Le Faaaoaoga ia Mulimulitui i Ai
1 Na faataatia e Iesu le faaaoaoga e atoatoa ona lelei mo ona soo. E ui e lē mafai ona tatou ausia lona tulaga lelei atoatoa, ae ua faalaeiauina i tatou e “mulimuli atu i ona tulagāaao.” (1 Pete. 2:21) E ao ona tatou faanaunau ia matuā pei o Iesu i se tele e mafai ai, i le maelega e tufa atu le upu moni i isi.
2 Sa leʻi tau ina avea Iesu ma tagata talaʻi; sa avea o se faiaoga sili. “Ona matuā taufaiofo ai lea o le motu o tagata i lana aʻoaʻoga.” (Mata. 7:28) Aisea na matuā uigā ai o ia? Seʻi o tatou tagaʻi totoʻa atu i lana ‘auala na aʻoaʻo atu ai.’
3 Le Auala e Mafai ai ona Tatou Mulimuli i a Iesu: Na aʻoaʻoina Iesu e lona Tamā. (Ioa. 8:28) O lona faanaunauga sa iai, ia viia Ieova ma faamamaluina Lona suafa. (Ioa. 17:4, 26) I la tatou talaʻiga ma le aʻoaʻo atu, e ao ai foi ona faapena ō tatou faanaunauga, ina ia viia Ieova ae lē o le tatai mai o manatu o tagata i a i tatou.
4 O mea uma lava sa aʻoaʻo atu ai Iesu, na faavae mai i le Afioga a le Atua. Na ia faasino atu pea i mea o loo tusia i le Tusi Paia faagaeeina. (Mata. 4:4, 7; 19:4; 22:31) Tatou te mananao e tataʻi atu la tatou ʻau faalogologo i le Tusi Paia; ona tatou tuu atu ai lea o i latou ina ia iloa o mea o loo tatou talaʻi ma aʻoaʻo atu ai ua faavae mai i le pule e silisili ona maualuga.
5 Sa faaaogā e Iesu faaupuga e pupuu, e aogā, ma e lē faigata. Mo se faaaoaoga, i le faamatalaina o le auala e mafai ai ona faamagaloina i tatou e le Atua, na ia faalaeiauina ai i tatou ina ia tatou faamagalo atu foi i isi. (Mata. 6:14, 15) E ao ona tatou taumafai e faamalamalama le feau o le Malo i ni faaupuga faigofie.
6 Sa faaaogā ma le tomai e Iesu faataitaiga ma fesili ina ia faatupu manatu ai i isi. (Mata. 13:34, 35; 22:20-22) O faataitaiga i mea e masani ai, o mataupu o aso taitasi, e mafai ona aogā i tagata ina ia malamalama ai i aʻoaʻoga lavelave a le Tusi Paia. E ao ona tatou faia fesili e faalaeiauina ai la tatou ʻau faalogologo ina ia mafaufau i mea o loo latou lagonaina. O fesili faatupu manatu e mafai ona aogā i a i latou ina ia iloa ai faaiuga saʻo.
7 Na faaalu e Iesu le taimi e faamatala ai mataupu faigata i a i latou o ē na manaomia atili ni faamatalaga. O i latou na fiafia moni, e pei o ona soo, sa mafai ona latou maua le aano o mea na aʻoaʻo atu e Iesu. (Mata. 13:36) E ao foi ona tatou loto fesoasoani faapena pe a faia ma le faamaoni ni fesili. Pe a tatou lē iloa tali, e mafai ona tatou suesue atili i le mataupu ma toe foi atu i ai ma ni faamatalaga i se taimi mulimuli ane.
8 Na faaaogā e Iesu i lana aʻoaʻo atu, ni gaoioiga e momoli atu ai se lesona tāua. O le faaaoaoga o lenei mea, o lona mulumuluina lea o vae o ona soo, e ui lava o ia o lo latou Matai. (Ioa. 13:2-16) Pe afai tatou te faaalia le agaga loto maulalo, o le a faagaeetia ai i latou o loo aʻoaʻoina, ina ia faatino mea o latou aʻoaʻoina.
9 Sa uaʻi atu Iesu i loto o tagata ma lo latou alofa mo le amiotonu. Tatou te mananao foi e pāʻia loto o tagata. Tatou te taumafai ina ia pāʻia faanaunauga o loto o tagata uma ina ia tapuai atu i le peresona e sili ona maualuga, ma ia nonofo faatasi ma isi i le filemu ma le fiafia.
10 A o faagasolo le masina o Tesema, e mafai ona tatou fetufaʻi ma isi i mea ua tatou aʻoaʻoina e uiga i a Iesu, e ala lea i le ofoina o le tusi o Laʻu Tusi o Tala o Le Tusi Paia. O lo tatou faataitai atu i ala na aʻoaʻo atu ai Iesu e ono uunaia ai loto o ē faamaoni ina ia faalogologo a o tatou faamatalaina atu mea na ia aʻoaʻoina.—Mata. 10:40.