Ua Foaiina i ai o Mea e Tele—E Sueina foi i ai o Mea e Tele
1 Maeu le faamanuiaina o i tatou ona o le mauaina o le upu moni! Ona o lo tatou tuuina atu ia Ieova, ua “tuuina mai ai . . . le tala lelei” ia te i tatou. (1 Tesa. 2:4) O lenei mea, ua aumaia ai ia i tatou se tiute tauave sili. Na fetalai Iesu e faapea: “O i latou ua foaiina atu i ai o mea e tele, e suʻeina atu foi ia te ia o mea e tele.”—Luka 12:48e, NW.
2 Maeu le moni o na upu! Talu ai, o i tatou uma lava ua faamanuiaina i le poto i le Afioga a le Atua, i se aufaatasiga matagofie faaleauuso, ma se faamoemoe ofoofogia, ua mafai ai ona fai atu ma le tonu, ua tuuina mai mea e tele ia i tatou. Ua talafeagai foi la ona faatalitalia o mea e tele mai ia i tatou.
3 Tausia se Vaaiga Saʻo o Mea e Manaomia: Ua faia e nisi tagata se faaiuga e faapea, ua tele naua mea e manaomia mai ia i tatou. Ona o Iesu o le Ao o le Faapotopotoga Kerisiano, ua ia filifilia ai “mea e manaomia” mo lona faagasologa lelei. (Efe. 4:15, 16) Ua ia faamautinoa mai ia i tatou e faapea, ‘o lana amo e avegofie ma o lana avega e māmā ia.’ (Mata. 11:28-30) E faapalepale ma le agalelei o ia ia te i latou o ē e i ai mea e gata mai ai lo latou malosi. (Luka 21:1-4) Pe afai la tatou te faia le mea e aupito sili ona tatou mafaia, e tusa pe tele pe itiiti, o le a faamanuiaina i tatou.—Kolo. 3:23, 24.
4 Fesili ifo ia te oe lava, ‘Po o faamuamua i loʻu olaga mea tau i le Malo? Po o ou faaaogā loʻu taimi ma aʻu alamanuia i se auala e viia ai le suafa o le Atua ma aogā ai i isi? Po o ou iloaina o loʻu fiafiaga sili e maua mai i le auauna atu ia Ieova na i lo o le fiafiaga manatu faapito i mea faitino?’ O ā tatou tali faamaoni i nei fesili e faaalia ai uunaiga mai o tatou loto.—Luka 6:45.
5 Aloese mai le Tofotofoina e Faia le Mea Leaga: Sa leʻi faapea muamua ona i ai ni tofotofoga ma ni omiga e uiga i le manatu faapito, le matapeʻapeʻa, ma le manao tele i tuʻinanauga o le tino. I aso uma lava, tatou te fesagai ai ma luʻi e faatatau i tulaga tau amio, faapea ma faaosoosoga ina ia tatou faagutugutulua ai. Ina ia faafetaiaia ma le manuia nei luʻi, e tatau ona tatou ole atu ia Ieova ina ia fesoasoani mai ia i tatou. (Mata. 26:41) E mafai ona ia faamalosia i tatou e ala i lona agaga. (Isa. 40:29) O le faitauina o le Afioga a le Atua i aso uma o se fesoasoani sili lea. (Sala. 1:2, 3) O le aoaia o le tagata lava ia ma le pulea totino, e telē foi sona sao i ai.—1 Kori. 9:27.
6 E lē lava le na ona manao e faia le mea lelei—e tatau foi ona tatou ʻinoʻino i le mea leaga. (Sala. 97:10) O lona uiga, aua neʻi faatupuina i le loto se moomooga e fia manao i na mea leaga. Ua lisiina mai i le Faataoto 6:16-19 mea e fitu e inosia e Ieova. E manino lava la, afai e manao se tasi ina ia fiafia mai Ieova ia te ia, e tatau foi ona ʻinoʻino i na mea. Ona ua faamanuiaina i le maua o le poto saʻo o le upu moni, e tatau ai ona tatou mananao e gaoioi e ogatasi ma lena poto, i le taulaʻi pea o o tatou mafaufau i mea lelei.
7 O se mea tatau ona tatou tatalo mo tulaga lelei o le a mafai ai ona “tele pea mea e fai i le galuega a le Alii.” (1 Kori. 15:58, NW) E toatele ua latou iloa e faapea, o le tele o mea e fai i le auaunaga ia Ieova, o se puipuiga auā o le a itiiti ai le taimi e tuliloa ai mea lē aogā.
8 A fuafua atu la i nei mea uma e manaomia e Ieova mai ia i tatou ua matuā talafeagai lava. (Mika 6:8) E tele mafuaaga e ao ai ona tatou loto faafetai mo faaeaga taitasi o le auaunaga. (Efe. 5:20) O le mea lea, ia tumau pea ona tatou “galulue mamafa ma tatou faamalolosi,” i le mautinoa o lo tatou taui o le a matuā tele lava na i lo o se mea o manaomia mai ia i tatou.—1 Timo. 4:10, NW.