Talaʻi le Tala Lelei i so o se Mea

¹ O uluai Kerisiano sa latou talaʻia le tala lelei i so o se mea. Na matuā maelega i latou auā i totonu o le tolusefulu tausaga talu le toetu o Iesu Keriso, o le feau o le Malo na “talaʻiina atu foi i tagata uma lava i le lalolagi.”—Kolo. 1:23.

² O auauna maelega a Ieova i aso nei ua iai foi ia i latou lea lava sini—e faaoo atu i tagata uma e mafai ai le tala lelei o le Malo. O le ā e mafai ona fesoasoani ia i tatou ina ia faataulauina lenei sini? O loo faateleina pea tagata o loo galulue faataimi atoa ma e masani lava ona leai nisi i fale pe a tatou asiasi atu. Afai e lē o faigaluega, atonu o loo faimalaga, po o fai se faatauga, po o le ō foi e fai nisi ituaiga o tafaoga. E faapefea la ona oo atu le feau o le Malo i ē tatau ai o loo iai ia i latou na?—Mata. 10:11.

³ O nisi ua faafesootaia i nofoaga o loo faigaluega ai. Ua oo lava i taulaga laiti e iai se vaega o pisinisi o loo faaalu ai e le toatele o tagata le tele o taimi o le aso. I aai tetele, o tagata e galulue i nofoaga faapitoa mo falegaosimea ma pisinisi, po o fale maualuluga e iai ofisa, ma i latou o ē mau i nofoaga malu puipuia, o loo mauaina se molimau—o le toatele lava o le taimi muamua lea. I faaiuga o vaiaso, o nisi sa faafesootaia a o mālōlō i paka, i nofoaga o tafaoga, i nofoaga e tolauapi ai, po o tamai fale e api ai po o le faatalitali foi i nofoaga e paka ai taavale po o nofoaga e iai faleoloa eseese ua faaalia lo latou tali lelei mai i le tala lelei.

⁴ O loo faia e le aofai ua faatoateleina o tagata talaʻi se taumafaiga faapitoa e molimau atu ai i nofoaga faitele, i so o se mea lava o mafai ona maua i ai tagata. I le taimi muamua sa faatalatū ma pei e fefefe nei Molimau, ona ua masani i talaʻiga ua fuafuaina lelei, e pei o le talaʻi mai lea fale i lea fale. O le ā la lo latou lagona i lenei taimi?

⁵ “Ua toe faaolaolaina ai laʻu faiva!” o le tala fiafia lea a se tasi o uso agavaa. Ua faaopoopo mai le isi uso e faapea: “Ua uunaia ai aʻu e taulai atu i luma.” Ua mātauina e se tasi paeonia matua e faapea: “E faafouina ai faalemafaufau, faaletino, ma le faaleagaga, . . . ma o loo faaauau pea ona ou agaigai i luma.” Ua iloa e se tasi tagata talaʻi e faapea ua mafai nei ona ia faafesootai le tele o tagata o ē e lei talanoa muamua lava i Molimau a Ieova. Ua auai foi ma le maelega talavou i lenei galuega faamalieloto. Ua faaleoina mai e se tasi o talavou ona lagona i upu nei e faapea: “E manaia auā e te talanoa atu ai i le toatele o tagata.” Ua faapea mai le isi: “Ua ou tufaina atu nei le tele o lomiga nai lo se isi lava taimi muamua!” O nei tulaga uma o loo tutupu i oganuu ua galueaina soo.

