Ofo atu i Tatou ma le Loto Malie mo Galuega Lelei Uma

¹ Na faia e se lomiga faalelalolagi se faamatalaga e faasino i Molimau a Ieova, i le faapea mai: “E matuā faigata lava ona maua ni sui o se isi lava vaega o tagata o ē e galulue mamafa e tusa ai ma la latou lotu e pei ona faia e Molimau.” Aisea e matuā galulue mamafa ai Molimau a Ieova faatasi ma sea agaga loto malie?

² O le tasi o mafuaaga, ona ua mauaa ia i latou le agaga o le faanatinati. Na silafia e Iesu ua puupuu le taimi mo ia e faaiuina ai lana galuega i le lalolagi. (Ioa. 9:4) A o pule le Alo faamamaluina o le Atua i totonu o ona fili i aso nei, ua iloa ai e tagata o Ieova ua puupuu le taimi o totoe mo i latou e faia ai la latou galuega. O le mea lea, ua ofoina atu ai pea i latou ma le loto malie mo le auaunaga paia. (Sala. 110:1-3) Ona o loo manaomia se aufaigaluega e toatele e faia le seleselega, e lē mafai foi la ona mapu i latou mai a latou taumafaiga. (Mata. 9:37, 38) I lea, ua latou taumafai malosi ai e faaaʻoaʻo ia Iesu o lē na faataatia se faaaʻoaʻoga lelei atoatoa o le loto malie ma le filigā i lana galuega.—Ioa. 5:17.

³ O le isi mafuaaga e galulue ai ma le loto atoa Molimau a Ieova e pei o loo faia ia Ieova, ona o la latou faalapotopotoga i le lalolagi aoao, e ese mai i isi vaega uma lava. O faalapotopotoga faalelotu i le lalolagi, e tutasi lava i lo latou mananao i na o sina taimi ma ni taumafaiga itiiti mai o latou tagata. O mea o latou talitonu i ai e itiiti pe leai foi ni āuga lelei i o latou olaga i aso faisoo, i a latou feutagaiga ma isi tagata, po o mea o latou tuliloaina i le olaga. Ona o le leai o se malosi o le faatuatua moni e uunaia ai, ua latou tausisi mai ai e faapea, o o latou leoleo mamoe ua ‘⁠tautala atu i upu mālie ia i latou,’ e faamautinoa atu ai ia i latou e faapea, ua lava ma totoe nai a latou taumafaiga. (Isa. 30:10) Ua faafiafiaina e o latou taʻitaʻi lotu i latou e ala i le ‘⁠fai atu o upu mālie ia i latou,’ ma totoina ai i o latou loto le agaga o le lē manatu mamafa ma le paiē faaleagaga.—2 Timo. 4:3.

⁴ Pagā se eseesega ma tagata o Ieova! O mea uma lava e faatatau i la tatou tapuaiga e aofia ai se taumafaiga, le faamalosi, ma galuega. I aso uma lava ma i mea uma lava tatou te faia, tatou te faatinoina ai mea ua tatou talitonu i ai. A o aumaia e le upu moni ia te i tatou le olioli tele, e aofia ai foi le “finafinau tele lava” ina ia o tatou faataunuuina le mea o manaomia. (Faatusatusa i le 1 Tesalonia 2:2.) I le na o le tausia o tiute tauave o le olaga i aso faisoo, ua lava lena e faapisi ai le toatele o tagata. Ae peitai, tatou te lē faatagaina na popolega e taofia ai i tatou mai le tuu faamuamua o manaoga o le Malo.—Mata. 6:33.

