Ia Faaaogā i se Auala e Sili ona Lelei a Tatou Mekasini
1 O ā o faitauina e le toatele o tagata? O mekasini. Ua faaalia i suesuega e faapea, e 9 mai le toʻa 10 talavou i le va o le 10 ma le 18 tausaga, faapea foi ma tagata matutua, e faitauina pe ā ma le tasi le mekasini i masina uma. Ua matuā naunau le lalolagi i mekasini.
2 Pe e mafai ona tatou faia tagata loto faamaoni ia naunau i Le Olomatamata ma le Awake!? Ioe, pe afai TATOU te naunau i Le Olomatamata ma le Awake! O le ā e mafai ona fesoasoani ia i tatou? Seʻi manatu i fautuaga nei:
◼ Ia Faitau Mekasini: Na lipotia mai e se tasi ovasia faimalaga e faapea, i se faatatauga, e toʻa 1 mai le toʻa 3 o le autalaʻi mai lana matagaluega e faitau i lomiga taitasi o Le Olomatamata ma le Awake! mai le amataga e oo i le faaiuga. Pe e te faia faapea? A o e faitauina mataupu taitasi, fesili ifo ia te oe lava, ‘O ai o le a na talisapaia lenei faamatalaga—o se tinā o sē e talitonu e lē mafai ona iloa le Atua, o se tagata faipisinisi, po o se talavou?’ I lau lava kopi totino, faailoga ai se manatu se tasi po o se lua e mafai ona e faaaogā pe a taulimaina le mekasini. Ia ona e mafaufau loa lea i se auala e mafai ona e faaosofia ai le naunau i le mataupu i le faaaogaina o le na o se tasi pe lua ni fuaiupu.
◼ Ia Iai se Ota Mautinoa o Mekasini: Ia fai se ota mautū i le uso lea na te taulimaina mekasini mo se aofaiga maʻoti o kopi o lomiga taitasi. I le auala lenei, o le a maua ai e lē aunoa e oe ma lou aiga se sapalai ua lava o mekasini.
◼ Ia Faatulaga se Aso mo le Tufaina o Mekasini e lē Aunoa: E toatele faapotopotoga ua faataatia ese se aso patino, e faapitoa lava mo le molimau atu e ala i mekasini. Pe e mafai ona e lagolagoina le Aso Mekasini a le faapotopotoga? Afai e lē mafai, taumafai e faaaogā se taimi o le auaunaga mai lea taimi i lea taimi e molimau atu ai i ala tetele i mekasini, faapea ma le tufatufaina totino o mekasini e lē gata e mai lea fale i lea fale, ae faapea foi ma alā mekasini.
◼ Ia Avea o Sē e Naunau i “Le Olomatamata” ma le “Awake!”: Ia e alu ma ave ni kopi o mekasini pe a e alu malaga pe ō foi e fai faatauga. Ofo mekasini pe a e talanoa atu i ē tou te faigaluega faatasi, i tuaoi, aumea i aʻoga, po o faiaʻoga. O se tasi ulugalii e masani ona faimalaga i vaalele na la faaaogā se manatu i se tasi o mekasini fou e amataina ai se talanoaga ma se pasese na nofo e pito atu ia i laua. E tele ni mea fiafia na tutupu ua olioli ai i laua. E masani foi ona ave e nisi o tamaiti talavou i le aʻoga ni mekasini e iai mataupu latou te lagona o le a fiafia i ai o latou faiaʻoga ma uo i le aʻoga. Alu ma ave ni au mekasini pe a e alu i ni malaga faapisinisi, ma ofo i tagata faipisinisi pe a uma ona fai lau mataupu. O le toatele o i tatou e masani lava ona ō atu e faatau penisini; aisea e lē ofo ai mekasini i ē vaaia pamu penisini? Ia iai foi ni mekasini pe a asiasi atu ni tauaiga, pe a e faimalaga i auala mo femalagaiga, ia po o faatali foi mo se avanoa. Pe mafai ona e mafaufau i nisi o taimi talafeagai?
