Toeaina o Ē Taimua i Galuega Lelei

¹ I le 1 Timoteo 5:17 (NW), o loo faasino atu ai le aposetolo o Paulo i toeaina o ē taimua lelei i le faapotopotoga. O le ā le auala e “taimua” ai se toeaina? E tusa ai o le upu Eleni o loo faaaogā, “ina ia taimua,” o lona uiga moni “ia pito i luma,” ia tataʻi, ia silimusa, faasino atu, ia tausia isi e pei o se tasi e tu i luma o se isi, po o se mea e puipuia ai pe fai ma talipupuni. E ui e tofia se tasi o le tino o toeaina e fai ma “ovasia taimua,” e ao i toeaina uma ona tausi atu e tusa i lenei uiga faale-Tusi Paia, e pei ona taʻua i le 1 Tesalonia 5:12 (NW): “Ia āva i a i latou o ē o loo galulue mamafa i a te outou ma taimua i a te outou i la le Alii ma apoapoai atu i a te outou.”—1 Timo. 3:5.

² A o taimua toeaina i se uiga moni, o le ‘tutū lea i luma’ o le faapotopotoga, i le faia o lauga faale-Tusi Paia ma taitaia sauniga, ae i se uiga lautele, e taimua pe a latou avatua le faataimuaga saʻo ma le taitaiga e ala i lo latou manatu mamafa e tausia manaoga o tagata taitoatasi o le faapotopotoga. Ua talafeagai lenei ma ō latou tulaga o ni ovasia toe leoleo mamoe, e pei ona faaalia e Paulo i le Eperu 13:7, 17, (NW): “Ia outou manatua i latou o loo taimua i a te outou, o ē ua folafola atu le afioga a le Atua i a te outou, ia outou faaaoao i lo latou faatuatua ma ia mafaufau i le iuga o ā latou amio. Ia outou usiusitai i ē o taimua i a te outou ma gauai i ai, auā o loo leoleo i latou mo ō outou agaga, auā latou te tala atu le tala i ai; ina ia lē faia ma le tigā auā e lē aogā lea i a te outou.”

³ A o taimua i le avea o ni leoleo mamoe, e ao ona latou tala atu se tala i le Leoleo Mamoe Sili a le Atua, o Iesu Keriso. E ao ai la ona latou matuā taimua ma le “filigā.” (1 Pete. 5:4; Roma 12:8) Latou te faaaloalogia le tulaga ulu o Keriso i lo latou faaalia lea o ona uiga totino i le feagai ai ma isi, i le faataitai i lona loto maulalo.—Mata. 20:24-28; Ioa. 13:13-16.

Ovasia Taimua

⁴ E lē avea ma “ulu” o isi toeaina, le toeaina lea e auauna o le ovasia taimua. Mātau, le eseesega i le va o le taimua ma le avea ma “ulu.” O le ulu o le aiga, mo se faataitaiga, e iai lana aiā e pulea ai isi tagata uma o le aiga; i le avea ma “ulu” na te faia ai faaiuga atonu e ese mai mea e fiafia i ai isi o le aiga. Ae o le ovasia taimua, ae maise pe a oo mai i mea e aafia ai mataupu e sili ona tāua, na te lē faia le faaiuga mulimuli. Pe a oo i mataupu ogoogo, e lē gaoioi tutoatasi le ovasia taimua ae talanoa ma isi toeaina i se tulaga aloaia po o le faasamasamanoa. (Faata. 18:1) O ia ua na o se tasi o le au toeaina, ma e gauai i faaiuga a i latou uma. O se tulaga e seāseā tupu i le au toeaina le iai o se mea latou te lē “loto e tasi” i ai.—1 Kori. 1:10.

⁵ E faamautinoa e le ovasia taimua ua vave ma lelei ona taulima mea tau le faapotopotoga, e ui o tiutefai a isi toeaina o le vaaia o isi mea o i lana lava tausiga. (om itu. 42, 43) I le faia faapea, e avea ai pea Iesu Keriso o le Ulu o le faapotopotoga, ma o le a lē manatu ai le ovasia taimua, ona o “ia” o loo taimua, o le a faia ai mea i “lana auala.” Na i lo lena, e fia auauna atu o ia i isi toeaina ma le faapotopotoga atoa e ala i le faatulaga o gaoioiga faatiokarate auā le sologa lelei.—Kolo. 1:18; 1 Pete. 5:4.

⁶ E auauna le ovasia taimua o se taitaifono pe a fono toeaina. I fonotaga a toeaina, e ao ona latou galulue faatasi uma i le autasi. I le faatinoina o lenei mea, e ao i le ovasia taimua i le avea ma taitaifono, ona iloa lona tulaga i le vafeagai ma isi. E manaomia ona ia faatatauina le faatonuga faale-Tusi Paia o le ‘taulamua ona āva’ i isi, ‘ia manatu e sili isi i a te ia.’ E ao ona ia faalogo atu i a i latou ma fesiligia ni ō latou manatu.