⁵ O mea ua tuuina mai ia i tatou e fai i le auaunaga ia Ieova, e matuā aogā ma faanatinati, o lea ua uunaia ai i tatou ina ia ‘⁠sema’ se taimi mai isi gaoioiga ma faaaogā i se auala e sili atu e maua ai aogā faaleagaga. (Efe. 5:16) I le iloa o lo tatou tuutoina i le Atua ma le agaga o le loto malie e fiafia i ai Ieova, ua oo ai ia i tatou se uunaiga sili ina ia faaauau pea i la tatou galuega fitā. Faatasi ma le oa o faamanuiaga ua tatou maua i le taimi nei ma le faamoemoe mo le ola i le lumanai, o lo tatou faanaunauga la, o le faaauau ona “galulue mamafa ma ia tatou faamalolosi” ona o manaoga tau i le Malo.—1 Timo. 4:10, NW.

⁶ Tuutoina ma le Agaga o le Faataulagaina Totino: E toatele tagata i aso nei ua faamuamua mea faitino ma fiafiaga i lo o isi mea uma lava. Ua latou lagona le aogā o le uaʻi totoʻa atu i mea o le a latou aai ai, feinu ai, pe oofu ai. (Mata. 6:31) Ona o le lē faamalieina i mea ua maua, ua uunaia ai i latou e le sini o le manao ina ia olioli atoatoa i se olaga lelei i le taimi nei ma ia ‘⁠maua mea lelei e tele ua teuina mo tausaga e tele, o lea ua latou nonofo fifilemu ai, ua aai, feinu, ma faafiafia i latou.’ (Luka 12:19) Ua lagona e tagata toaaga i lotu e faapea, so o se taumafaiga lava e manaomia mai ia te ia e lana lotu, o le solia lea o ana aiā tatau. O le manatu ia lafoaia pe faaitiitia mea faitino e maua po o le lafoaia o ni mea e fiafia i ai, e matuā lē talafeagai. O le manatu mamafa ia te ia lava, le atiina aʻe o se agaga o le faataulagaina, o se mea e lē moni, ma e lē aogā.

⁷ E ese la tatou vaai i lenei mataupu. Ua siitia e le Afioga a le Atua o tatou mafaufauga, o lea ua tatou manatu ai i manatu o le Atua ae lē o manatu o tagata. (Isa. 55:8, 9) E iai o tatou sini o le olaga e sili mamao atu i mea faaletino. O le faamamaluina o le pule silisili ese a Ieova ma le faapaiaina o lona suafa, o ni mataupu sili ia ona tāua i le vateatea aoao. O le tāua o nei mataupu e matuā silisili lava, pe a faatusatusa atu i ai, o atunuu uma e peiseai “ua leai i ona luma.” (Isa. 40:17) So o se taumafaiga e ola o tatou olaga i se auala e faaleamanaia ai le finagalo o le Atua, e tatau ona manatu i ai o se mea valea.—1 Kori. 3:19.

⁸ O lea, a o manaomia isi mea faitino ma o isi mea o loo aogā i le faaauauina o a tatou gaoioiga o le Malo, ua tatou iloa ai o nei mea, e lē o “mea ia e sili ona tāua.” (Fili. 1:10, NW) Ia tatou usiusitai i le agaga i le 1 Timoteo 6:8 e faatapulaa ai o tatou faanaunauga i mea faitino ma taumafai ai ma le atamai e taulai atu o tatou loto ‘⁠i mea e lē vaaia e tumau ia e faavavau.’—2 Kori. 4:18.

⁹ O le tele tatou te manatu ai i manatu o le Atua, o le itiiti foi lea o lo tatou popole i mea faitino. Pe a tatou mafaufau loloto i mea ua faia e Ieova mo i tatou faapea ma faamanuiaga ofoofogia ua ia folafola mai mo le lumanai, ua tatou loto malilie ai e faia so o se faataulagaina ua ia finagalo ai mai ia i tatou. (Mare. 10:29, 30) O loo tatou nofo aitalafu ia te ia i lo tatou ola. Pe ana lē seanoa lona alofa mutimuti vale ma lona alofa fua, semanū tatou te lē mafai ona olioli i le ola i le taimi nei, ma e leai foi se faamoemoe mo le lumanai. Ua tatou lagona e tatau ona tuuina atu i tatou lava, talu ai o mea uma lava o tatou faia i lana auaunaga, ‘⁠o mea ia e tatau ona tatou faia.’ (Luka 17:10) So o se mea e manaomia mai ia i tatou e toe faafoi atu ia Ieova, tatou te avatu ma le loto fiafia, i le iloa o le a tatou “selesele mai mea e tele.”—2 Kori. 9:6, 7.

