Maua Aogā Mai le Aʻoga o le Faiva Faatiokarate mo le 1996—Vaega 2
1 E lei umi lava talu ona faavaeina le Aʻoga o le Faiva Faatiokarate i le 1943, na lipotia atu ai e se tasi o lālā o le Sosaiete e faapea: “I sina taimi puupuu lava ua taulau manuia ai lenei fuafuaga lelei i le fesoasoani atu i le toatele o uso o ē na manatu, o le a lē taitai lava ona avea i latou o ni failauga i le lautele e oo ina maua ni āuga lelei i le pulelaa, ma sili atu ona uigā i le fanua.” Ua faaauau pea ona saunia e le aʻoga toleniga aupito silisili ona lelei ia e manaomia e i tatou uma lava.
2 Faitau Tusi Paia: O i latou o ē ua tuuina atu i ai vaega o le faia o lauga, e lē na o i latou na e maua aogā mai le aʻoga. O le mea moni, e tofu lava i tatou ma se tofiga—le faitau Tusi Paia faalevaiaso. Ua faailoa mai i le faasologa o le aʻoga po o fea mataupu o le Tusi Paia e tatau ona faitauina i vaiaso taitasi. E tele faamanatuga faale-Tusi Paia o loo faamamafa ai le tāua o le faitauina o le Tusi Paia i aso fai soo. (Iosua 1:8; Sala. 1:2; Galu. 17:11) E tāua le faitauina o le Tusi Paia mo le soifua mālōlōina lelei faaleagaga; e fafagaina ai le mafaufau ma le loto. Afai tatou te faitauina le Tusi Paia pe ā ma le lima minute i le aso, o le a mafai ai ona tatou tausisi i le faasologa o le faitauina o le Tusi Paia. E oo ane i le faaiuga o le tausaga, ae ua tatou faitauina le sili atu i le 150 mataupu o le Afioga a le Atua. Afai e ia te i tatou pea le Tusi Paia i taimi uma, e tatau ona mafai ona tatou faitauina sina ona vaega i aso taitasi.
3 Lauga o Faatonuga: Ina ia uunaia uso i le auaunaga faamaoni ma le maelega, e manaomia ai i le failauga o loo taulimaina le lauga o faatonuga, ona ia faaaogā auala lelei tau aʻoaʻo atu, ia avatu ai le malamalama, ma ia atiina aʻe ai le talisapaia mo Ieova, lana Afioga, ma lana faalapotopotoga. E mafai e toeaina ma auauna o le faiva ona faataulauina lenei mea e ala lea i le sauniuni lelei, ia fausia a latou lauga e faavae i le matua, ia tautala ma le mautinoa, ma ia ola le lauga. (Epe. 4:12) E tāua tele le tausia e le failauga o lona taimi faatulagaina. O le tusi “All Scripture” o loo tumu i mau o le Tusi Paia ma o loo saunia ai le anoanoai o faamatalaga faale-Tusi Paia faaoso naunau e mafai ona aogā mo i tatou i le itu faaleagaga. O le tusi Proclaimers, o loo iai le talafaasolopito o le faalapotopotoga vaaia a Ieova i aso nei, ma o loo faamatala ai mea tutupu i soifuaga o tagata moni o ē na faaalia le faatuatua, maelega, tuutoina, ma le alofa. E tele mea e tatau ona aʻoaʻoina e uiga i lo tatou tofi tuufaasolo faatiokarate, ma le auala ua faamanuiaina ai e Ieova ona tagata i aso nei.
4 Mea Tāua o le Tusi Paia: O uso e tuuina atu i ai lenei tofiga, e tatau ona fili ni fuaiupu patino e mafai ona faatatauina i se auala aogā mo le lelei o le faapotopotoga. E manaomia ai i lenei mea le faitauina o mataupu ua tofia mai, ia mafaufau loloto i ai, ma ia suesueina fuaiupu ua filifilia ina ia maua ai ni manatu o le a faamaninoina ai le uiga o na mau. I le pito i tua o le tusi, Watch Tower Publications Index, e iai le “Faasino Mau,” e mafai ona fesoasoani i le suʻeina o faamatalaga e uiga i ni mau patino o le Tusi Paia. O uso e taulimaina lenei vaega, e tatau ona magafagafa ma alofia le faaopoopoina i ai o nisi faamatalaga lē talafeagai. E lē tatau ona latou sauniunia ni mataupu e sili atu nai lo le mea e mafai ona faia i le ono minute.
5 E mafai e i tatou uma lava ona maua aogā mai le Aʻoga o le Faiva Faatiokarate. E mafai ona fesoasoani ia i tatou e faaleleia ai lo tatou tomai i le tautala atu ma le aʻoaʻo atu. O le faaaogā atoatoa o lenei sauniuniga e mautinoa o le a fesoasoani ia i tatou ‘e faailoa atu ai i tagata uma lava lo tatou agaigai i luma.’—1 Timo. 4:15.