◼ Ia Sauniuni se Taulimaga Puupuu o le Mekasini: Ia fuafua e faapuupuu au upu, ae ia manino. Ia aasa. Ia pāʻia le loto. Ia tuusaʻo. Fili na o se manatu se tasi mai se mataupu, ia faamatala faapuupuu, ma ofo loa le mekasini. O le auala e sili ona lelei e taulima ai, o le faatū lea o se fesili e uiga i le mataupu o loo naunau i ai, ona faasino lea i se mataupu o loo aumaia ai se tali e faavae i le Tusi Paia. Manatunatu i ni nai faaaʻoaʻoga i le auala e mafai ona faia ai lenei mea:
3 Afai o e faamatilatilaina se mataupu e uiga i le oso maualuga o le solitulafono, e mafai ona e fesili atu e faapea:
◼ “O le ā e manaomia ina ia mafai ai ona tatou momoe filemu i le po e aunoa ma le mataʻu i le solitulafono?” Atonu e lē o mautinoa lelei e lē ona le fale le faagasolo ina faaleleia le tulaga o mea. E mafai ona e tali atu e faapea, o le lagona foi lena o loo i le toatele o tagata ma faaopoopo atu e faapea, o loo ia te oe ni faamatalaga e te talitonu o le a sili ona ia fiafia i ai. Ona faasino lea i se manatu talafeagai o loo i le mataupu.
4 Pe a e talanoa i se mataupu e uiga i le olaga faaleaiga, e mafai ona e faapea atu:
◼ “Ua iloa e le toatele o tagata e faapea, ua avea o se luʻi moni le sailia o mea e ola ai ma le tausia o se aiga i nei aso. E tele ni tusi ua tusia e uiga i lea mataupu, ae e oo lava i tagata tomai e lē ioe i vaifofo mo o tatou faafitauli. Pe e iai se mea e mafai ona tatou ō i ai e maua mai ai ni taʻiala maufaatuatuaina?” Ona faasino lea i se faamatalaga patino i le mekasini o faaalia ai le atamai o loo maua i le Tusi Paia.
5 E mafai ona e faalatalata atu faapenei pe afai o e faatomuaina se mataupu i faafitauli tau i le vafealoai:
◼ “O le toatele o tagata ua matuā omia lava i aso nei. E lei finagalo lava le Atua ia tatou ola faapenei.” Ona faailoa lea i ai o le auala e mafai ai e lenei mataupu e faavae i le Tusi Paia ona fesoasoani ia i tatou e feagai ai ma faafitauli o le olaga i le taimi nei ma saunia le faamoemoe mo se vaifofo tumau i le lumanai.
6 Ae faapefea meaalofa tauofo? Ina ia faailoa atu i ē loto talisapaia le auala e mafai ona latou fesoasoani ai, e mafai ona e faapea atu: “E ui lava o loo ofoina a matou lomiga e aunoa ma se tau, ae matou te talia se meaalofa tauofo e talafeagai mo la matou galuega i le lalolagi aoao.”
7 E Aogā le Molimau atu i Ala Tetele: I le lomiga o le Informant (La Tatou Faiva o le Malo) o Ianuari 1940, na faalaeiauina ai le au talaʻi mo le uluai taimi, ina ia faatulaga se aso faapitoa i vaiaso taitasi mo le molimau atu i ala tetele e faaaogā ai mekasini. Pe e te auai i le molimau atu i ala tetele mai lea taimi i lea taimi? Afai e te faia faapea, po o aogā moni ea le auala o e faaaogaina? Ua mātauina nisi tagata talaʻi e tutū i tulimanu o se auala pisi ma talanoa, a o fegasoloai le anoanoai o tagata e aunoa ma le iloa. Nai lo o le tutū toalua ma uu mekasini, e sili atu ona uigā le ō eseese ma faafeiloai atu i tagata. E ono tutū ni tagata ese ma faalogo mo sina taimi puupuu pe a faafeiloai e le tagata e toatasi, ae e toaitiiti lava ni tagata o le a tausolomua ona faalatalata atu i se vaega o aafia i se talanoaga. Ona o le a mataulia i tatou e le toatele o tagata feoai i le auala, e manaomia faapitoa ai la ona teuteu faalelei ma ia onomea o tatou laei e pei ona tatau ai i faifeau a le Atua.—1 Timo. 2:9, 10.