¹⁰ E Manaomia se Aufaigaluega e Galulue ma le Loto Malie i le Taimi Nei: E mai lava i lona amataga, na ulu atu ai le faapotopotoga Kerisiano i se vaitaimi o galuega maelega. Sa manaomia ona tuuina atu se molimau maeʻaeʻa a o lei faatoilaloina Ierusalema i le 70 T.A. I lena vaitaimi, na “matuā tinoū ai i le upu” soo o Iesu. (Galu. 18:5, NW) O le vave ona salalau atu, na mafai ai ona aʻoaʻoina nisi fai evagelia e toatele ma ni leoleo mamoe agavaa ma faaaogā la latou fesoasoani. Sa manaomia ni tane e iai le poto masani i feutagaiga ma faipule silisili faapea ma nisi e tomai e mafai ona vaavaaia le aoaoina ma le tufatufaina atu o mea faitino na manaomia. (Galu. 6:1-6; Efe. 4:11) A o auauna se toaitiiti i se tulaga iloga, o le toatele lava sa tautua mai tua. Ae sa ‘⁠faamalolosi ma tinoū’ i latou uma e galulue faatasi ma le loto atoa ina ia faaiuina le galuega.—Luka 13:24.

¹¹ E ui lava sa iai se manaoga laitiiti faatapulaa mo se galuega tinoū i le lalolagi aoao mo le tele o senituri mulimuli ane, ae na amata ona matuā toe faaolaolaina le galuega o le Malo ina ua pule Iesu i le mana o le Malo i le 1914. E toaitiiti lava na iloa i le taimi muamua e faapea, o le manaoga mo se ʻau faigaluega mo manaoga o le Malo, o le a oo ina matuā faateleina, e manaomia ai le fesoasoani a le faitau miliona o ē loto naunau i le lalolagi aoao.

¹² I aso nei, ua matuā aafia ai le faalapotopotoga i le matuā tele o atinaʻe eseese ua oo ai ina faatapulaa mea e mafai ona maua i a tatou alamanuia. O loo agaʻi i luma le galuega o le Malo i se tulaga e matuā sili ona tele. O le faanatinati o o tatou taimi ua uunaia ai i tatou e matuā faamalolosi ma faaaogā mea uma ua tatou maua ina ia faaiuina ai le galuega o loo faia nei. A o lalata tele mai le iuga o le faiga amioleaga aoao o mea, ua tatou āloālo atu ai i se galuega e sili atu ona telē i aso o i luma. Ua tuuina atu le valaau i auauna tuuina atu uma a Ieova ina ia ofoina atu ma le loto malie o ia lava i le galuega faanatinati o le aoaoina.

¹³ O le ā e Manaomia ona Faia? E mafai ona tatou faapea atu ma le faamaoni, e “tele mea e fai i le galuega a le Alii.” (1 Kori. 15:58, NW) I le tele o oganuu, e tele le saito e seleseleina, a o le ʻau faigaluega e toaitiiti. Ua valaaulia i tatou ina ia faia la tatou vaega e lē gata ina ia maeʻaeʻa i le molimau atu i a tatou lava oganuu, ae i le faafetaiaia foi o le luʻi e auauna i nofoaga o loo manaomia tele ai le fesoasoani.

