Ae Faapefea Ou Tauaiga?

¹ O le tele o i tatou, e toatele nisi o o tatou tauaiga e lē iai i le upu moni. Maeu lo tatou moomoo ma le naunau mo na tagata o ē pele ia i tatou ina ia aufaatasi ma i tatou i le ala i le ola! Atonu e matuā sili atu ona tatou popole mo lo latou ola e faavavau pe afai o i latou o ni tagata o loo tatou nonofo faatasi i lo tatou aiga. E ui lava sa tatou taumafai mo le tele o tausaga e faatosina mai i latou i le upu moni, ae lē tatau ona tatou faia se faaiuga e faapea ua lē taulau lena faamoemoe.

² Ina o faia e Iesu lana talaʻiga, ae “o ona uso foi, latou te lei talitonu ia te ia.” (Ioa. 7:5) Sa iai se taimi na manatu ai lona aiga ia te ia e faapea ua valea. (Mare. 3:21) Peitai, sa lei fiu ai Iesu ia i latou. Na iu ai ina talia e ona uso le upu moni. (Galu. 1:14) Na avea lona ʻafa uso o Iakopo ma poutu i le faapotopotoga Kerisiano. (Kala. 1:18, 19; 2:9) Afai e te manao e olioli i le vaai atu ua talia e ou tauaiga le upu moni, aua le faavaivai i le taumafai e tufa atu ia i latou le tala lelei o le Malo.

³ Ia Avea o Sē e Mālōlō ai, ae Lē Lofituina Ai: Ina o talaʻi atu Iesu i isi, sa lagona e lana ʻau faalogologo le mālōlō ai, ae lē o le mafatia ai. (Mata. 11:28, 29) Na te lei faalofituina i latou i ni aʻoaʻoga faigata e lē mafai ona latou malamalama i ai. Ina ia faafouina ou tauaiga i vai o le upu moni, avatu ia i latou na o sina ipuvai mai lea taimi i lea taimi, ae lē o se pakete vai! Sa mātauina e se ovasia faimalaga e faapea: “E mafai ona maua iuga lelei e i latou o ē e na ona faatupuina i o latou tauaiga le fia iloa e ala i le tuuina atu pea o sina molimau itiiti.” I lenei auala, e oo lava i ē tetee, e mafai ona fai mai ni fesili ma iu ai ina faatupuina le naunau mo le upu moni.—1 Pete. 2:2; faatusatusa i le 1 Korinito 3:1, 2.

⁴ E toatele Kerisiano faaipoipo ua latou avatu se molimau uigā i a latou paaga lē talitonu e ala i le tuu o lomiga e tatala i le mataupu atonu e latou te fiafia i ai. O se tasi o tuafafine na ia faia lenei mea, sa ia faia foi se suesuega ma lana fanau i se tulaga e lagona mai ai e le tane, i le avatua o faamatalaga o le a aogā ia te ia. I nisi taimi e fai atu ai o ia i lana tane: “O le mea lea ma le mea lea sa ou aʻoaʻoina mai i laʻu suesuega i le asō. O le ā sou manatu i ai?” Sa iu ina talia e lana tane le upu moni.

⁵ Ia Faaaloalo, ia Lava le Onosai: Na faapea mai se tasi tagata talaʻi, “e oo lava i tagata o aiga e iai le aiā i o latou lava lagona ma manatu.” O lea, e tatau ona tatou faaalia le faaaloalo pe a latou faaalia mai o latou manatu, pe talosaga patino mai ia i tatou ina ia aua neʻi talanoa atu ia i latou e uiga i le upu moni. (Fai. 3:7; 1 Pete. 3:15) O le onosai ma le alofa e ala i le faalogologo lelei, e mafai ai ona tatou vaavaai mo ni avanoa talafeagai e avatu ai se molimau uigā. O lena onosai e mafai ona tauia, e pei ona vaaia i le tulaga o se tane Kerisiano o lē na onosaia faiga lē lelei na fai e lana avā lē talitonu ia te ia mo le 20 tausaga. Ina ua amata ona sui le avā, na ia faapea mai: “Maeu loʻu loto faafetai ia Ieova ina ua ia fesoasoani mai ia te au e atiina ae le onosai, auā o lea ua mafai ona ou vaai i le iuga i le taimi nei: Ua amata e laʻu avā ona savali i le ala i le ola!”

⁶ Ae faapefea ou tauaiga? Atonu e ala i lau amio lelei faa-Kerisiano ma au tatalo mo i latou, ‘o le a e maua ai i latou mo Ieova.’—1 Pete. 3:1, 2, faamatalaga i le pito i lalo o le mau i le NW.