le faapotopotoga mo le auaunaga i le fanua i le tele e te manao ai? Atonu e mafai ona lua galulue ma se paeonia i nisi taimi pe afai e lē o avanoa isi tagata talaʻi.
8 E Manaomia Ona Felagolagomai Lelei: E faalua i le tausaga, o le a faia ai e toeaina se fuafuaga mo tagata talaʻi o ē manaomia se fesoasoani totino ina ia auai i le polokalame, E Fesoasoani Paeonia i Isi. Afai e te manao ina ia mauaina lena fesoasoani, ia feiloai ma le paeonia lea ua tofia e fesoasoani atu ia te oe, ma fai se faasologa aogā mo le auaunaga, ma pipii i ai. Ia tausia la oulua tuugatala. A o lua galulue faatasi, mātau auala aogā o loo taulimaina ai le tala lelei. Ia iloiloina le auala e aogā ai nisi o faafeiloaiga. Ia manatunatu i fautuaga atonu e ofoina atu e le paeonia mo le faaleleia o lau taulimaga. A o e faatatauina mea ua e aʻoaʻoina, o le a faaalia lava lou agaigai i luma i le faiva, e lē gata ia te oe a o isi foi. (Tagai i le 1 Timoteo 4:15.) Ia fai ma masani le galulue faatasi pea, i le faia o se sao i vala uma o le faiva, e aofia ai ma le molimau atu lē fuafuaina ae taulai le vaai i se vala patino lea e manaomia ai se fesoasoani totino.
9 E fiafia le ovasia o le auaunaga e iloa le agaigai i luma o le a faia. Mai lea taimi i lea taimi, o le a ia fesili atu i le faisuesuega o le Suesuega Tautusi a le Faapotopotoga ina ia iloa ai po o faapefea ona e maua aogā mai le polokalame. O le a faapena foi ona fesoasoani ia te oe le ovasia matagaluega pe a ia asia le faapotopotoga.
10 E finagalo Ieova ina ia toleni ona tagata ma ia ‘faaauupegaina mo galuega lelei uma lava.’ (2 Timo. 3:17) Ia manatu i le fuafuaga, E Fesoasoani Paeonia i Isi, o se sauniuniga lelei e fesoasoani ai ia i latou o ē o loo faanaunau e faaleleia o latou tomai e talaʻi atu le upu. Afai o lou faaeaga le faia ai o se sao, ia faia faapea ma le loto faafetai, lotomaulalo, ma le olioli.