¹⁴ E faamālō i le vaai atu i le auala o loo ofo atu ai ma le loto malie e Molimau i vaega uma o le lalolagi i latou lava mo isi gaoioiga. E amata mai lava i le tauofo mo le fausiaina o nofoaga mo le tapuaiga, auauna i tauaofiaga, ma taumafaiga e tuuina atu le fesoasoani i taimi o mala, e oo lava i le faamamāina o le Maota o le Malo i se tulaga faifai pea. E tusa ai ma le gaoioiga mulimuli, o le faamautinoa pea lea ua tuua le Maota o le Malo i se tulaga mamā ma maopoopo pe a maeʻa sauniga taitasi. O le faataunuuina o galuega e manatu i ai e faapea o galuega maulalo, e faaalia ai se malamalamaga saʻo i upu a Iesu i le Luka 16:10: “O le faamaoni i le mea itiiti, e faamaoni foi o ia i mea e tele; o lē amioletonu i le mea itiiti, e amioletonu foi o ia i mea e tele.”

■ Lagolagosua i Galuega a le Faapotopotoga: A o galulue faapotopotoga taitasi e avea o se vaega o le faalapotopotoga atoa ma maua le taʻitaʻiga mai le “auauna faamaoni ma le mafaufau,” ae ua faia aʻe i tagata talaʻi taitoatasi o le Malo. (Mata. 24:45) O lona faataulauina e faalagolago tele atu i le tele e mafaia e Molimau taitoatasi ona faia ma le loto malie. E taulai atu le faapotopotoga i le talaʻia o le tala lelei i ona oganuu, i le faia o soo fou ma faamalosia faaleagaga i latou. E mafai e i tatou taitoatasi ona saosaolaumea i lenei galuega. E mafai foi ona tatou faatutū ni sini mo i tatou lava i suesuega totino, auai ma le uigā i sauniga, ma fesoasoani i isi i le faapotopotoga o loo manaomia se fesoasoani. O nei galuega ua maua ai le tele o avanoa lelei mo i tatou e faatino ai lo tatou loto malie.

■ Avea ma Taʻimua i Tulaga o Ovasia: Ua tuuina mai e Ieova le vaavaaiga o faapotopotoga i ona toeaina tofia. (Galu. 20:28) O nei tane, o i latou ia ua aapa atu ina ia taʻuagavaaina mo lenei faaeaga. (1 Timo. 3:1) O lea la, o uso uma lava i le faapotopotoga ua tofu ma ni tomai e taʻuagavaaina ai mo tiute tauave e sili atu. E toatele lava uso ua agaigai i luma faaleagaga ma mananao ina ia tutupu pea i le taʻitaʻiga ma le fesoasoani alofa a toeaina o le faapotopotoga. O nei tane e ao ona avea o ni tagata aʻoga filigā o le Tusi Paia ma a tatou lomiga. E mafai ona latou faaalia lo latou loto malilie e ala lea i le gauai atu i toeaina ua tofia e le agaga, i le faataʻitaʻi atu i lo latou faatuatua, ma ia atiina aʻe uiga ia o loo moomia mai ovasia.—Epe. 13:7, 17.

■ Faia le Auaunaga Faataimi Atoa: O le galuega autū a le faapotopotoga, o le talaʻia lea o le tala lelei. (Mata. 24:14) Maeu se faamanuiaga pe a faateleina e i latou o ē e maelega a latou taumafaiga e ala i le tusia o o latou igoa e avea o ni paeonia! E masani ona aafia ai i lenei mea le faia o ni suiga i o latou olaga totino. Atonu e manaomia ai ni fesuiaiga faaopoopo mo i latou ina ia faaauau ai i lenei vala faapitoa o le auaunaga. Ae peitai, o i latou o loo taofi mau pea i lenei faaeaga nai lo o le faamaamulu, pe a mavae se tausaga pe ā, e mautinoa le mauaina o le tamaoaiga o faamanuiaga a Ieova ona o le lē faavaivai. E mafai e toeaina alolofa ma isi ua taʻumatuaina ona saosaolaumea mo le manuia o paeonia, i le faalaeiau ia i latou e ala i upu ma galuega. Maeu se agaga lelei ua faaalia e tagata talavou o ē na ō atu saʻo lava i le galuega paeonia ina ua uma aʻoga! E faapena foi i tagata matutua o ē ua tusia o latou igoa e avea o ni paeonia sauatoa ina ua faaitiitia o latou tiute tauave masani. Maeu se loto malie ua aumaia ai e lea mea i se auauna Kerisiano pe afai e na te lagolagoina le faavaveina e Ieova o le galuega o le aoaoina!—Isa. 60:22.

