O le a Faaolaina Ituaiga Uma o Tagata Eseese
1 E finagalo Ieova “ina ia faaolaina o tagata uma lava, ma ia oo ina maua le poto saʻo o le upu moni.” (1 Timo. 2:4, NW) E ui lava ua tele ina taaʻina tagata i uiga tuufaasolo, o talaaga, ma le siosiomaga, ae o loo iai la latou filifiliga saʻoloto ma e mafai e tagata taitoatasi ona filifili i le auala o le a faaaogā ai o latou olaga. E mafai ona latou faia mea lelei ma ola ai, po o le mafai foi ona latou faia mea leaga ma faaumatia ai. (Mata. 7:13, 14) E faapefea i lenei malamalamaga ona aafia ai la tatou vaaiga i tagata tatou te ō atu i ai ma le tala lelei o le Malo?
2 E lē tatau ona tatou manatu faapea, o le fiafia o se tagata i le upu moni ua pulea e vala e pei o le atunuu e sau ai po o le talaaga o tū ma aganuu po o tulaga i le vafealoai. E mafai ona logoleleia le upu moni ia i latou e faalēlelei pe lelei foi aʻoaʻoga, i latou e fiafia i mataupu faapolotiki, ma tagata popoto i ni matātā faapitoa, o ē e lē talitonu i le Atua, o ē e lē talitonu i le iai o le Atua, ma e oo lava i tagata ua lauiloa i le faia o mea leaga. O tagata mai talaaga eseese o le olaga, ma tulaga masani o le olaga, ua suia mai o latou auala ma amioga sa iai muamua ma ua vaavaai atu nei i luma—ina ia maua le ola i le lalolagi fou a le Atua. (Faata. 11:19) O le mea lea, e lē tatau ai ona tatou faatalatū e ō atu i tagata uma lava e eseese ituaiga o olaga ma le feau o le Malo.
3 Manatunatu i Nei Faaaoaoga: Sa fuafua se tama e fasioti lona tamāfai peitai na te lei faia. Mulimuli ane, na ia filifili ai e pule i lona lava ola ae na te lei mafaia foi. Ina ua tuuina o ia i le falepuipui ona o le gaoi ma le tagofia o fualaau faasaina, na lē manuia ai lana faaipoipoga. I aso nei, ua ola ai lenei tagata i se olaga faamaoni ma ua olioli i se faaipoipoga fiafia faapea ma se faiā lelei ma lona tamāfai. O le ā le mea na mafai ai ona faia le suiga? Sa ia suesue le Tusi Paia ma Molimau a Ieova ma faatinoina mea na ia aʻoaʻoina. Sa lei manatu Ieova ia te ia e faapea ua lē mafai ona faasaoina.
4 O le lauiloa o se tamaitai talavou i le avea ma teine o ata tifaga i le televise, sa lei maua ai sona fiafia. Ae ona o le maofa i amioga lelei a Molimau, na ia talia ai se suesuega faale-Tusi Paia, ma e lei pine ae fesoasoani o ia i isi e aʻoaʻo e uiga i le tala lelei o le Malo. So o se mea na alu atu i ai o ia i le faiva mai lea fale i lea fale, sa mātaulia o ia e tagata, ae na ia faamatala mai ma le fiafia e faapea, sa manao e lauiloa o ia o se tasi o Molimau a Ieova nai lo o se teine o ata tifaga.
5 Ina ua fuafua e se Molimau se suesuega faale-Tusi Paia ma se tasi sa faia sana tusiga i Le Olomatamata, na faalogo i ai se tuaoi ma sa auai o ia i le suesuega. Sa vave lava ona iloa e le tuaoi o le upu moni lea na ia sailia! Na toe tolopo e ia ma lana tane se poloaiga na faia mo le tatalaina o le la faaipoipoga ma toe faia se faaleleiga. Sa matuā aafia o ia i valovaloga i fetu ma sa matuā auai atu i se lotu faataulaitu, ae na malie lava o ia e lafoaia tusi taugata ma isi mea uma sa ia te ia na fesootai atu ma faiga faatemoni. E lei pine ae auai o ia i sauniga ma talanoa atu i ona aiga ma uo e uiga i lona faatuatuaga fou. I le taimi nei ua molimau atu o ia ma le aasa i isi.
6 E lē tatau ona tatou uluai faia se faaiuga o so o se tasi. Nai lo o lea, seʻi o tatou tufa atu ma le maelega le tala lelei i tagata i so o se mea. Ua ia i tatou mafuaaga uma tatou te mautinoa ai o Ieova, o lē ‘silasila i le loto,’ o le a avea ma “Faaola o tagata uma.”—1 Samu. 16:7; 1 Timo. 4:10.