Mauaina o Aogā Mai Lauga Lautele ua Toe Faafouina
1 Ua faamatalaina ma le saʻo le talafaasolopito o Molimau a Ieova i aso nei i upu o loo i le Faataoto 4:18 e faapea: “A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”
2 I le ogatasi ma lenei mea, o loo faaauau pea ona maua e le faapotopotoga Kerisiano faamalamalamaga talafeagai, ma faamatalaga e ogatusa ma o tatou taimi, o aʻoaʻoga a le Tusi Paia. (Mata. 24:45-47) Atonu e mafai foi ona e faamatalaina ni faaaoaoga o lenei mea ua e mātauina talu ona e auaufaatasi ma Molimau a Ieova. O sauniga a le faapotopotoga, e aofia ai ma lauga lautele, ua fesoasoani lea i a i tatou ina ia tatou ogatasi ai ma le malamalama ua faateleina o le upu moni.
3 Auivi ua Toe Teuteuina: Talu ai nei, na toe teuteuina ai e le Sosaiete ia ogatasi ma o tatou taimi le tele o auivi o lauga lautele. Ua faaaofia ai i ia auivi mataupu fou, ma ua faamaninoina ai manatu tāua. Ina ia maua e le faapotopotoga aogā atoatoa mai nei faamatalaga talafeagai ma o tatou taimi, e tatau i uso o ē o le a fofogaina atu nei lauga lautele ona faaaogā na o auivi fou.
4 Ina ia maua aogā sili mai nei lauga lautele, ia muamua ona mafaufau loloto i matua o lauga o le a fofogaina. Ae e te leʻi auai i le Sauniga mo le Lautele, taumafai e manatua faamatalaga fou mai puna faatiokarate e uiga i le mataupu. O lea, a o e faalogologo, ua uma ona e iloa le faagasologa o lenei faamatalaga. Ia fai se faamaumauga o so o se auala fou e taulimaina ai nei upu moni mo le faaaogaina i le lumanai. O lenei mea ua faamautinoa ai e faapea, o le a e maua aogā aupito sili mai lauga lautele ua uma ona teuteuina.
5 O Lauga Lautele e Ao ona Aʻoaʻoina ai ma Uunaia ai le ʻAu Faalogologo: Pe a fetalai Iesu, na te pāʻia loto o lana ʻau faalogologo. I le faaiuga o le Lauga i Luga o le Mauga a Iesu, o le lauga lautele aupito sili ona taʻutaʻua sa fofogaina atu, e pei ona lipotia mai i le Mataio 7:28 e faapea: “Ona matuā taufaiofo ai lea o le motu o tagata i lana aʻoaʻoga.”
6 O le manatua o le faaaoaoga a Iesu, e tatau ai i le ʻau toeaina ona faaaogaina le faautauta i le faamaonia o le ʻau failauga fou o lauga lautele, ia tofia na o uso ua avea o ni faiaoga lelei, o ē o le a latou pipiimau atu i auivi a le Sosaiete, ma i latou e mafai ona faatosina mai manatu o le aofia. O uso o ē ua tofia i ai le faaeaga o le fofogaina atu o lauga lautele, e tatau ona tauivi pea ina ia faaleleia lo latou tomai e tautala ai, i le talia o so o se fautuaga ma ni timaiga mai le ʻau toeaina.
7 E pei ona valoia mai i le Isaia 65:13, 14, o le a faaauau pea ona iloaina manino le tulaga olaola faaleagaga o tagata o le Atua. O le fuafuaga mo lauga lautele, o se tasi lea o le tele o auala o loo ‘aʻoaʻoina ai e Ieova’ i tatou.—Isa. 54:13.