■ Auai i Faugafale ma le Faaleleia o Nofoaga mo Sauniga: O le mea moni, e faitau selau Maota o le Malo faaonaponei faapea ma le tele o Maota Fono ua fausia. O le mea e ofo ai ona e toetoe lava o le galuega uma na faia e o tatou uso ma tuafāfine o ē na tauofo atu ma le loto malie o latou taimi ma tomai. (1 No. 28:21) E faitau afe le ʻau faigaluega o ē na latou toe faafouina lelei nei fale e ala i le faatinoina po o ā lava ni galuega na manaomia ona faia. (2 No. 34:8) Ona o lenei galuega o se tasi o vala o le auaunaga paia, o i latou o fesoasoani ua ofoina atu i latou ma le loto malie, e lē o talosaga atu mo se totogi o la latou auaunaga e pei foi ona lē talosagaina se totogi mo le talaʻiga mai lea fale i lea fale, fofogaina atu o lauga lautele i faapotopotoga, po o le fesoasoani i galuega tau i fonotaga po o tauaofiaga. O nei tagata tauofo, ua ofo fua atu la latou auaunaga i le fuafuaina ma le fausia o nofoaga o le tapuaiga mo le viiga o Ieova. Ua latou tinoū e fesoasoani atu i mea e pei o le faamaeʻaina o faamaumauga faaletulafono, tausia faamaumauga o tupe, faia fesootaiga o faatauga, ma fuafuaina le aofai o mea e manaomia. O nei auauna faamaoni a Ieova latou te lē faaopoopo se totogi faasili, pe saili i so o se auala tuusaʻo pe lē tuusaʻo e maua ai ni tupe faasili mai auaunaga o latou tuuina atu, talu ai o a latou taleni uma ma alamanuia ua tuuina atu uma ia Ieova. (Tagai i La Tatou Faiva o le Malo o Fepuari, 1992 itulau e 4, palakalafa 10.) O lenei galuega, e manaomia ai se ʻau faigaluega filigā o ē e faia la latou auaunaga ma “le loto atoa ia Ieova.”—Kolo. 3:23, NW.

¹⁵ O le ā la le mea ua tutasi ai le loto malie o tagata o Ieova? O le agaga foai. O lo latou foai ma le matamau e aofia ai e sili atu nai lo tupe po o mea faitino—ua latou “ofoina atu i latou lava ma le loto malie.” (Sala. 110:3, NW) O le uiga moni lenei o lo tatou tuuina atu ia Ieova. Ua tauia i tatou i se auala faapitoa. Ua tatou tofo i le “manuia sili” ma ua tatou “selesele mai mea e tele” auā o mea tatou te faia e talisapaia e isi, o ē e toe foaiina mai mea ia i tatou. (Galu. 20:35; 2 Kori. 9:6; Luka 6:38) O Le Agalelei silisili mai ia i tatou, o lo tatou Tamā faalelagi o Ieova, o lē e “alofa . . . i le ua foai ma le loto malie.” (2 Kori. 9:7) O le a ia tauia i tatou i faamanuiaga e taʻi sautuaselau o le a tumau e faavavau. (Mala. 3:10; Roma 6:23) O lea, afai e ofo mai ni faaeaga i le auaunaga a Ieova, po o le a e ofoina atu ea oe ma le loto malie ma tali atu e pei ona faia e Isaia: “O aʻu lenei, ina auina atu aʻu”?—Isa. 6:8.