8 Alā Mekasini: O i latou o ē e iai se alā mekasini, e tuuina atu le tele o mekasini, e ui lava e galueaiina soo le oganuu. O alā mekasini o se auala sili lea ona lelei mo le faia o ni suesuega faale-Tusi Paia i aiga i le lumanai.
9 Pe a e faia e lē aunoa ni toe asiga e molioo atu ai mekasini, o le a e iloa ai le tuputupu aʻe o uiga mafana ma le faaleuo i le va o oe ma lē ona le fale. O le agaʻi ina e masani lelei ma lē ona le fale, o le sili atu foi lea ona faigofie ona lua talanoa e uiga i ni mataupu faale-Tusi Paia. O lenei mea, e mafai ona iu ai i se suesuega faale-Tusi Paia i le aiga e fua mai. I toe asiga e mātauina ai le talisapaia o mekasini, ofo i ai se tusiga. Ma ia manatua, o taimi taitasi e te asia ai lē ona le fale, e mafai ona e lipotia se toe asiga.
10 E masani lava ona ave e lē aunoa e se tasi tuafafine mekasini i se fafine o lē e masani ona ia talia, ae na faapea mai: “Ou te lē talitonu i mea ia e te fai mai ai.” I se isi asiasiga mulimuli ane, na tau atu ai le tuafafine o iai le tane i le fale. Ina ua uma se talanoaga mafana faaleuo, na faia loa fuafuaga e amata se suesuega faale-Tusi Paia. Sa faauo atu foi le tuafafine i le fanau tama e toatolu o ē na auai foi i le suesuega. I le iuga, na tuuina atu e le tinā ma lana fanau tama e toatolu o latou ola ia Ieova, ma papatisoina ai i latou. E oo mai i le asō, e toʻa 35 tagata o le aiga lenei ua talia le upu moni. Ua māfua nei mea uma, ona o le tuliloa pea e lenei tuafafine o lana alā mekasini!
11 E iai le anoanoai o auala e amata ai ni alā mekasini. E mafai ona e amataina se alā mekasini i le na o le tausia lava o se faamaumauga o au mekasini na tuu ma fuafua e toe foi atu i totonu o le taʻilua vaiaso ma lomiga fou. O le tasi o auala, o le faaaogaina lea o le faamatalaga lea e i lalo o le ulutala “I La Tatou Lomiga o Sosoo Mai.” Pe a e toe foi atu, taʻu i lē ona le fale o loo ia te oe le mataupu lea na e taʻua muamua. Po o le, pe a faia foi le toe asiga, e mafai ona e faapea atu: “Ina ua ou faitau i lenei mataupu, sa ou manatu faapea, atonu e te fiafia i ai . . . ” Ona fai lea o sina faamatalaga puupuu e uiga i le mataupu ma ofo loa. Pe a uma lau asiasiga, ia faamau manatu faigofie nei e lima i lau pepa faamaumau mai lea fale i lea fale: (1) le suafa o lē ona le fale, (2) le tuatusi o lē ona le fale, (3) le aso o le asiasiga, (4) lomiga na tuu, ma lona (5) le mataupu na talanoaina. Ua matuā taulau manuia nisi tagata talaʻi i le atiina aʻe o alā mekasini, ma faasolosolo ina faateleina e oo atu i le 40 pe sili atu toe asiga i a latou lisi!
