E Tele Pea Mea e Fai
1 O tagata o Ieova, o ni tagata e pisi tele. E tele ō tatou tiute tauave faatatau i ō tatou aiga, galuega, ma aʻoga. Ma i mea uma lava, o loo “tele pea mea e fai i le galuega a le Alii.” (1 Kori. 15:58, NW) E tatau ona tatou sauniuni ma ia auai i sauniga faalevaiaso a le faapotopotoga. Ua faalaeiauina i tatou ia aua lava neʻi misia se vaiaso ma le faia o se sao i le faiva i le fanua. E tatau ona lava le taimi e faataatia ese e lē aunoa mo suesuega totino ma suesuega faale-Tusi Paia a aiga. E tele tofiga o toeaina ma auauna o le faiva i le faapotopotoga. I nisi taimi, e talosagaina ai i tatou e fesoasoani atu i a i latou o iai le manaomia.
2 O nisi taimi e lagona ai e nisi o i tatou le mafatia tele ona o mea uma e ao ona tatou faia. Peitai o tagata e sili ona pisi, o tagata pito sili na ona fiafia pe a iai le vaaiga saʻo ma paleni.—Fai. 3:12, 13.
3 O le aposetolo o Paulo o se tasi sa tele ana mea na fai. A o tausia ona lava manaoga totino i le galue i aso uma i le faia o faleʻie, sa ia galue mamafa foi mo isi aposetolo. Sa galue ma le lē faavaivai o sē faievagelia, i le talaʻi atu i le lautele, mai lea fale i lea fale, ae na te leʻi tuulafoaia ai ona tiute tauave i le avea o se leoleo o le lafu mamoe. (Galu. 20:20, 21, 31, 34, 35) E ui i le feomai o lana faasologa, ae sa naunau pea Paulo e faia ni mea e sili atu i le auaunaga i a Ieova.—Faatusatusa i le Roma 1:13-15.
4 Sa tausisia le tulaga paleni ma le loto fiafia o Paulo i le faalagolago lea i a Ieova mo le malosi. Sa ia iloa le tauia ma le faamalieina i lana faiva. (Fili. 4:13) Sa ia iloa o le a lē galo i le Atua ana galuega. (Epe. 6:10) O le olioli i le fesoasoani i isi ia iloa Ieova, na faamalosia ai o ia. (1 Tesa. 2:19, 20) O le mautinoa i lona faamoemoe e faavae i le Tusi Paia, na uunaia ai o ia e maelega pea.—Epe. 6:11.
5 E ao foi ona tatou manatunatu i le lelei e iu i ai mai i a tatou galuega fitā. O lo tatou auai ma faia o se sao i sauniga faalevaiaso, ua avea o se mea e atiina aʻe ma faalaeiauina ai isi. (Epe. 10:24, 25) O a tatou taumafaiga filigā ina ia molioo atu le tala lelei i tagata uma, ua saosaolaumea i le faaauilumaina o le faapotopotoga, a o atiina aʻe le naunau ma le auaufaatasi mai o ē fou ma i tatou. (Ioa. 15:8) O le fesoasoani atu i ē o iai manaoga, ua mafai ai ona maua se agaga vavalalata e pei o se aiga i le faapotopotoga. (Iako. 1:27) E lē gata i lea, i le pei o Paulo, e lē tatau lava ona tatou faagaloina, o le pisi i galuega aogā, e sili ona faafiafia ai le finagalo o Ieova le Atua. Ua tatou manatu i ai o se faaeaga sili e auauna ai i a te ia. Ma e leai se isi auala e sili ona lelei o le olaga mo i tatou!
6 E iai se aogā faaopoopo i le tele o mea e fai. Afai tatou te pisi e tuliloa se faasologa mamā faaleagaga, e foliga mai ai i a i tatou e pei e sola le taimi. O le iloa faapea, o le mavae atu o aso taitasi, ua tatou lalata tele atu ai i le lalolagi fou, ua tatou talia ai ma le fiafia le olaga pisi ua tatou olioli ai nei. Ua tatou iloa foi le atamai o le pisi pea, auā e itiiti ai so tatou taimi e aafia ai i mea lē aoga o loo sailia e le lalolagi.—Efe. 5:15, 16.
7 E mautinoa o loo tele pea mea e fai i le galuega a le Alii. Ae mafai ona tumau lo tatou fiafia pe a faaauau ona tatou faalagolago i a Ieova le Atua ma Iesu Keriso, o ē o faafouina ma tauia la tatou auaunaga.—Mata. 11:28-30; 1 Ioa. 5:3.