Faaalia le Talisapaia mo le Fale o le Atua
1 I taimi anamua o le Tusi Paia, na poloai ai Ieova i ona tagata e faapotopoto faatasi e lē aunoa i lona fale. (Levi. 23:2) O na faatasitasiga na fesoasoani i a i latou ia taulai pea ō latou mafaufau i le afioga a le Atua, ma maua ai ni taimi e mafaufau loloto ai, auaufaatasi ai, ma talanoaina ai Tulafono a Ieova. Na faatutumuina ō latou mafaufau i manatu o le Atua, lea na aumaia ai le tamaoaiga o faamanuiaga faaleagaga. O nei mea, sa avea moni o ni taimi fiafia. O lenei faatulagaga na siitia ai le autasi ma le tapuaiga mamā. E faapena foi ona tāua i aso nei le faapotopoto faatasi i le fale o le Atua.
2 E Mafai Faapefea ona Tatou Faaalia Tatou te Talisapaia Sauniga? Ua lipotia mai i nisi faapotopotoga le paʻū o le aofai o ē auai i sauniga. I nisi taimi, atonu ona o tulaga o se tagata ua taofia ai o ia mai le auai i se sauniga. Ae po o e faatagaina ea ni nai faafitauli faatauvaa e faalavelavea ai lou auai e lē aunoa i sauniga? Atonu o le a manatu nisi e nonofo i le fale ona ua iai sina tiga o le ulu po ua lagona foi le vaivai ona o le tele o feau i le aso. O isi ua faalavelavea ona o le mananao e faafiafia tauaiga lē talitonu o ē e mananao e asiasi mai. Ua oo foi ina misia e nisi sauniga ona o le fia matamata i se polokalama faapitoa i le TV po o nisi o taaloga. O le uiga talisapaia ua faaalia i nei tulaga, e manino mai e lē tutusa ma le faanaunauga mai le loto na faaalia e atalii o Koru e faapea: “O loo naunau loʻu agaga, ma ua lailoa i le fia alu atu i lotoā o Ieova.”—Sala. 84:2.
3 E ui lava i le anoanoai o meaai faaleagaga ua saunia i sauniga, ae e faigata lava i nisi o loo auai ona faalogologo lelei. Atonu e mamao lava le mea o loo mafaufau i ai, o loo mafaufau i popolega o le aso, po ua oo lava ina tulemomoe. Ua iloa e le toatele o le faia o ni faamaumauga pupuu e mafai ona latou mataala ai pea ma taulai atu ai i mea o loo faamatala mai. O le faia o ni faamaumauga, e mafai foi ona taofimau ai e le mafaufau faamatalaga. E faaopoopo i ai ma le muai sauniuni, o se fesoasoani lea e maua atoatoa ai aogā. Afai tatou te sauniuni lelei, o le a mafai ona “atili ai ona tatou naunau i mea ua tatou faalogologo i ai.”—Epe. 2:1.
4 E manaomia e tamaiti faapea ma tagata matutua ona taofimau i faatonuga ua aumaia i sauniga. O le a leai se mea e aʻoaʻoina e tamaiti pe afai o le a aumaia e mātua ni meataalo po o ni tusi ata i sauniga ina ia faanofo filemu ai i latou. O le a leai se aoaiga tatau pe afai e faataga tamaiti e taaalo, talanoa, fetagisi, pe faia isi mea e faalavelave ai i a i latou o nonofo latalata ane. O le ō soo e aunoa ma le manaomia i le faleese po o le ō i le paipa i le taimi o sauniga, e masani lava ona faaitiitia pe a iloa e le tamaitiiti, o le a la ō lava ma se tasi o ona mātua i taimi uma.
5 E Tāua le Vave Taunuu: I nisi taimi, e mafai e nisi o tulaga lē maalofia ona tatou lē taunuu ai i se sauniga i le taimi tonu, ae o le fai ma masani le taunuu atu ae ua uma le pese amata ma le tatalo, e faaalia ai lo tatou lē faaaloalo mo le fuafuaga paia na faia ai sauniga, ma la tatou matafaioi o le alofia o le faalavelave i isi. Ia manatua, o le pepese ma tatalo faatasi ma ō tatou uso i sauniga a le faapotopotoga, o se vala lea o la tatou tapuaiga. O le fai ma masani o le tuai atu i sauniga, o āuga na o le lē maopoopo po o le lē taulau i le faia o ni fuafuaga auiluma. O le vave taunuu, e faaalia ai tatou te faaaloalo ma talisapaia ā tatou sauniga.
6 A o matuā latalata mai lava le aso, ua atili manaomia ai le faapotopoto faatasi. (Epe. 10:24, 25) Seʻi ō tatou faaalia lo tatou talisapaia e ala i le auai e lē aunoa i sauniga, muai sauniuni, ia vave taunuu, ia uaʻi totoʻa atu, ma faatinoina mea ua tatou aʻoaʻoina.