O se Tala o le Malo Faapitoa mo Tagata Uma
1 Na amata mai ia Aperila 24 ona tatou tufa atu i le lautele le Tala o le Malo faapitoa ua faagaee ai le fiafia o so o se tagata magafagafa i so o se mea! O le feau o loo i ai, e le gata ina fetaui lelei mo le taimi nei a e ua faanatinati foi. Ua faaalia e tagata talaʻi i faapotopotoga uma le lagolagosua i ai ma le loto atoa, i le mananao lea e faaoo atu lenei feau i lima o le faitau afe o tagata. Po o e aapa atu e faia atoatoa ai se sao?
2 Na aauina atu i faapotopotoga taitasi ni Tala o le Malo ua uma ona fuafuaina, ma ua faatatauina e taʻi 50 sāvali a le tagata talaʻi e toatasi ma le 250 mo paeonia taitoatasi. E fia ni sāvali ua mafai ona e tufaina atu? Afai e lei mafai ona e tufa atu i le tele sa e faamoemoeina, po o e mafaufau ea i ni auala e faateleina ai a o lei iu le aso atofaina mo le tufatufaina ia Me 14? A e ā pe a tusia lou igoa e avea o se paeonia lagolago? Pe e mafai ona e faaaogā nisi avanoa faaopoopo mo le auaunaga a o faagasolo le vaiaso, e pei o le molimau atu i afiafi?
3 O le a iloiloina ma le faaeteete e toeaina pe na galueaiina uma oganuu e pei ona fuafuaina. Afai e lē mafai e le faapotopotoga ua tofia ona galueaiina nisi vaega, e tatau i toeaina ona faafesootai faapotopotoga taulata ane ina ia tuuina mai se fesoasoani. O a tatou taumafaiga ma le loto atoa, faapea ma le felagolagomai lelei i le va o faapotopotoga, o le a faamaeaina ai le galuega.
4 E le taumate ua e tofo foi i le olioli sili i lenei galuega ona e toatele na mafai ona faia ai se sao, e aofia ai tagata talaʻi fou ma e talavou. E faamoemoe o le a tumau pea lenei agaga o le olioli, e faalaeiau ai tagata uma ia toe asia tagata na faaalia le fiafia. Na uunaia i tatou e faia ni faamaumauga lelei o le galuega mai lea fale i lea fale, i le faamauina o igoa o i latou na faaalia le fiafia. O le faaiuga o Me, o le a avea o se vaitaimi lelei e tepa taulai atu ai i le faia o toe asiga ma le manatu e amata ai ni suesuega faale-Tusi Paia.
5 O le ā e mafai ona tatou fai atu ai pe a toe foi atu? Atonu e maua ni āuga lelei pe a e faapea atu: “E mautinoa o loo e manatua le pepa na tusia ai ni faamatalaga lea na ou tuua ia te oe talu ai; ou te faamoemoe sa e maua se avanoa e faitau ai ma mafaufau i lena mataupu. O le feau o loo i ai, e mautinoa le faagaeeina ai o ni talanoaga i lo tatou nuu, auā o loo aafia ai ni mataupu tāua ua fesagai ma tagata uma.” Ia taʻua nisi o faamatalaga faaoso manatu i le itulau lona lua, ma fesili atu: “O le a sou manatu i se mea e manaomia ona tatou fai e mautinoa ai ua tatou nofo sauni mo mea o le a tutupu i le lumanai lata mai?” Faatali mo se tali. Afai e faaalia le fiafia, talanoa loa i isi manatu i le itulau e 2-4 o le Tala o le Malo, ma ofo i ai se suesuega faale-Tusi Paia, a e afai e le talafeagai, ofo i ai mekasini fou.
6 Afai e te galue i le oganuu a se isi faapotopotoga, ia mautinoa ua tuuina atu i lena faapotopotoga igoa o tagata na faaalia le fiafia ina ia mafai ona toe asia i latou e tagata talaʻi o lena faapotopotoga. E faapena foi pe afai e tuuina atu ia te oe ni igoa o ni tagata e manaomia ona toe asia, e tatau lava ona e toe foi atu loa e asia i latou.
7 O le tufatufaina atu faapitoa o lenei Tala o le Malo, ua faatupuina ai le fiafia ma uunaia ai i tatou uma lava ina ia faamalosia a tatou taumafaiga i le galuega o le talaʻiina o le Malo. E mafai ona tatou mautinoa e faapea, o le a matuā sili atu ona taulau ma faateleina ai le iloa o tagata i so o se mea e uiga i le suafa silisili o Ieova ma ana fuafuaga. (Isa. 12:4, 5) O le tele o mea e mafai ona tatou faia, o le a sili atu ai foi ona tele lo tatou olioli.—Sala. 126:3.