⁶ O Loo Taimua Ovasia Faimalaga: I le iloaina e faapea o loo ‘⁠suia le tulaga o le lalolagi nei,’ na fautuaina ai talu ai nei e le Sosaiete ia ovasia faimalaga ina ia fetuunai a latou faasologa o le auaunaga o le fanua mai lea vaiaso i lea vaiaso ina ia mafai ai ona faaooina atu le tala lelei i ni tagata se toatele e mafai ai. (1 Kori. 7:31) Mo le tele o tausaga, sa faatulaga ai e ovasia o matagaluega ia taeao o aso aunoa o le vaiaso ina ia auai ai i le galuega mai lea fale i lea fale, a o le afiafi e faaaogā atoatoa i le faia o toe asiga ma le faia o suesuega faale-Tusi Paia. I nisi oganuu, o loo aogā ai pea lena faasologa. I isi oganuu, e itiiti se fua ua fuaina mai e le galuega talaʻi mai lea fale i lea fale i nisi o taeao o aso aunoa o le vaiaso. O ia tulaga, atonu e filifili ai loa le ovasia faimalaga e lelei pe a ō atu i le taeaopo e galulue faasolosolo i faleoloa po o le molimau atu i ala tetele. E mafai foi ona ia faatulagaina ni vaega laiti e molimau atu i fale maualuluga o iai ofisa, o vaipanoa o fefaatauaiga, o nofoaga e paka ai taavale, po o isi nofoaga faitele. O le faaaogaina e tagata talaʻi o le taimi ua faaavanoaina mo le auaunaga i le fanua i se auala e sili ona uigā, o le a atili ai ona toatele tagata e faafesootaia.

⁷ Ua faaalia e lipoti e faapea o lenei suiga ua taliaina ma le fiafia e ovasia faimalaga faapena foi ma tagata talaʻi. O nisi tino o toeaina ua latou valaauliaina le ovasia matagaluega ina ia toleniina nisi o tagata talaʻi i vala o le galuega o loo manaomia le uai patino i ai. E aogā tele i nei tagata talaʻi le galulue faatasi ma le ovasia faimalaga a o ia auai atu i se tasi o nei galuega. Ona mafai ai foi lea e i latou ona toe toleniina isi. (2 Timo. 2:2) O le iuga, ua toatele ai tagata ua oo atu nei i ai le tala lelei.

⁸ Ia manatua, e lē manaomia ona e faatali mo le ovasia matagaluega seʻi asiasi atu e faataitaia nisi o nei auala o le talaʻiga. O nisi nei o manatu eseese e mafai ona aogā i lau oganuu:

⁹ Molimau Atu i Ala Tetele: ‘O fea o iai uma tagata?’ o nisi taimi e tatou te tau mānatu ai faapena a o tatou asiasi atu i se taeao o aso aunoa i se nofoaga e masani ona iai tagata ae ua tuufua. O nisi atonu o loo agaʻi e fai a latou feau tatau po o le faia o se faatauga. Pe ua e taumafai ea e faafesootaia i latou e ala i le molimau atu i ala tetele? Afai e lelei ona faatinoina lenei vala o le auaunaga, e mafai ona matuā fua tele mai. Nai lo le tūtū i le mea e tasi ma mekasini, e sili ona lelei le faalatalata atu i tagata ma amata se talanoaga faaleuo. E lē manaomia ona molimau atu i ē uma o fegasoloai. Ia talanoa atu ia i latou o ē e lē o faanatinati, e pei o ē matamata i faamalama o faleoloa, o ē o i totonu o taavale o loo paka, po o tagata o loo faatalitali mo se auala. Muamua lava, atonu ua na o se feiloaiga faaleuo e te faaali atu ma faatali mo se tali. Afai e naunau le tagata e talanoa, ona fesili lea mo sona manatu i se mataupu e te iloa e mafai ona fiafia i ai.

¹⁰ E toʻaono ni tagata talaʻi na valaauliaina e se tasi o ovasia faimalaga ina ia ō faatasi ma ia ma lana avā i se galuega o le molimau atu i ala tetele. Faatasi ma ā iuga? “E ese le manaia o le matou taeao!” o lana lipoti mai lea. “Sa lei iai le faafitauli lea o le lē maua o tagata i fale. E valusefulu mekasini ma le tele o sāvali na tufaina atu. Sa iai foi talanoaga fiafia na matou faia. Ua taʻutino mai e se tasi o tagata talaʻi o lē faatoʻā auai lava i lea galuega o le molimau atu i ala tetele e faapea: ‘⁠a autausagā o oʻu iai i le upu moni ae ou te lei iloaina le mea lea sa ou misia!’ E oo ane i le faaiuga o le vaiaso, ua faaitiitia le ota mekasini tele a le faapotopotoga lea na iai.”