⁷ E ao ona faaeteete ina ia ʻaua neʻi ona “taaina” manatu o toeaina. O lenei matautia e tulai mai pe a ia maumauai e fai muamua atu ona manatu. O le a faalogo atu isi i le mea o ia fai atu ai, ma o le a faatalatu ai mai le toe fai atu o se isi manatu e ese. O lea pe a talanoaina ni mataupu eseese, e ao i le ovasia taimua ona fesili muamua atu i isi mo ni ō latou manatu. I le taimi lava foi e tasi, e lē tatau ona ia naunau e faafoliga atu o le mea o le a ia fai atu ai, o le manatu mulimuli lea i le mataupu, ma e leai se isi manatu e ao ona faaalia i ai. O lea, e ono filifili o ia e lē tuua ona manatu e faamulimuli. E ao foi ona ia faaeteete ia aua neʻi faamuamua pea le valaaulia o le toeaina lava lea e tasi i taimi uma, ae maise lava pe afai o le toeaina lena e malolosi ona manatu ma e foliga mai e manao e taaina atu ai manatu o isi. E ao ona tuu atu le avanoa tutusa i toeaina uma e faaali muamua ai ni ō latou manatu. Pe a manatua e le ovasia taimua e tutusa uma i latou, ma e na o le pau lona tiute o le faamaopoopoina lelei, o le a sologa lelei le fonotaga ma taulau ai e pei ona fuafuaina. E lē gata i lena, afai na te tausia le fonotaga i se tulaga faatalanoa, o le a faaitiitia ai foi le faatāuaina o ia lava.—w 12/1/76 itu. 182-185; w 8/1/78 itu. 9-11.

Toeaina e Lē o ni Taʻitaʻi

⁸ Na faatonu e Iesu ona soo: “Aua foi nei taʻua outou o ‘taʻitaʻi’ auā e toatasi lo outou Taʻitaʻi, o Keriso lea.” (Mata. 23:10, NW) E faatatau i le faapotopotoga Kerisiano, e na o Iesu Keriso e talafeagai ona ave i ai le tofi “Taʻitaʻi,” auā e lē mafai e se tagata lē lelei atoatoa ona avea ma taʻitaʻi o Kerisiano moni; latou te mulimuli i a Keriso. E ui e iai i latou e ‘taulamua’ i le auaunaga a le Atua, ae e lē o tuu atu i ai se tofi e avea ai i latou o “taʻitaʻi” pe faalupe ai faapena, ma faatoʻā mulimuli lava i le latou faaaoaoga, pe a latou faaaʻoaʻo i a Keriso.—1 Kori. 11:1; Epe. 13:7.

⁹ I taimi ua tea, sa tatou faaaogaina le faaupuga “ovasia taʻitaʻi” i le faa-Samoa e faaliliu ai le faaupuga faa-Peretania “presiding overseer.” E faapena foi le auala na tatou faaaogā ai le upu “taʻitaʻi” e faasino i lē e faia le Suesuega o Le Olomatamata ma le Suesuega Tautusi. Peitai, i le malamalamaga o faamatalaga o taʻua i luga atoa ai ma suesuega ma le faaeteete o le uiga i le faa-Samoa, ua aliali mai ai e manaomia ona sui nei faaupuga.

¹⁰ A o masani ona manatu i le “taʻitaʻi” o le tagata e faia faatonuga ae e lē tau manaomia ona aafia moni i le faia o se galuega, o le “taimua,” e aafia moni ai lava o ia, e tausolomua, tu i le pito i luma, ona mulimuli atu lea o isi i a te ia. O le upu la lenei ua saʻo lelei lona faamatalaina o le manatu o loo i tua o le faaupuga “presiding overseer” i le faa-Peretania. O le ovasia taimua e lē o le pule po o le taʻitaʻi o le faapotopotoga, ae taulamua i gaoioiga faa-Kerisiano e pei foi o isi uma toeaina tofia i le faapotopotoga. O le vaaiga lena e ao ona iai i ō tatou mafaufau pe a tatou faaaogā le taʻu “ovasia taimua.” O ia e “taimua,” ae lē o le “taʻitaʻi.”

¹¹ E faapena foi, ina ia ogatasi ma le faamatalaga a Iesu i le Mataio 23:10, o se mea lelei mo i tatou le aua neʻi manatu i lē e faia le Suesuega o Le Olomatamata ma le Suesuega Tautusi o se “taʻitaʻi.” O le faaaogaina o le faaupuga faisuesuega, o le a tatou alofia uma ai le faaaogaina o le faaupuga taʻitaʻi e faatatau i tofiga uma i le faapotopotoga. E ui e moni o loo latou taimua, ma aumai le faasinoga i uso, ae e lē o i latou o ni ō tatou Taʻitaʻi. ‘E tasi lo tatou Taʻitaʻi, o Keriso lea.’—Tagaʻi i le Insight Tusi 2, itu. 228.

¹² Matou te mautinoa o lenei suiga i faaupuga po o taʻu o le a fesoasoani i a i tatou taitoatasi ina ia maua le vaaiga saʻo e faatatau i toeaina i le faapotopotoga, o ē o loo tautuaina ma le loto maulalo manaoga o uso, ae maise lava le vaaiga saʻo e faatatau i le galuega a le ovasia taimua. Tau ina ia tatou taitoatasi ma mulimuli i le taimuaga ua faataatia e nei uso loto maulalo a o faapena foi ona latou usitai atu i le ulu o le faapotopotoga Kerisiano, o Iesu Keriso.—1 Kori. 11:1.