Lagonaina le Upu o le Malo
1 I lana tala faatusa e uiga i le lūlū saito, na fetalai ai Iesu e faapea, o le fatu na paʻū “i le eleele lelei” e faaatagia ai “ia lea ua faalogo i le upu, ma lagona ai.” (Mata. 13:23) Ina ua uma ona faalogo e uiga i le Malo, po o tatou ‘lagonaina’ ea? O le ā le tele o faaaafia ai e le Malo o tatou olaga? Po o tatou faamuamua faanaunauga o le Malo, e faailoa ai i lea, ua tatou lagona le uiga o le feau?
2 O se malamalamaga e faatatau i le feau o le Malo, e manaomia ai le faia o suesuega totino. E manaomia ona tatou faaaluina le taimi e mafaufau loloto ai i meaai faaleagaga ua saunia. O le faitau faanatinati o Le Olomatamata, e pei lava ua na ona ʻati ma folo o se meaai manogi ma le aogā. Po o faaaluina ea sou taimi e manatunatu loloto ai i meaai faaleagaga? Ina ia maua aogā e aupito sili, e tatau ona iai se naunau e faamalosia ai ma se matuā fiaʻai faaleagaga. Afai e lē o iai nei mea, e mafai la e isi gaoioiga ona faaitiitia ai aogā o suesuega totino pe faaalu uma ai le taimi lea tatou te manaomia mo ia suesuega. O le pipiimau i se faasologa lelei tau i suesuega, e lē faigofie. A o manaomia ona faapaleniina ma le faaeteete mea e tatau ona faamuamua, o oa faaleagaga e maua mai ai, e lē mafaitaulia.—Faata. 3:13-18; Kolo. 1:27.
3 O le tusi Iloiloina le Tusi Paia, ua fesoasoani i a i tatou i aso taitasi e mafaufau ai i manatu mautinoa e atiina aʻe ai e uiga i le Malo. O i latou o ē e “iloa o latou manaoga faaleagaga” ua fuafua e faaalu ni nai minute i aso uma e faitau ai le mau ma faaopoopoga. (Mata. 5:3, NW) E tele mau ua faamatala ai vala eseese o le Malo. Mo se faaaoaoga, i a Novema 22, 1994, o le mau na faatomua ai, o le Mataio 13:4. Na talanoaina ai i le faaopoopoga le faamoemoe o le Malo ma faamanatu mai i a i tatou le matautia o aufaatasiga lē aogā ma tauāiga ma tuaoi. O le mea moni, i aiga Peteli i le lalolagi aoao, e faaalu ai le 15 minute e talanoaina ai le mau o le aso i taeao o aso faigaluega taitasi, e faamamafa ai le aogā ma le tāua o le talanoaina faatasi o le mau o le aso. Po o fai ma masani a lou aiga le faaaofia ai o le talanoaga faapena o le mau i aso taitasi?
4 A o tuputupu aʻe lou talisapaia e uiga i le Malo, o le a iai se faamalosiauga sili e tufaina atu ai le feau o le Malo i isi. Ua saunia i Le Olomatamata ma le Awake! mea e ono faatusaina i meaai faalemafaufau e fafagaina ai o tatou mafaufau i faamatalaga fou e tusa ai ma mea o tutupu i le taimi nei. Ua fesoasoani na mea i a i tatou e mataalia ai pea e iloa le manaomia tele e le lalolagi o le Malo o le Atua. Ua fesoasoani foi ia mea i a i tatou ina ia avea ai i tatou o ni tagata faaleagaga o ē “ua maua le finagalo o Keriso.” (1 Kori. 2:15, 16) O nei mea uma e mafai ona faamalosia ai lo tatou faamoemoe ma faateleina ai lo tatou maelega ina ia tatou tufa atu ai le faamoemoe o le Malo i isi.—1 Pete. 3:15.
5 E tāua tele lo tatou lagona totino o le uiga o le feau o le Malo. O le Malo o le auala lea o le a faaaogaina e le Atua ina ia faamaualugaina ai lana pule silisiliese, e faaiuina ai le amio leaga, ma aumaia ai se lalolagi fou—se parataiso. Na poloaiina i tatou e Iesu ina ia faamuamua le Malo i o tatou olaga. E tatau ona avea i tatou o ni tagatanuu e pei o ni mamoe e ola ai i totonu o lana pulega. (Mata. 6:10, 33) Ia e faaaogaina atoatoa lou avanoa e olioli ai i ana faamanuiaga.