¹¹ A o galue i le isi faapotopotoga na sosoo ai, sa iloa ai e le ovasia faimalaga lava lea e faapea na iai ni tagata talaʻi na auai i le molimau atu i ala tetele i se tasi taeaopo ae sa itiiti iuga lelei na maua ai. O se tasi tuafafine e na o le toʻalua tagata na talanoa i ai i lena taimi atoa na molimau atu ai, ona o isi tagata uma sa feiloai i ai sa faanatinati atu i galuega. Sa fautuaina e le ovasia faimalaga e toe foi uma atu i latou i le ala lava lea pe a leva le taeao. Sa latou faia faapea, ma sa iai pea iina seia oo i le aoauli. O le tuafafine lea sa na o le toʻalua tagata na talanoa i ai i le taeaopo, na sili atu ona lelei le tulaga ua iai ina ua toe foi atu. Sa ia tufaina atu mekasini e 31 ma polosiua e 15, sa ia faamauina suafa ma tuatusi o tagata e toʻafitu, ma e lua ni suesuega faale-Tusi Paia na amataina ai! O isi o le vaega lea, na iai foi ni iuga lelei e faalaeiauina ai.

¹² Afai e te tau atu i se tasi e faaalia le fiafia, ia taumafai e faamauina le suafa o le tagata, lona tuatusi, ma le numera o le telefoni. Nai lo le fesili saʻo i ai mo ni faamatalaga, atonu e te faapea atu: “E ese loʻu fiafia i lenei talanoaga. E iai se isi auala e mafai ona ta faaauau ai pea i se isi taimi?” Po o le fesili atu foi: “E iai se isi auala e mafai ona ou faafesootaia atu ai oe i lou aiga?” O le toatele o i latou ua faafesootaia i lenei auala ua malilie e toe asiasi atu. Ia faamautinoa ua lava lau sapalai o pepa ia e faaaogā e valaaulia ai i latou e fia auai i a tatou sauniga.

¹³ Afai e te talanoa i se tagata fiafia a o sē e aumau i le oganuu ua tofia i le isi faapotopotoga, e ao ona avatu ni faamatalaga ina ia mafai ai e uso iina ona latou tuliloaina le fiafia o lena tagata. Pe o le molimau atu ea i ala tetele o se auala uigā lea e faasalalau atu ai le tala lelei i lau oganuu? Afai o lea, ia autalu le mataupu e faapea: “Sailia o Ē Loto Fiafia e Ala i le Molimau Uigā i Ala Tetele” i le lomiga i La Tatou Faiva o le Malo o Iulai 1994. Ona fuafua lea e auai i le molimau atu i ala tetele i se taimi talafeagai o le aso o le a fesoasoani ia te oe e faafesootaia le tele o tagata e mafai ai.

¹⁴ Molimau Atu i Nofoaga e Faatali ai Auala o le Lautele: I se tasi taeao sa filifili ai nisi o paeonia e molimau atu i tagata o ē sa faatalitali mo le pasi e latalata ane i se kolisi. A o manaia lava a latou talanoaga, sa iai se faafitauli. O le taimi ua sologa lelei ai talanoaga, ae sau loa le pasi, ma faaselemutu ai le talanoaga. Sa foia e paeonia le faafitauli i le ō atu ai i le pasi ma faaauau ona molimau atu i le pasese a o latou malaga atu i le isi aai. Ina ua taunuu le pasi sa toe taliu mai paeonia i le pasi, ma talaʻi ai a o alu le malaga. Ina ua maeʻa nisi o malaga fefoifoiai a le pasi, sa latou faaopoopo faatasi iuga o a latou taumafaiga: E silia ma le 200 mekasini na tufaina atu ma e ono suesuega faale-Tusi Paia sa amataina. O nisi o pasese sa malilie e faamatuu ane o latou tuatusi ma numera o telefoni ina ia mafai ai ona asia i latou i o latou aiga. O le vaiaso na sosoo ai, na toe foi atu ai paeonia i le nofoaga faatali pasi ma mulimuli ai lava i le auala lea e pei ona sa faia muamua. Na latou tufaina atu mekasini e 164 ma e tasi se suesuega faale-Tusi Paia na amataina. I se tasi taimi na oso ane ai se pasese i luga o le pasi ma nofo i le nofoa e tasi lea na avanoa—o tala ane tonu lava o se paeonia. Sa ia tilotilo atu i le uso ma faapea atu ma le ʻataʻata: “Ou te iloa, o loo iai sau Olomatamata mo aʻu.”