12 Oganuu o Pisinisi: E tele mekasini ua tufaina atu e le au talaʻi o ē galulue i le oganuu o pisinisi. Sa e faataʻitaʻia e galue mai lea faleoloa i lea faleoloa? Ua faaalia i lipoti e faapea, i nisi faapotopotoga e matuā toaitiiti ai lava i latou e faia ni sao i lenei vala o le auaunaga. I le taimi muamua, sa matataʻu nisi e uiga i le asiasi atu i tagata faipisinisi, ae ina ua mavae ni nai taimi na taumafai ai, sa latou iloa e lē gata ina faafiafiaina ai, ae tauia. Aisea e lē talosaga atu ai i se tagata talaʻi e iai le poto masani po o se paeonia e fesoasoani ia te oe e amata faia faapea?
13 E iai foi ni aogā o le galue mai lea faleoloa i lea faleoloa. E toaitiiti lava aiga e lē maua atu i ai ni tagata, ae maise lava i taimi faigaluega! O tagata fai pisinisi, e masani lava ona faaaloalo e tusa lava pe latou te lē naunau patino i le Tusi Paia. O le vave ona amata i le aso; o le a faapena ona aliali mai e talileleia oe. Pe a uma ona faailoa atu oe, e mafai ona e fai atu, e seāseā ona e maua tagata faipisinisi i aiga, o lea ua e asiasia ai i latou mo sina taimi puupuu i o latou fale faigaluega e ofo atu lomiga fou o Le Olomatamata ma le Awake! Fai i ai, e toatele lava tagata faipisinisi latou te talisapaia a tatou mekasini ona e mananao ia ogatasi lo latou iloa ma mea tutupu i le lalolagi, ae itiiti se taimi e mafai ona faitau ai. Ua aumaia i mekasini ni faamatalaga faatupu manatu mai se vaaiga fou, e aunoa ma le aafia ai o ni manatu faaituau faalotu, faapolotiki, po o le tamaoaiga. Atonu e mafai ona faia se alā mekasini i ni tagata fiafia e maua i le oganuu o pisinisi.
14 Sauniuni o se Aiga Atoa: E mafai ona faataatia ese se taimi mai i le taimi o la outou suesuega faaleaiga e talanoa ai i mataupu i mekasini fou e talafeagai ona faaaogā i la outou oganuu. E mafai e tagata o le aiga—e aofia ai ma tamaiti—ona feauauai i le faia o a latou taulimaga ma foia ai teteega masani e tulai mai e pei o le: “O lea ou te pisi,” “Ua iai la matou lava lotu,” po o le “Ou te lē fiafia i na mea.” O le felagolagomai lelei, e mafai ai e le aiga atoa ona faia e lē aunoa se sao i le tufatufaina atu o mekasini.
15 E Mafai ona Fesoasoani le Fai Suesuega o le Suesuega Tautusi: Pe afai e fetaui, ia fuafua feiloaiga mo le auaunaga i le Aso mo Mekasini i nofoaga o suesuega tautusi nai lo le feiloai o le faapotopotoga atoa i le Maota o le Malo. O i latou e vaaia feiloaiga mo le auaunaga i le fanua, e ao ona sauniuni lelei ma ni fautuaga patino mo le vaega. E mafai ona faaaofia ai i nei mea se taulimaga faataʻitaʻi ma se manatu se tasi pe lua mai lomiga fou e mafai ona faaaogā e faaosofia ai le naunau i le oganuu. O feiloaiga mo le auaunaga i le fanua—e aofia ai le faamaopoopoina o le vaega—e tatau ona puupuu, e lē sili atu i le 10 i le 15 minute. E ao i fai suesuega ona faamautinoa ua lava le oganuu ina ia pisi ai pea le vaega i le taimi atoa o le auaunaga i le fanua.
