Mulimuli i Lo Tatou Faaaʻoaʻo e Avea ma Ē Faasusulu le Malamalama
1 Na faalauiloa mai e Iesu ia lava e faapea: “O aʻu nei o le malamalama o le lalolagi.” I le mulimuli i lana faaaʻoaʻoga, na avea ai foi soo o Iesu ma “malamalama o le lalolagi.” (Mata. 5:14) I le avea “o le malamalama o le lalolagi,” ua mafai ai ona faapea atu Iesu, o ē uma e mulimuli atu ia te ia, o le a maua “le malamalama o le ola.” (Ioa. 8:12) O le mea lena ua avea ai foi i tatou o ē faasusulu atu le malamalama faaleagaga, o ē e le taitai ona faatagaina se mea e natia pe taofia ai lena malamalama.
2 Ua saunia e le faalapotopotoga a Ieova se toleniga e faasino mai ai ia i tatou le auala e avea ai ma e uigā i le faasusulu atu o le malamalama. Afai tatou te mulimulituʻi i le fautuaga ma le taʻitaʻiga ua tatou maua, ona mafai ai lea ona faamalamalamaina tagata o ituaiga uma i upu moni o le Malo. (1 Timo. 4:6) I le auauna e avea ma ē faasusulu atu le malamalama, e aofia ai e lē gata i le tautala i le upu moni i avanoa uma, a e i le tausisia foi o amioga lelei i le avea o ni Kerisiano. O amio a lo tatou Faaaʻoaʻo, sa aunoa ma le faalumaina ai. I le avea la ma ona soo, e tatau ona tatou faaalia, o le Faa-Kerisiano, o le auala lea o loo ola ai o tatou olaga i aso uma. (Efe. 5:9; Tito 2:7, 8, 10) E ao ona tatou fuaina mai galuega lelei e mafai ona iloa mai e isi tagata ma uunaia ai i latou e vivii atu i le Atua.—Mata. 5:16.
3 Na fetaiai se tasi Molimau ma se talosaga uiga ese a o alu atu mai lea fale i lea fale. O le tamaloa e ona le fale ma lana avā, sa mamaʻi tele, a e sa mananao i laʻua e fia teu se tupe i le faletupe. Na la talosaga atu ai i le Molimau pe mafai ona ia teuina le tupe mo i laʻua. Na malie i ai o ia ma na tuuina atu loa i ai le tinoitupe e $2,000 Amerika e ave e teu i le faletupe! Ina ua toe foi atu o ia, na ia fesili atu i le ulugalii: “E faapefea ona oulua faatuatuaina aʻu a e semanū lua te lē iloa aʻu?” O le tali na maua mai e faapea: “Ua ma iloa ma ua iloa uma foi e isi tagata e na o Molimau a Ieova lava e mafai ona faatuatuaina.” Maeu lo tatou loto faafetai ona o lo tatou tausisia o mataupu silisili tau amio a le Tusi Paia, ua maua ai sea talaaga e faamamaluina ai le Atua!
4 Na taʻua e se faiaoga o le vasega muamua i lana vasega le mafuaaga na lē auai ai se tasi teineitiiti aʻoga Molimau e ono tausaga le matua i le valiina o ata o le Halloween. Na taʻua e le faiaoga e faapea, na mitamita tele o ia i lenei teineitiiti ona o le lototele e faaesea o ia mai isi ona o ōna talitonuga. Na fai mai le faiaoga, afai tatou te talitonu maumuaʻi i se mea, e ao lava ona ia i tatou le lototele e tutumau ai mo lea talitonuga. I lena lava po, na iloilo ai e le faiaoga ona lava talitonuga ma faapea mai ai, e moni e na te lei faaalia lea lava lototele mo ona talitonuga. I le isi aso na sosoo ai, na faasilasila atu ai e le faiaoga e faapea, i le lumanai, o le a na le toe faaaafia lana vasega i so o se faamanatuga o aso mālōlō, ona o nisi o nei aso, e le talitonu foi ia i ai.
5 E naunau tagata o Ieova e faasusulu atu lo latou malamalama e tusa lava po o fea o latou i ai. O faaaʻoaʻoga o amioga lelei a le au talavou i aʻoga, ua matuā uunaia ai a latou aumea i aʻoga ma faiaoga. O Molimau matutua o ē faaalia amioga lelei i tuaoi, ua faapogai ai ona talanoa fiafia tagata i le feau o le Malo. O talaʻiga le fuafuaina i le tele o tulaga eseese, ua tosina mai ai tagata loto faamaoni o e mananao e aʻoaʻo atili le upu moni. E oo lava i lo tatou filigā ma le faamaoni i a tatou gaoioiga i aso faisoo e avatu ai se molimau lelei. Ioe, po o fea lava tatou te i ai, po o a foi a tatou mea e fai, e mafai lava ona tatou faatupuina le fiafia o tagata i le upu moni.
6 O le taulai atu o la tatou vaai i le auala o le soifuaga lē ponā o lo tatou Faaaʻoaʻo Sili, ua mafai ai ona tatou faaauau ona faaleleia atoatoa o tatou tomai i le avea ma ona soo. O le faataʻitaʻi i lana faaaʻoaʻoga o le a faamautinoa ai ua “pupula atu i e o i le fale uma” lo tatou malamalama.—Mata. 5:15; 1 Pete. 2:21.