¹⁵ E toatele tagata talaʻi ua tuuina atu se molimau uigā a o faimalaga atu i pasi, i nofoaafi, po o vaalele. E mafai faapefea ona e amataina se talanoaga ma se tasi o le pasese o nofo i ou tafatafa? Sa na ona amata ona faitau e se tagata talaʻi e 12 tausaga se kopi o le Ala Mai! i luga o le pasi, ma le faamoemoe e faagaee ai le naunau fiailoa o se teine talavou sa nofo i ona tafatafa. Na aogā. Sa fesili atu le teine ia te ia po o le ā o ia faitauina, ma sa tali atu le talavou e faapea o loo ia faitau e uiga i le vaifofo o faafitauli o fesagai ma tagata talavou. Na ia faaopoopo atu e faapea ua ia matuā maua aogā mai lea mataupu ma e mafai foi ona fesoasoani ia te ia. Sa taliaina ma le fiafia e le teine mekasini. Na lagona mai e isi talavou e toʻalua lea talanoaga ma sa la fesili atu foi mo ni mekasini. Ona o lenei mea, sa faatū ai e le avepasi le pasi i autafa o le auala ma fesili atu i le mafuaaga ua soona naunau ai i nei mekasini. Ina ua ia iloa, sa ia taliaina foi ni kopi. O le mea moni, e leai ma se tasi o nei mea e faataunuuina pe ana faapea e lē lava mekasini a le tagata talaʻi talavou e tufa atu ia i latou o ē na faaalia le naunau!

¹⁶ Molimau Atu i Paka ma Paka mo Taavale: O le molimau atu i paka ma paka mo taavale o se auala e aupito sili ona lelei lea e feiloai ai ma tagata. Pe na e taumafai ea e molimau atu i paka mo taavale i fetaulaiga o faleoloa? Ia faamasani i le faaaluina o ni nai minute e mātau lelei ai ou siomaga i na nofoaga. Vaavaai mo se tasi e lē o faanatinati po o sē o faatalitali i se taavale o paka ma taumafai e amata se talanoaga faaleuo. Afai e faaauau le talanoaga, ona tataʻi loa lea i le feau o le Malo. Ia taumafai e galulue taitoatasi ae ia iai se isi tagata talaʻi e felataʻi. Ia alofia le tauaveina o se ato telē po o se isi mea e iloa gofie ai lau galuega. Ia faautauta. Atonu e sili ona lelei le faaalu o sina taimi puupuu i lea paka mo taavale ma agaʻi atu i le isi nofoaga. Afai e lē manao le tagata e talanoa atu ia te oe, ia tuu filemu ae saili se isi tagata e talanoa i ai. O le faaaogaina o nei auala, sa tufaina atu ai e se tasi uso i le masina e tasi ni mekasini e 90 a o molimau atu i nofoaga e paka ai taavale.

¹⁷ O nisi tagata e mālōlō i paka; o isi e ō atu iina e taaalo pe faaalu ai se taimi ma a latou fanau. Nai lo le faalavelave atu i a latou gaoioiga, ia vaavaai mo se avanoa e tuuina atu ai se molimau. O se tasi uso sa ia amataina se talanoaga ma se tagata tausi fanua i se paka ma na iloa ai o loo manatu mamafa lea tamā i fualaau faasaina ma le lumanai o lana fanau. Sa amataina se suesuega faale-Tusi Paia ma ia ma sa faia e lē aunoa i le paka.

