Ia Uaʻi atu e Lē Aunoa i Lau Aʻoaʻo Atu
1 O le polokalama fou o le Aʻoga o le Faiva Faatiokarate o le a amataina i a Ianuari 1995. O le ā le mea fou i le polokalama? O le a avea le talafaasolopito ofoofogia o le faalapotopotoga a Ieova i aso nei e fai ma mataupu o talanoaga i le tele o lauga o faatonuga. A o faagasolo le tausaga, o le a talanoaina ai le tusi e 178 itulau, le Jehovah’s Witnesses—Proclaimers of God’s Kingdom. Talu ai o le a leai ni fesili autalu e mulimuli mai i le lauga o faatonuga mai le tusi o le Proclaimers, o le ā se mea e mafai ona tatou faia ina ia uaʻi atu ai e lē aunoa i ā tatou aʻoaʻoga ma maua ai ni aogā e aupito sili ona tele?—1 Timo. 4:16.
2 E ui lava ua uma ona faitau e le toatele le tusi Proclaimers, ae o le talanoaina o le mataupu i le faasologa o le aʻoga, o le a fesoasoani i tagata uma e talisapaia atili ai lo latou faaeaga faatiokarate. (Sala. 71:17, 18) Aisea e lē faataatia ese ai sina taimi i vaiaso taitasi e autalu ai mataupu tofia i le tusi o le Proclaimers?
3 Ni Lauga o Faatonuga e Olaola ma Faaoso Naunau: O lauga o faatonuga e fai mai i le tusi o le Proclaimers, e ao ona taulimaina i se uiga olaola ma faaoso naunau. E tatau foi ona latou faatauaina le aogā ma le tāua o faamatalaga, ia faaaogā ina ia faaloloto ai le faaaloalo mo le faalapotopotoga a Ieova ma ia talisapaia ai ō tatou faaeaga i le avea o ni auauna a le Atua. Afai e aumai e aiga taitoatasi se kopi o le tusi o le Proclaimers i sauniga, ona mafai lea e sui o le aiga ona mulimulitui i le lauga o faatonuga ma maua ai aogā mai ata tusia ma ata na pueina o loo i le tusi.
4 Faitau Tusi Paia e Faatupu Manatu: O le faitau lelei ma le faamamafaina o manatu saʻo ma lagona, o se vaega tāua lea o aʻoaʻoga uigā. E faaopoopo i ai, o le aofaiga o mataupu tofia e ao ona faitauina i le Lauga Nu. 2 e lē tetelē, ma e masani la ona lava le taimi mo upu tomua ma upu faaiu a le failauga. E ao i upu tomua ona faagaeetia ai le naunau i le mataupu ua tofia ma saunia ai le aofia e mafaufau i lona aogā ma le tāua. O le faaiuga e mafai ona faaaofia ai ni faamatalaga e faamalamalama ai ma faatatauina ai le mataupu, ma faaaogā uma ai e le failauga le taimi ua tuuina atu.
5 O nisi faamatalaga atili e uiga i le polokalama o le aʻoga, ma le auala e taulimaina ai le tofiga, e mafai ona maua i le “Faasologa o le Aʻoga o le Faiva Faatiokarate mo le 1995.” E mafai ona tatou uaʻi atu e lē aunoa i le auala o tatou aʻoaʻo atu ai e ala i le autaluina o faatonuga i lenei mataupu, e ala i le sauniunia lelei o ō tatou tofiga, ma e ala i le faatinoina o le fautuaga ua tuuina mai i a i tatou, ina ia mafai ai ona faaleleia le tomai o le tautala ma le aʻoaʻo atu. O i latou e leʻi tusia lava ō latou igoa i le aʻoga, ua valaaulia ma le mafana ina ia faia loa faapea.