Pusa Fesili

● E faafia ona faia ni tofiga o tagata aʻoga i le Aʻoga o le Faiva Faatiokarate?

O se tasi o fuafuaga autū o le aʻoga o le Faiva Faatiokarate, o le atiina aʻe lea o ni failauga mo le lautele. Ona o lena mafuaaga, ua saunia ai e le Faasologa o le Aʻoga o le Faiva Faatiokarate le tele o lauga ina ia tofia i uso.

Peitai, o se isi fuafuaga tāua o le aʻoga o le toleniina ai lea o tagata uma lava o Ieova ina ia avea o ni faifeau ma ni faiaʻoga uigā i le faiva faa-Kerisiano. O le mafuaaga lenei, e talafeagai ai foi mo tuafāfine ona tusia ai o latou igoa.

Ina ia mauaina aogā atoatoa mai le aʻoga, e ao ia i latou ua tusia ai o latou igoa ona maua ni o latou tofiga e lē aunoa. Ua fautuaina faapea a lē itiiti mai e ao i tagata aʻoga taitasi ona taitolu masina ma maua se tofiga e tasi. Afai e tusa ai ma tulaga o le faapotopotoga, e mafai ona avatu i uso ni tofiga faaopoopo. E lē tau manaomia mo toeaina o loo faia pea lauga o faatonuga ma manatu tāua o le Tusi Paia ona tofia foi i ai ni lauga a tagata aʻoga.

Toeitiiti lava atoa le afa senituri, o fesoasoani le Aʻoga o le Faiva Faatiokarate i le faitau miliona ina ia agaʻigaʻi i luma faaleagaga ma aʻoaʻoina le auala e faaleoina ai i latou lava i se tulaga e sili ona lelei i le taulimaina o le feau o le Malo. E faalaeiauina tagata uma lava ina ia faaaogā atoatoa lenei sauniuniga matagofie mai ia Ieova le Atua. E ao ona fai ma o tatou sini le tuuina atu o i tatou lava ia faamaonia e le Atua, o ni ē faigaluega “e leai se mea e mā ai, na te vaevaetonuina le upu moni.”—2 Timo. 2:15.