¹⁸ Molimau Lē Fuafuaina i Fetaulaiga o Faleoloa: E ui e lē faigofie pea ona talaʻi fuafuaina mai lea faleoloa i lea faleoloa i fetaulaiga o faleoloa ona o nisi o taofiofiga a le vaipanoa lava ia, ae ua atiaʻe e nisi tagata talaʻi lava latou ni avanoa e molimau atu ai lē fuafuaina. Latou te nofonofo i se nofoa ma amata ai se talanoaga faaleuo ma isi o ē o loo mālōlō ai iina. Afai e faaalia le naunau, ona latou ofoina lea ma le atamai se sāvali po o se mekasini ma taumafai e fai ni fuafuaga mo se toe asiga. Ina ua uma ona faaaluina ni nai minute e molimau atu ai i se tasi o vaega o lea nofoaga, ona faasolosolo atu lea i le isi itu ma talanoa atu i se isi foi tagata. O le mea moni, e ao ona faaeteete ina ia lē soona faatosina atu nisi a o molimau lē fuafuaina atu i lenei auala.

¹⁹ Afai e faafeiloai atu i se tagata, ia amata le talanoaga i se uiga faaleuo. Afai e tali mai lē o faalogologo, ia fai se fesili, ona faalogologo lelei lea a o ia faamatalaina lona manatu. Ia naunau totino i ana faamatalaga. Ia faaalia lou faatāuaina o lona manatu. Afai e fetaui, ia ioe faatasi ma ia.

²⁰ Sa faia e se tasi tuafafine se talanoaga fiafia ma se tasi o tinā matua e ala i le taʻuina atu o le siitaga o tau o le soifuaga ua iai nei. Sa ioeina e le tinā, ma na iu i se talanoaga lelei. Sa mafai e le tuafafine ona faamauina le suafa o le tinā, ma sa toe asia loa i le vaiaso lava lea.

²¹ Galulue Mai Lea Faleoloa i Lea Faleoloa: O nisi o faapotopotoga ua avea ia vaipanoa o pisinisi ma vaega o la latou oganuu tofia. O le uso o loo ia tausia oganuu atonu e mafai ona ia saunia ni faafanua o nei vaega tetele o pisinisi. So o se faafanua lava o le oganuu o loo mau ai tagata o loo aofia i le vaega o pisinisi e ao ona faamanino mai e faapea o le vaega o iai pisinisi e lē tatau ona galueaiina a o galulue i le faafanua o lea oganuu. I nisi oganuu, e mafai ona galueaiina faatasi nofoaga o pisinisi ma ni fale o aiga o latalata i ai. E mafai e toeaina ona valaaulia ni tagata talaʻi agavaa e galulue i oganuu o pisinisi i se tulaga faifai pea ina ia lē lafoaia ai le galulue mai lea faleoloa i lea faleoloa.

²² Afai e valaaulia oe e fai se sao i lea galuega ae e te lei faia muamua, o se auala lelei la e ‘faamalosia ai,’ o le galueaiina muamua lea o faleoloa laiti; ma afai ua e lagonaina le toʻa lelei, ona galueaiina loa lea o faleoloa tetele. (1 Tesa. 2:2) A o galue mai lea faleoloa i lea faleoloa, ia laei faapei o loo e auai i se sauniga i le Maota o le Malo. A mafai, ona ulufale lea i le faleoloa pe a leai ni tagata faatau o taliina. Fesili pe mafai ona talanoa i le pule po o lē o loo vaaia le faleoloa. Ia māfana, ma e sili atu i na mea uma, ia faapuupuu. E lē manaomia ona e tau faamālūlū atu. O le tele o pisinisi ua masani i feoaiga a ē faatau ma e latou te faatalitalia ni faasalavei.

²³ A maeʻa ona faafeiloaia se faatauoloa, atonu e te faapea atu: “O tagata faipisinisi ua iai sa latou faasologa pisi ua faafaigata ai ia i matou ona maua i latou i o latou aiga, o lea la ua matou asiasi mai ai ia te oe iinei i lau pisinisi ina ia tuuina atu se lomiga faatupu manatu e te faitau ai.” Ona fai lea o se manatu e tasi pe lua e uiga i se mekasini ua ofoina.

