Matuā Manaomia e se Aiga Kerisiano—Meaʻai Faaleagaga i Aso Taitasi
1 “E le na o mea e ʻai e ola ai le tagata, a o afioga uma e tulei mai i le fofoga o [Ieova].” (Mata. 4:4) Maeu le moni o na upu! E pei lava ona tatou manaomia meaʻai faaletino i aso uma, e faapena foi ona tatou manaomia le faaaogāina o meaʻai faaleagaga i aso taitasi. Ina ia fesoasoani la ia i tatou e fafagaina e lē aunoa i le Afioga a le Atua, ua lomia ai e le Sosaiete le tamai tusi Saili i Tusi i Lea Aso ma Lea Aso. I le avea ma aiga Kerisiano, pe o tou faataatia ese se taimi i aso taitasi e iloiloina ai le mau o le aso?
2 E Tatau i Mātua ona Faataatia se Faaaʻoaʻoga: Ona o le tele o mea e fai, e faigofie ai lava ona tolopo le iloiloina o le mau, ma manatu ai faapea e mafai ona faia i se isi taimi. Ae afai e manatu mamafa mātua i manaoga faaleagaga o lo latou aiga, o le a latou saili ai la le taimi, ioe, o le a latou faaavanoa le taimi, i aso taitasi e faia ai le mau pe a potopoto faatasi le aiga. (Mata. 5:3) O le a latou taʻimua e lē gata i le faitauina o le mau o le aso ma a latou fanau, ae faapea foi i le faamatilatilaina o manatu mai faamatalaga i Le Olomatamata ma le talanoaina o mea e aogā ona faatatauina i ai faamatalaga ma fautuaga. E moni, atonu e alu ai ni taumafaiga ma ni gaoioiga ina ia faamasani i ai, ae e tele ni aogā e maua mai ai. (Faatusatusa i le Galuega 17:11, 12.) O lea, mātua, ia galulue mamafa e faataatia se faaaʻoaʻoga lelei!
3 Saili se Taimi Avanoa: O le ā la le taimi e sili ona lelei e potopoto faatasi ai le aiga atoa mo le talanoaina o le mau, ae aua neʻi avea o se mea e fai ma tuu? E iai le aogā o le amataina o le aso i le iloiloga o le mau faale-Tusi Paia. I aiga Peteli ma aiga o misionare i le lalolagi atoa, e amata lava le aso i le tapuaiga i le taeao, lea e aofia ai se talanoaga puupuu o le mau o le aso. E fesoasoani lenei i uso ina ia amata lelei ai lo latou aso, ma manatunatu ai i afioga a Ieova i lea aso.—Sala. 1:1, 2; Fili. 4:8.
4 I se tulaga faapena, e mafai ai foi ona aogā i aiga Kerisiano le talanoaina o le Tusi Paia i le taeao. O le a fesoasoani lea i fanau e feagai ai ma luʻi i lo latou tulaga faaleagaga, ia latou te fetaiai i le aʻoga. I nisi taimi, afai e lē mafai e le aiga atoa ona faatasi mo le talanoaina o le mau o le aso, e mafai e mātua ona manatunatu i ni fuafuaga e sui aʻi, ina ia aua ai neʻi misia lenei tausiga tāua faaleagaga. Mo se faaaʻoaʻoga, afai e tatau ona alu le tamā e faigaluega a o leʻi feala le fanau i le taeao, atonu e mafai e le tinā ona faaavanoa sina taimi e talanoaina ai le mau ma le fanau. I le isi itu, ua fuafuaina e nisi aiga e talanoaina le mau i le afiafi ona o le taimi lena latou te potopoto faatasi ai. E mafai e aiga taitasi ona faia se faasologa e sili atu ona fetaui lelei mo ona tulaga.
5 E matuā manaomia lava e se aiga Kerisiano le fafagaina faaleagaga i aso taitasi. Ia tuu atu le faamuamua i le iloiloina o le mau i aso taitasi. (Fili. 1:10) O le talanoaina o le mau faale-Tusi Paia i aso taitasi, o le a fesoasoani lea ia i tatou ina ia taofi mau atu ai i mataupu silisili ma tulafono amiotonu a Ieova. O le felagolagomaʻi o sui taitoatasi o le aiga, o le a matuā aogā ai lenei fuafuaga mo i latou uma.