Tausia Lo Tatou Autasi i le Malo
1 O se pulega moni le Malo o le Atua, e i ai le mana ma le pule. Sa o le matua lea o le talaʻiga a Iesu. (Mata. 4:17) O le aʻoaʻoina o isi ma molimau atu e uiga i le upu moni o le Malo, sa avea ma vaega autū o le faiva a Iesu. Na ia aʻoaʻo i tatou ina ia tatalo mo le Malo ma ia muai sailia pea. (Mata. 6:9, 10, 33) O le pipiimau ia Ieova ma lana faalapotopotoga, le faataunuuina o lo tatou tofiga e talaʻi, ma tumau ona vavaeese mai le lalolagi, ua mafai ai ona tausia lo tatou autasi i le Malo. E ala i a tatou gaoioiga ma upu, e faaalia ai o loo tatou lagolagoina le Malo.—Ioa. 18:37.
2 Talu mai le 1914, na avea le Malo o se mea moni i le faitau miliona o tagatanuu. O le autasi ua faatinoina e nei tagatanuu o le Malo, e matuā eseese mamao lava i se lalolagi fevaevaeai. E tatau ona moni le Malo i o tatou olaga pe afai tatou te mananao ia avea o se malosi e autasia ai. O le ā e avea ai le Malo ma mea moni ia i tatou?
3 I le pei o isi pulega, o lea Malo e i ai ana tulafono faatutū. Peitai ane, e ese, ona e maua ia tulafono i le Tusi Paia. O le faitauina la e lē aunoa o le Afioga a le Atua, ua faamanatu mai ai ia i tatou mea o loo manaomia mai ia i tatou, o ni tagatānuu o le Malo. O le suesueina totino o a tatou lomiga ma taʻiala e maua mai i le “auauna faamaoni ma le mafaufau,” ua fesoasoani lea ia i tatou ina ia faatinoina ai tulafono a le Atua i o tatou olaga i aso faisoo. (Mata. 24:45) A o tatou faatinoina na faatatauga totino, o le a faateleina ai ona moni le Malo ia i tatou, ma fusia faatasi ai i tatou o se auuso fealofani i le lalolagi aoao, i le avea ai lea o i tatou o se aiga autasi o tagata tapuai i lalo o le pulega a Iesu.
4 Autasi e Ala i le Talaʻiga o le Malo: O lo tatou tofiga, o le talaʻiina lea o le tala lelei o le Malo “i tuluiga o le lalolagi.” (Galu. 1:8) O le talaʻi ma le “gatasitasi” ua autasia ai i tatou a o tatou tauivi e ‘viia’ Ieova. (Roma 15:5, 6) O le auai ma le maelega o se aufaigaluega faatasi ma o tatou uso i le lalolagi aoao, ua faamalosia ai lo tatou faatuatua ma faataga ai le agaga o Ieova e galue ia i tatou i le faataunuuina o lona finagalo. “O le tele o mea e fai i le galuega a le Alii” ua mafai ai ona tatou “tumau, ma le le faagaeetia.”—1 Kori. 15:58.
5 I le tele o atunuu, ua taumafai ai Satani e faavevesi lo tatou autasi i le faalavelave i la tatou galuega talaʻi. Ua ia faaaogaina auala uma na te mafaia e faatupu ai manatu eseese ma malamalamaga sese i le taumafai e faapogaia maseiga ma le femisai. (Faata. 6:19; Kala. 5:19-21, 26) E manao o ia tatou te aafia i fefinauaiga a le lalolagi ma tatou lagolagoina faiga faapolotiki ma finauga lautele. (Iako. 3:14-16) Ua apoapoai mai le Tusi Paia ia i tatou ia tetee atu i ana taaiga; auā a leai, o le a na ʻaina i tatou i le avea ma ana vete. (1 Pete. 5:8, 9) O le moni o le faamoemoe o le Malo e lē tatau ona faatagaina e mou ese atu mai o tatou loto ma mafaufau.
6 O le tausia o lo tatou autasi, e manaomia ai le magafagafa ma le atamai mai lugā. Pe a mapuna aʻe faigata, a e maise lava pe afai o loo aafia ai o tatou uso, e tatau ona tatou faaalia atu fua o le agaga ina ia tausisia ai le filemu. O uiga o le lalolagi e pei o le mimita, le matauʻa, ma le lē manatu mamafa i isi tagata po o le manatu faapito, o uiga na e fevaevaeai ai ma e tatau ona foia. (Efe. 4:1-3; Kolo. 3:5-10, 12-14) E manaomia ona faatutumuina o tatou mafaufau i manatu mautinoa ma e ati aʻe ai. O le Malo o se mea moni lava i o tatou olaga! Ae peitai, e tatau ona tatou mataala ina ia tumau ai i lena auala!—Efe. 6:11, 13.
7 O le moni o lo tatou faamoemoe ofoofogia o le Malo, ua mafai ai ona autasia i tatou i le agaga autasi lea o le a leai sona mutaaga.—Sala. 133:1.