²⁴ Pe atonu e te faataitaia le faapea atu a o talanoa ma le pule: “Ua matou mātauina e faapea o tagata faipisinisi e taumafai lava e fiailoa mea o loo tutupu. O le lomiga fou o Le Olomatamata (po o le Ala Mai!) ua aumaia ai se mataupu o loo faapea ona aafia ai i tatou taitoatasi.” Faamatala po o le ā le mataupu, ma faaiu i le faapea atu: “Matou te mautinoa o le a e fiafia e faitau i ai.”

²⁵ Afai o iai tagata faigaluega, ma foliga mai e talafeagai, atonu e te faaopoopo atu faapea: “E afaina pe a ou taʻu atu lea lava faamatalaga puupuu i lau aufaigaluega?” Afai e tuu mai se faatagaga, ia manatua ua uma ona e folafola atu e puupuu, ma o le a faatalitalia oe e le pule ina ia tausi i lau upu. Afai e mananao nisi o le aufaigaluega e faalautele le talanoaga, e sili ona lelei le asiasi atu i o latou aiga.

²⁶ E lei leva tele atu, sa galulue faatasi ai nisi o tagata talaʻi ma le ovasia matagaluega i le galuega mai lea faleoloa i lea faleoloa i se taulaga laititi. O nisi o tagata talaʻi sa popole i le taimi muamua, ona sa lei auai muamua i lea galuega; ae e lei umi lava ae toʻa ma amata ona fiafia i ai. E itiiti ifo ma le itula, ae ua latou talanoa atu i tagata e 37 ma tufaina mekasini e 24 ma polosiua e 4. Sa mātauina e se tasi uso e faapea e masani ona lē mafai ona latou faafesootaia ni tagata e faapea le toatele i se masina e tasi a o galulue mai lea fale i lea fale e pei o lea ua latou faia a o galulue mai lea faleoloa i lea faleoloa i lea taimi puupuu.

²⁷ Faatupu Avanoa e Talaʻi Ai: E lei taotasi Iesu i lona molimau atu i na o tulaga ua fuafuaina. Na ia faasalalau atu le tala lelei i so o se avanoa lava e talafeagai. (Mata. 9:9; Luka 19:1-10; Ioa. 4:6-15) Mātau le auala ua faatupu ai e nisi o tagata talaʻi ni avanoa e talaʻi ai.

²⁸ O nisi ua fai ma masani le molimau atu i mātua o ē o loo faatalitali mo a latou fanau aʻoʻoga. Ona o le toatele o mātua e taunuu atu i le 20 minute a o lei tuua, ua iai la se taimi e faaaafia ai i latou i se talanoaga faaoso naunau i se mataupu faale-Tusi Paia.

²⁹ E toatele paeonia ua fiafia e oo atu i tagata o ē atonu o iai se naunau faapitoa i se mataupu patino o loo aumaia i a tatou mekasini. Mo se faaaoaoga, o se tasi tuafafine na ia mauaina ni iuga lelei ina ua asiasi atu i aʻoga e ono e i le oganuu a lana faapotopotoga faatasi ai ma se vaega o lomiga o le Awake! o Tesema 22, 1995, lea o loo iai le faasologa o mataupu e faapea “Schools in Crisis.” Sa asiasi atu foi o ia i matagaluega o loo gafa ma mataupu faaleaiga ma avatu mekasini e uiga i le olaga faaleaiga ma le faileagaina o tamaiti ma sa valaaulia o ia ina ia toe foi atu i se isi taimi ma nisi lomiga o iai nisi mataupu talitutusa faapena. O le tali sa ia maua mai le ofisa o loo fesoasoani i ē e leai ni galuega i le Awake! o Mati 8, 1996, lea o loo iai le mataupu e uiga i ē e leai ni galuega ua faamatalaina faapea ua “matuā lelei tele.”

