Suesueina e Ieova—Aisea e Aogā Ai?
1 E faanaunau tagata uma i le soifua mālōlōina lelei. I lea tulaga ua atili ai ona avea le olaga o se mea e olioli ai. Ae peitai, o le toatele o ē o olioli i le soifua mālōlōina lelei, e masani ona iai taimi e ō ai e toe suesueina i latou. Aisea? Latou te saili ina ia iloa po o iai ni faafitauli tau i le soifua mālōlōina o tau aliaʻi mai, ia mafai ai ona faia ni laasaga mo ni togafitiga. E sili ai la ona tāua le leoleomaluina o lo tatou soifua mālōlōina faaleagaga. E faalagolago le faamaoniga a Ieova i le tausia o lo tatou “faamaoni [“malolosi,” NW] i le faatuatua.”—Tito 1:13.
2 O le taimi e sili ona talafeagai lenei e suesueina ai e Ieova. Aisea e faia ai faapea? Auā o lea ua afio Ieova i lona malumalu paia, ma o loo ia suesueina loto o tagata uma lava. (Sala. 11:4, 5; Faata. 17:3) I le pei o Tavita, ua tatou talosaga atu ia Ieova ina ia matuā suesue mai ia i tatou: “Ieova e, ia e suesue ia te au, ma tofotofo ia te au; ia e faamamā i oʻu manatu ma loʻu loto.”—Sala. 26:2.
3 E tatau ona leoleo i tatou faasaga i lamatiaga i lo tatou soifua mālōlōina faaleagaga e ono aliaʻe mai ia i tatou lava ona o o tatou tino lē lelei atoatoa. Ua fautua mai le Faataoto 4:23 e faapea: “Ia sili ona leoleoina o lou loto i le leoleoina o mea uma; [“auā e maua ai le ola,” NW].”
4 E mafai foi ona faamataʻuina lo tatou soifua mālōlōina faaleagaga e ala i le lalolagi faapiopio lē mamā o loo siomia ai i tatou. Afai tatou te faatagaina i tatou e miomiō faatasi ma lenei faiga amioleaga, e ono amata ai ona tatou atiina aʻe mafaufauga ma uiga o le lalolagi. Pe atonu foi e aafia ai i tatou i tifiga ma āga a le lalolagi ma pulea ai e le agaga o le lalolagi.—Efe. 2:2, 3.
5 Atonu e faaaogaina e Satani sauāga po o teteega tuusaʻo i se taumafaiga e faaleagaina ai i tatou i le itu faaleagaga. Ae peitai, i se tulaga e sili atu, e masani foi ona ia faaaogā i se auala faatogafiti faatosinaga a le lalolagi e faaseseina ai i tatou. Ua uunaia i tatou e Peteru ina ia ‘tatou mataala ma leoleo i tatou,’ talu ai o Satani ua “pei o se leona tagi, ua saili se tasi e ʻaina e ia.” Ua uunaia i tatou ina ia ‘tetee atu ia te ia ma ia mausalī outou i le faatuatua.’—1 Pete. 5:8, 9.
6 E manaomia ona puipuia lo tatou soifua mālōlōina faaleagaga, e ala i le faamalosia pea o lo tatou faatuatua i aso taitasi. Ua fautua mai le aposetolo o Paulo ina ia tofotofoina e lē aunoa lo tatou faatuatua. E pei ona tatou utagiaina ma le atamai fautuaga aogā e tuuina mai ia i tatou e se fomaʻi tomai, e ao foi ona tatou faalogo ia Ieova pe a faaalia i lana suesuega se faafitauli e manaomia ona faasaʻo. Ua mafai ai i lenei mea ona “faaatoatoaina i tatou.”—2 Kori. 13:5, 11.
7 E moni o Ieova o Lē Suesue sili. E saʻo aʻiaʻi mea ua ia mātauina. Na te silafia lelei le mea tonu o loo tatou manaomia. E ala i lana Afioga ma le ‘auauna faamaoni,’ ua ia tusia ai se fua o mea taumafa mo le soifua mālōlōina lelei faaleagaga e fetaui lelei mo i tatou. (Mata. 24:45; 1 Timo. 4:6) O le fafagaina e lē aunoa i lenei fua o meaʻai susua faaleagaga i le aiga ma sauniga a le faapotopotoga, ua mafai ai ona tatou tumau i le mālōlōina faaleagaga. E aogā foi le toleniina pea faaleagaga i le faiva ma isi gaoioiga faa-Kerisiano. Tatou te fiafia ai la e suesueina e lē aunoa i tatou e Ieova, i le mautinoa o le a ia tausia i tatou i le soifua mālōlōina e sili ona lelei faaleagaga.