16 Faaalia le Talisapaia o Mekasini: O le mataupu “Ia Faaaogā Lelei Le Olomatamata ma le Awake!” lea na faasalalauina i le lomiga o La Tatou Faiva o le Malo, o Iulai 1993, na taʻua ai le manatu tāua lenei e faapea: “E lē uma le aogā o Le Olomatamata ma le Awake!, e tusa lava po ua lē uma ona tufaina atu i le tasi po o le lua masina mai aso na lomia ai. E mavae le taimi, ae lē faaitiitia ai le tāua o faamatalaga o loo lomia ai . . . O le faaputuputu o mekasini tuai ma lē faaaogaina, e faaalia ai le leai o se talisapaia mo nei mea faigaluega tāua. . . . Nai lo o le faaputu ese o mekasini tuai ma faagalo, pe e lē sili ona lelei pe a faia se taumafaiga faapitoa e tufa atu i tagata loto naunau?”
17 I aso nei, e toatele tagata loto faamaoni o loo saili mo le upu moni. O faamatalaga o i se tasi o na mekasini, atonu o le mataupu tonu lena o loo latou manaomia e taʻitaʻiina ai i latou i le upu moni! Ua tuuina mai e Ieova ia i tatou se feau faafiafia loto e folafola atu, ma ua faia e a tatou mekasini se vaega matuā tāua i le faaooina atu o le feau i isi. Po o le a sili atu ea ona e mataalia i le tufatufaina atu o mekasini i le lumanai? Po o le a e faatinoina nisi o nei fautuaga i le faaiuga o lenei lava vaiaso? O le a matuā tele ou faamanuiaga pe afai e te faia faapea.
Fautuaga Aogā:
◼ Faitau muamua mekasini ma faamasani i mataupu.
◼ Fili se mataupu e talafeagai lelei ma se tulaga masani o fiafia i ai lou nuu.
◼ Sauniuni se taulimaga o le a talafeagai ma tagata eseese, po o tane, fafine, po o talavou. Faailoa po o le a faapefea ona fesootai atu le mekasini i lē ona le fale ma le auala o le a olioli ai le aiga atoa.
◼ Fai se fuafuaga e auai i lau galuega o le auaunaga i le fanua pe a iai le toatele o tagata i aiga. Ua fuafua e nisi faapotopotoga le molimau atu i afiafi po i mekasini.
◼ Ia faapupuu au taulimaga ma ia tuusaʻo.
◼ Aua le faatopetopeina lau tautala. Afai e lē fiafia lē o faalogologo ia te oe, o le faatopetope o lau tautala o le a leai se aogā e maua mai ai. Taumafai e toʻafilemu, ma tuu se avanoa i lē ona le fale e tali mai ai.
Ofoina o Mekasini Mai Lea Fale i Lea Fale:
◼ Ia laumata fiafia ma faaleuo ma ia leo mālū.
◼ Ia faaalia le aasa e uiga i mekasini.
◼ Tautala faagesegese ma ia faamanino.
◼ Talanoa i le na o le tasi se mataupu; ia faagaee puupuu le fiafia, ma faailoa i lē ona le fale le tāua o le mekasini.
◼ Faamatilatila na o le tasi se mataupu.
◼ Faatomua na o le tasi se mekasini, ma ofo le isi e fai mona soa.
◼ Tuu atu mekasini i lē ona le fale.
◼ Ia faailoa atu i lē ona le fale o loo e fuafua e te toe foi atu.
◼ Ia fai ni upu faaiu faaleuo ma mautinoa pe a teena mekasini.
◼ Fai ni faamaumauga o tagata fiafia uma ma ni lomiga na tuu i le pepa o faamaumauga mai lea fale i lea fale.
Avanoa e Tuu ai Mekasini:
◼ Molimau atu mai lea fale i lea fale
◼ Molimau atu i ala tetele
◼ Galue mai lea faleoloa i lea faleoloa
◼ Alā mekasini
◼ Molimau atu i afiafi po
◼ Pe a faia toe asiga
◼ Asiasi i ē na suesue muamua i le Tusi Paia
◼ Pe a ō malaga, fai faatauga
◼ Pe a talanoa atu i tauaiga, o aumea i galuega, o tuaoi, o aumea i aʻoga, o faiaʻoga
◼ I auala o femalagaaiga mo le lautele, ma i potu faatalitali