³⁰ Ua lipotia mai e se ovasia itumalo e faapea e masani ona la molimau lē fuafuaina ma lana avā a o faia se la faatau. E fai le la faatauga i le taimi e lē matuā tumu ai le faleoloa, ma a o savalivali mālie tagata faatau i va o fataoloa ma faatoʻatoʻa lelei faatauga. Ua la lipotia mai le tele o talanoaga lelei.

³¹ E toatele tagata talaʻi ua lipotia mai iuga lelei a o molimau atu i tagata i faletamea faitele. E latou te lē tuua ni mekasini pe afai e leai se isi o iai. O lo latou sini o le faaooina atu o le tala lelei i tagata, o lea e latou te taumafai ai e talanoa patino ia i latou o ē o faaaogaina ia nofoaga.

³² I nisi o vaipanoa, ua filifilia ai nisi tagata talaʻi ua iai se faatagaga faapitoa e molimau atu i malae vaalele. I nisi taimi, e latou te maua ai le olioli i le molimau atu i tagata malaga faavaomalo o ē o loo aumau i atunuu o loo toaitiiti tagata o Ieova o iai. Afai e faaalia le naunau, ona latou ofoina lea i ai o se sāvali po o ni mekasini.

³³ Afai e lē faatagaina ona molimau patino i ē aumau i fale malupuipuia o loo i le oganuu a le faapotopotoga, o nisi ua fai ma masani le molimau atu ma le faautauta i ē o loo leoleoina le saogalemu o ia nofoaga po o le molimau atu i pule o ofisa ia o loo faaaogaina ia nofoaga. O le auala lava lea e tasi e faaaogaina i vaipanoa patino, e siomia e pa. O se tasi o ovasia matagaluega ma se vaega o tagata talaʻi na asia ni fale tetele e fitu i le uia o le auala lea. I tulaga taitasi, na latou taʻu atu ai i le pule e faapea e ui lava e lē faatagaina i latou e asiasi atu i lo latou nofoaga i le auala masani, ae e latou te lē mananao e misia e ia ni faamatalaga mai lomiga fou. O pule o nei faletetele uma e fitu sa latou talia ma le fiafia mekasini ma sa mananao mo isi lomiga o sosoo ai! O ē aumau i ia faletetele ua faafesootaia nei e ala i telefoni. O le a e mauaina ni faamatalaga aogā i le mataupu e uiga i le molimau atu i telefoni i le faaopoopoga: “Molimau atu i Telefoni—O se Auala e Maua ai le Toatele” i La Tatou Faiva o le Malo o Aokuso 1993.

³⁴ Ia Faamalosia Oe e Talaʻi i so o se Mea: O le ola aʻe e tusa ai ma lo tatou tuuina atu e aofia ai le lagonaina o se uiga faanatinati mo lo tatou tofiga o le talaʻia o le feau o le Malo. Ina ia oo atu i tagata i se taimi e talafeagai mo i latou, e manaomia ona faataatia ese o tatou manaoga totino “ina ia iu lava ina ola nisi” ona o i tatou. E mananao auauna tuuina atu uma lava a Ieova ina ia mafai ona faapea atu, e pei ona faia e le aposetolo o Paulo: “Ou te faia foi mea nei ona o le tala lelei, ina ia ou auai i ona faamanuiaga.”—1 Kori. 9:22, 23.

³⁵ Na tusi atili Paulo e faapea: “O lea ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso . . . auā pe a ou vaivai, ona ou malosi ai lea.” (2 Kori. 12:9, 10) I nisi faaupuga, e leai se tasi o i tatou e mafai ona faataunuuina lenei galuega i sona lava malosi. E manaomia ona tatou tatalo atu ia Ieova mo le malosi mai lona agaga paia. Afai tatou te tatalo atu i le Atua mo le malosi, e mafai ona tatou mautinoa e faapea o le a tali mai o ia i a tatou tatalo. O lo tatou alofa la mo tagata o le a uunaia ai i tatou e vaavaai mo avanoa e talaʻia ai le tala lelei ia i latou, i so o se mea e mafai ona maua i ai i latou. A o faagasolo le vaiaso o sosoo ai, aisea e lē faataitaia ai se tasi o fautuaga o loo i lenei faaopoopoga?