Pusa Fesili

◼ O le ā e tatau ona fai pe afai ua tuai atu le failauga tofia e faia se lauga lautele i le sauniga?

E iai taimi, e tulai mai ai tulaga lē maalofia e taofia ai se uso mai le taunuu i le taimi tonu e aaoina lana lauga faatulagaina. Afai ua iai se mafuaaga e talitonu ai e faapea ua toeitiiti ona taunuu lea, atonu e filifili le ʻau toeaina e fai muamua le Suesuega o Le Olomatamata; ona sosoo ai lea ma le Sauniga i le Lautele. Ae ā pe afai ua manino o le a lē paʻau atu le failauga? Atonu e mafai e se failauga o le faapotopotoga ona faia se lauga ua uma ona ia saunia.

E masani i sauniuniga mamao ma le faaeteete ona alofia ai lenei faafitauli. E tatau i lē o loo faamaopoopoina lauga lautele, ona faafesootaia ia failauga taitasi pe ā ma se vaiaso a o lei faia, ina ia faamanatu ai ia te ia lana tofiga. O lena faamanatuga e tatau ona aofia ai le taimi o le sauniga, le tuatusi o le Maota o le Malo ma le numera o le telefoni, ma faatonuga manino i le nofoaga o iai le maota. E tatau i le failauga ona puepuemaua nei faamatalaga. E tatau ona ia faatāuaina lona tofiga, i le faia o ni fetuutuunaiga manaomia i ana mataupufai totino ina ia mafai ona faataunuuina lenei matafaioi. Afai e tulai mai se tulaga lē maalofia e ono taofia ai o ia mai le faia faapea, e tatau ona ia faafesootaia lē o loo faamaopoopoina lauga lautele i se taimi vave ina ia mafai ona faia fuafuaga mo se tasi e suia. E tatau ona faia so o se taumafaiga ina ia mafai ona alofia ai le toe sōloia i le taimi mulimuli. Afai ua tuai le failauga mo ni nai minute, e tatau ona ia telefoni atu i le Maota o le Malo ina ia iloa ai e uso ona faagasolo a latou fuafuaga.

O le talisapaia o tofiga mo lauga lautele, o fuafuaga lelei e muamua ona faia ma faamanatuga, ma le vaavaaiga e faia ma le faaeteete, e mautinoa o le a mafai ona olioli ai le faapotopotoga i le mauaina o aogā mai i lauga lautele i vaiaso taitasi.