Faaalia le Manatu Mamafa i Isi—Vaega 1
1 Ua tatou olioli i le vaai atu i le uluola o tagata o Ieova, lea ua iu ai i le faateleina o le aofaiga o faapotopotoga. I nisi vaipanoa, ae maise lava i aai tetele, ua matuā iloga ai ona faaaogaina Maota o le Malo, i nisi taimi e manaomia ai ona faaaogā le Maota o le Malo e tasi e ni faapotopotoga e sili atu i le tasi. O lenei tulaga, ua manaomia ai le magafagafa o i latou uma o aafia ai.
2 E ao i faapotopotoga taitasi o faaaogaina le Maota o le Malo, ona tuua le Maota i se tulaga mamā ma maopoopo, mo uso o le a sosoo mai. E tatau ona faatulaga lelei nofoa, e tatau ona teu lelei ni lomiga o i luga o le fata i mea e tuu ai, ma so o se mea totino o taatia solo i le Maota o le Malo, e ao ona aveesea. O fale ese, e tatau ona iai i se tulaga mamā, ia mautinoa ua iai se fasimoli, solo, ma ni pepa e faaaogā, ma ia sasaa le lapisi.
3 Afai o iai se isi sauniga o faatulaga e sosoo atu, e lē tatau i a i latou sa i le sauniga lea ua tuua ona faifaiaga ai e aunoa ma se mafuaaga, e faalavelave ai fua i sauniuniga mo le isi sauniga o sosoo mai. O le faaumiumi o talanoaga, e iu ai ina tumutumu i le faapaologa ma lē mafai ai e uso ona saunia ma faamaopoopo mea mo le isi sauniga. E ono faatapulaa ai foi le mea e paka ai taavale i fafo o le Maota o le Malo, ma o se agalelei pe a ō ese vave ae avanoa le paka mo taavale a i latou o loo ō mai mo le isi sauniga. I le isi itu, o i latou e auai i le isi sauniga, e lē tatau ona vave tele le ō mai, ma soona tumutumu ai i le faapaologa, le fale ese, ma le mea e paka ai taavale.
4 Pe afai e sili atu i le tasi ni faapotopotoga o aafia ai, ua iai se manaoga faapitoa ina ia felagolagomai i le faia o faatulagaga mo le faamamaina o le Maota o le Malo i vaiaso taitasi. E masani lava ona feauauaʻi faapotopotoga mo se vaitaimi faatulagaina. Pe a oo atu lena avega tauave i la outou faapotopotoga, ia faamautinoa ua faia maeʻaeʻa le faamamāina ma ia faia vave ona leai lea o se mea e faitio ai isi faapotopotoga o loo faaaogaina foi le Maota o le Malo.
5 I nisi taimi, e tulai mai se manaoga mo faapotopotoga taitasi e suia ai taimi mo ā latou sauniga, e pei o le asiasiga a le ovasia matagaluega. Afai e aafia ai le isi faapotopotoga, e ao i toeaina ona muai fautuaina mamao le isi faapotopotoga, ina ia faailoa i ō latou tagata talaʻi i se vave e mafai ai. Afai foi e iai nisi gaoioiga ua faatagaina o i le faasologa, e pei o le Aʻoga a Paeonia, se feiloaiga a toeaina o le matagaluega, po o se faaipoipoga, e ao lava ona muai faailoa mamao atu i isi faapotopotoga ma isi ovasia matagaluega o aafia ai; ina ia lē aafia ai i la latou faasologa o le faaaogaina o le Maota o le Malo i le taimi lea.
6 E iai ni maota ua faaaogaina e faapotopotoga ua tofia i matagaluega eseese. O se mea tatau i le ovasia faimalaga e asiasia nei maota ona faailoa mamao atu e le tasi i le isi ni asiasiga e sosoo mai ua uma ona iai i le faasologa. O le fai o ni fesuiaiga i le taimi mulimuli e ono iu ai i faigata pe a paʻū faatasi faasologa o asiasiga a ni ovasia se toalua i le vaiaso e tasi.
7 O le manatunatu ma le alofa i isi, lelei o fesootaiga, faia o ni fuafuaga auiluma, ma le felagolagomai, o le a fesoasoani e tausia ai se faiā mafana i le va o faapotopotoga, ma o le a faamautinoa ai e faapea, ua “faia mea uma lava ma le matagofie ma le saunia lelei.”—1 Kori. 14:40.